Avroliqada 1/8 finala start verildi: "Beşiktaş" səfərdən heç-heçə ilə qayıdır

Bu gün Avropa Liqasında 1/8 final mərhələsinə start verilib. Futbolinfo.az xəbər verir ki, ilk oyunların hamısı eyni gündə baş tutub.

Azərbaycanlı futbolsevərlərin daha yaxından maraqlandığı Türkiyə çempionu “Beşiktaş” Yunanıstanda “Olimpiakos”un qonağı olub. “Qara qartal” ötən mərhələdə Türkiyənin digər klubu “Osmanlıspor”u mübarizədən kənarlaşdırmış yunanlardan qisas almaqla 1/4 finala çıxmağı hədəfləyib. İstanbul klubu ilk yarıda qapısında qol görsə də, fasilədən sonra meydan sahiblərini məyus etməyi bacarıb. Nəticədə "Beşiktaş" prinsipial səfər matçından sərfəli hesabla qayıdıb. 

"Mançester Yunayted" də Rusiyada "Rostov"la görüşdən 1:1 hesablı bərabərliklə ayrılıb. Rusiyanın digər təmsilçisi "Krasnodar" isə səfərdə "Selta"ya məğlub olub.

Yeddi qolun vurulduğu "Gent" – "Genk" oyunu gecənin ən məhsuldar qarşılaşması olub. Belçika klublarının duelində sevinən isə qonaqlar olub. Bu nəticə ilə "Genk"in növbəti mərhələyə vəsiqənin taleyinə böyük ölçüdə aydınlıq gətirdiyini demək olar. 

Almaniya klublarının – "Şalke" və Münhenqladbax "Borussiya"sının dueli də maraq doğururdu. Lakin bu görüşdə qalib müəyyənləşməyib.

Favoritlərdən hesab olunan Lion "Olimpik"i ilə "Roma"nın görüşü bol qollu alınıb. Hesabı fransızlar açsa da, İtaliya təmsilçisi sonradan hesabı öz xeyrinə dəyişə bilib. Amma Lion klubu qalan dəqiqələrdə daha üç qol vurmaqla əzmkar qələbəyə sevinib.

Digər oyunlarda "Kopenhagen" doğma meydanda "Ayaks"a, "Anderlext" isə səfərdə APOEL-ə qalib gəlib.

Avropa Liqası
1/8 final mərhələsinin ilk oyunları
9 mart
 
APOEL (Kipr) – “Anderlext” (Belçika) – 0:1

“Kopenhagen” (Danimarka) – “Ayaks” (Hollandiya) – 2:1

“Rostov” (Rusiya) – “Mançester Yunayted” (İngiltərə) – 1:1

“Selta” (İspaniya) – “Krasnodar” (Rusiya) – 2:1

“Gent” (Belçika) – “Genk” (Belçika) – 2:5

“Olimpik” (Lion, Fransa) – “Roma” (İtaliya) – 4:2

“Olimpiakos” (Yunanıstan) – “Beşiktaş” (Türkiyə) – 1:1

“Şalke” (Almaniya) – “Borussiya” (Münhenqladbax, Almaniya) – 1:1