Ölkə futbolu
"Neftçi" üçün gözlənilən reallıq: Abdullayevin B planı yoxdur!
Çempionluq mübarizəsində daha bir əngəl geridə qaldı…
Çempionluq mübarizəsində daha bir əngəl geridə qaldı. Əyani dueldən sonra zirvəqə qərarlaşan "Qəbələ" "Qarabağ"a güzəştə getməməkdə israrlıdı.
Ötən tur ağdamlılar "İnter"ə uduzmaqla rəqibinin Gəncədə büdrəməsindən faydalanmamış, əksinə, onu 1 xal önə buraxmışdı. Srağagün isə növbəti səhvə yol vermək olmazdı. Bu səbəbdən "Qarabağ" heyətində xeyli itkilər olmasına baxmayaraq, Sumqayıtda əsl gücünü ortaya qoydu. 4:0 hesablı qələbə komandada əhval-ruhiyyəni düzəltdi, 2 ardıcıl məğlubiyyətdən sonra sarsılmış inamı geri qaytardı.
Sumqayıtlıların asan təslim olmasında Muarem Muarem böyük rol oynadı. 1 qol, 2 məhsuldar ötürmə və qazanılan penaltinin əsas səbəbkarı faktiki bütün qollarda iştirak etdi. Çempiona darmadağın "Sumqayıt"ın da avrokuboklar üçün yetişmədiyini göstərdi.
Bu matç bitəndən sonra meydana çempionluğa digər 2 namizəd çıxdı. Əslində, "İnter" bu şansı saxlamaq üçün mütləq qalib gəlməliydi. Lakin "Qəbələ" əsas rəqibini ötən tur yenən "bankirlər"ə daha bir sürprizə imkan vermədi. İkinci hissədədə vurulan 2 qol "qırmızı qaralar"ı zirvəyə qaytardı.
Bu görüşün də öz qəhrəmanı var idi. Tellur Mütəllimov təkcə hesabı açması ilə diqqət çəkmədi. Müdafiədə inamlı oynayan, bir neçə kritik məqamda rəqibin qol vurmaq şansının qarşısını alan cinah oyunçusu, bununla milli komandaya dəvət almasının təsadüf olmadığını göstərdi. Hesab açılan zaman isə Tellur fürsətcilliyini nümayiş etdirdi. Səlahət Ağayev cinah ötürməsini tuta bilməyincə o, ortada qalan topu tora qovuşdurdu.
Dünənki matçlardan sonra isə bəlli oldu ki, turda meydan sahiblərinin ümumi qazancı 1 xaldı. Çünki bazargünükü oyunlarda da qonaqlar uduzmadı. Baxmayaraq ki, Gəncədə hər şey fərqli məcrada cərəyan edirdi. "Kəpəz" ilk yarıda hesabı açıb, xal ehtiyatını zənginləşdirmək üçün əla fürsət qazanmışdı. AZAL da faktiki olaraq rəqib qapısı önündə təhlükə yaratmırdı. Lakin son dəqiqələrdə bakılılar təzyiqi artıran kimi istəyinə nail oldu. Cərimə meydançasına ötürmədən sonra Vaqif Cavadov 3 müdafiəçinin arasından dəqiq baş zərbəsi endirib, yeni klubunda qol hesabını açdı.
Bu qol həm də AZAL-ın cari mövsümdə "Kəpəz"i məyus etdiyi ilk top idi. 2017-də ilk xallarını qazanan şüvəlanlılar minimal hesablı yenilgi seriyasını da dayandırdı. Gəncəlilərin ardıcıl 3-cü heç-heçəyə sevinməsinə isə inanmıram. "Neftçi" və "Qəbələ" ilə oyunlardakı bərabərliklər uğur idisə, bu nəticə onları məyus etməlidi.
Turun ən böyük məyusluğunu "Neftçi" yaşadı. Elxan Abdullayevin yetirmələri avrokuboklara vəsiqə verən 4-cü pilləyə yüksəlmək şansını yaxşılaşdırmaq üçün bu yolda əsas rəqibi olan "Zirə"ni mütləq yenməli idi. Fasilədən həmən sonra penaltidən hesabı açan "ağ-qaralar" buna çox yaxın görünürdü. Lakin "Zirə" bir andaca vəziyyəti dəyişdi. Ayxan Abbasovun baş məşqçi postuna gəlişindən sonra yüksəlişə keçən "qartallar" qısa zaman ərzində dönüş edə bildi.
2:1 hesablı qələbə "Zirə"ni 4-cü pillədə möhkəmləndirməklə yanaşı, "Neftçi"nin problemlərini də çılpaqlığı ilə ortaya qoydu. Maksim Vaylonun Bakı klubuna layiq qapıçı olmadığı bir daha təsdiqləndi. Bundan başqa, komandanın oyun planındakı çatışmazlıqları, müdafiə qurğusunun etibarlı olmaması, orta sahədəki xaos özünü büruzə verdi. Görünən odu ki, "Neftçi" sürətli oynayan, rəngarəng kombinasiyalar quran, tempi qaldıran rəqiblərlə ayaqlaşa bilmir, "ağır" mərkəz müdafiəçiləri dişli rəqiblər önündə ağ bayraq qaldırır.
Baş məşqçinin oyuna müdaxiləsi də yerində deyil, Abdullayev bu komandanın yükünü çəkəcək qədər bacarıqlı sayılmamalıdı. Dəfələrlə "Neftçi"nin B planının olmadığını vurğulamış, komandanın ikinci nömrə kimi oynadığını qeyd etmişdik. "Neftçi"nin rəqibin hesabda önə keçdiyi oyunlarda xalsız qalacağını da proqnozlaşdırmışdıq. Qış fasiləsindən sonra ikinci belə hal yaşandı: Qəbələdə olduğu kimi, "Zirə" ilə matçda da Elxan bəy komandanı çətin vəziyyətdən çıxara blmədi.
Beləliklə, 3-cü dövrə bitdi. Mövsümün qalan 1/4 hissəsində daha gərgin mübarizə gedəcək. "Qəbələ" və "Qarabağ" qızıl medalı bölüşəcəksə, "İnter" "bürünc"ü indidən təmin etmişə bənzəyir. AZAL artıq sonuncu pillədəki mövqeyi ilə barışmalıdı, "Zirə"nin digər komandaları da yaxına buraxmayacağını demək olar. "Neftçi" kubokda sensasiyaya imza atımasa, Avropa Liqasına məhz "qartallar"ın gedəcəyini gözləməyə dəyər.
AĞA
- Ölkə futbolu2024-04-30 09:15
“Qarabağ” Avropada 2-ci yeri bölüşdürür
- Ölkə futbolu2024-04-30 15:31
Riad Rəfiyevin çempionatı: hakimlər qışdan bəri “Sumqayıt”a 8 xal hədiyyə edib
- Premyer-liqa2024-04-30 09:30
“Yalnız birlikdə olaraq uğurlar qazana bilərik” – Ozobiç
- Ölkə futbolu2024-04-30 10:29
“Qarabağ” üçün daha bir potensial rəqib