Üçüncü dövrənin son iki matçı: paytaxt derbisi və autsayderlərin dueli

Bu gün Topaz Premyer Liqasında 21-ci tura, eyni zamanda üçüncü dövrəyə yekun vurulacaq. Futbolinfo.az xəbər verir ki, son oyun günündə də iki görüş baş tutacaq.

Öncə Gəncədə “Kəpəz” AZAL-la münasibətlərinə aydınlıq gətirəcək. Turun qapanış matçında isə iki paytaxt klubu – “Neftçi” və “Zirə” üz-üzə gələcək. Bu oyunla həm də Premyer Liqada üçüncü dövrəyə yekun vurulacaq.

Topaz Premyer Liqası
21-ci tur
5 mart

“Kəpəz” – AZAL

Hakimlər: Orxan Məmmədov, Mübariz Haşımov, Mehman Mahmudov, Elvin Əsgərov.
AFFA nümayəndəsi: Məmmədəli Məmmədov.
Hakim-inspektor: Kərim Ağayev.
Gəncə şəhər stadionu, 15:00.

“Kəpəz”lə AZAL-ın qarşılaşmasını autsayderlərin dueli də saymaq olar. Paytaxt klubu çempionatın aşkar favoritidir və uzun müddətdir ki, nəinki qələbəyə, hətta xala həsrətdir və bir qayda olaraq məğlubiyyətləri sıralamaqla məşğuldur. "Kəpəz" isə "Neftçi"nin yüksəlişə keçməsi fonunda zəif çıxış etməklə AZAL-la qonşu olmaq məcburiyyətində qaldı. İndi Şahin Diniyevin komandası uğursuz gedişata autsayderə qalib gəlməklə son qoymaq arzusundadı. Gəncəlilərin ötən tur lider "Qəbələ"dən xal aldığını da nəzərə alsaq, "Kəpəz"i bu görüşün favoriti saymaq olar. Amma "təyyarəçilər"in də nəhayət xal həsrətinə son qoyması üçün qonşu pillədə qərarlaşan rəqibini büdrətməkdən başqa çıxış yolu yoxdu.

Lakin AZAL cari mövsüm bu rəqibinin qapısına qol vura bilməyib. Düzdü, birinci dövrədə Gəncədə keçirilən qarşılaşmada qapılara qol vurulmasa da, Tərlan Əhmədovun komandası səfərdən 1 xalla dönə bilmişdi. Amma ikinci dövrədə Julien Ebahın 83-cü dəqiqədə vurduğu yeganə qol "Kəpəz"ə Şüvəlanda vacib 3 xal qazandırmışdı. Paytaxt təmsilçisinin bu dəfəki Gəncə səfərinin necə nəticələnəcəyi maraqla gözlənilir.

Maraqlıdır ki, “Kəpəz” evdə 3 oyundur bu rəqibinə həm uduzmur, həm də qapısından qol buraxmır. Baxmayaraq ki, əvvəlki 18 oyundan 10-da qələbəni məhz bakılılar bayram ediblər. Gəncə təmsilçisi bu görüşlərin yalnız 4-də 3 xalı bayram edibsə, qalan 4 qarşılaşma da heç-heçə bitib. Elə top fərqində də AZAL-ın üstünlüyü diqqət çəkir.

Statistika: 18 oyun, +4=4-10, top fərqi 10-26

1-ci dövrə: 0:0
2-ci dövrə: 1:0

“Neftçi” – “Zirə”

Hakimlər: Rəhim Həsənov, Nahid Əliyev, Cavanşir Yusifov, Əliyar Ağayev.
AFFA nümayəndəsi: Rauf Əmirov.
Hakim-inspektor: Şaiq Həmidov.
Bakı. “Bakcell Arena”, 18:00.

Tura, eyni zamanda üçüncü dövrəyə paytaxt derbisi ilə yekun vurulacaq. Qış fasiləsindən sonra yüksəlişdə olan “Neftçi” “Zirə”ni qəbul edəcək. “Zirə” “Neftçi”nin tarixi ərzində məğlub etmədiyi yeganə komandadır. “Ağ-qaralar” son 4 matçda bu rəqibinə qol da vura bilməyib. İndi Elxan Abdullayevin komandası bu sindroma son qoymağa çalışmaqla həm də uğurlu çıxışının davamını gətirməyi hədəfləyib. Amma dördüncü pillədə qərarlaşmış "Zirə" üçün də bu oyunda ən azı uduzmamaq çox vacibdir.

İki paytaxt klubu indiyə qədər 6 oyunda üz-üzə gəliblər. Həmin görüşlərdən cəmi ikisi heç-heçə bitibsə, qalan dördündə zirəlilər qalib gəliblər. Bu mövsüm baş tutan oyunlarda da "Zirə" meydanı qələbə ilə tərk edib. Birinci dövrədəki oyunun 43-cü dəqiqəsində "Neftçi" Vüqar Mustafayevin qoluna əngəl ola bilməmiş və minimal hesablı məğlubiyyətlə üzləşmişdi. Maraqlıdır ki, ikinci dövrədəki oyunda da hesab məhz 43-cü dəqiqədə açılmışdı. Amma bu dəfə "ağ-qaralar"ı Yovan Krneta, özü də penalti zərbəsini dəqiqə yerinə yetirməklə məyus etmişdi. Adil Nağıyev isə 50-ci dəqiqədə yekun nəticəni müəyyənləşdirmişdi – 2:0.

Statistika: 6 oyun, +0=2-4, top fərqi 1-9

1-ci dövrə: 0:1
2-ci dövrə: 0:2