Premyer-liqa
“Qarabağ” üçün asan, “Qəbələ” üçün çətin sınaq
Bu gün Topaz Premyer Liqasında 22-ci tura yekun vurulacaq. Futbo…
Bu gün Topaz Premyer Liqasında 22-ci tura yekun vurulacaq. Futbolinfo.az xəbər verir ki, son oyun günündə də iki görüş baş tutacaq.
Öncə son çempion “Qarabağ” doğma meydanda çempionatın aşkar autsayderi AZAL-la münasibətlərinə aydınlıq gətirəcək. Turun qapanış matçında isə “Neftçi” lider “Qəbələ”ni qəbul edəcək.
Topaz Premyer Liqası
22-ci tur
14 mart
“Qarabağ” – AZAL
Hakimlər: Rəhim Həsənov, Yaşar Abbasov, Rahil Ramazanov, Ramil Diniyev.
AFFA nümayəndəsi: Sakin Məmmədzadə.
Hakim-inspektor: Xaqani Məmmədov.
Bakı. “Azersun Arena”, 17:00.
Liderdən bir xal geri qalan “Qarabağ” bu görüşdən mütləq qələbə ilə ayrılmağa çalışacaq. Ağdam klubu son 6 ev matçında xal itirməyib. 13 oyundur bu komandaların duellərində heç-heçə qeydə alınmır. “Qarabağ” son 4 qarşılaşmada qalib gəlib. Elə bu oyunda da Ağdam klubunun aşkar favorit olduğu şübhəsizdir. Çempionatın aşkar autsayderi olan "təyyarəçilər" hətta səfərdən heç-heçə ilə qayıtsa, bu, turun ən böyük sensasiyasına çevrilə bilər.
Tərəflər arasındakı əvvəlki 33 oyundan 21-də Ağdam klubu qalib gəlib. Qurban Qurbanovun komandası 6 oyunda heç-heçəyə razılaşıbsa, 6 oyunda da məğlubiyyətlə üzləşib. Top fərqində də ağdamlıların ciddi üstünlüyü diqqət çəkir.
Cari mövsüm baş tutan görüşlərə gəlincə, onların hamısında "Qarabağ" qalib gəlib. Xüsusilə birinci dövrədə "Əlincə Arena"dakı oyunda Reynaldo və Maksim Medvedevin dublu, Migel Madera və Dani Kintananın vurduğu qollar sayəsində son ölkə çempionu 6:0 hesablı qələbəyə sevinmişdi. İkinci dövrədə "AZAL Arena"dakı qarşılaşmada isə Muarem Muaremin vurduğu tək qol "Qarabağ"a vacib qələbə qazandırmışdı. Tərəflərin son qarşılaşması da Şüvəlanda baş tutub. Həmin görüşdə Rəşad Abdullayev "təyyarəçilər"i hesabda önə keçirsə də, Maksim Medvedevlə Coşqun Diniyevin fasilədən sonra 3 dəqiqəlik fərqlə vurduğu qollar Ağdam klubunun əzmkar qələbəsini rəsmiləşdirmişdi.
Statistika: 33 oyun, +21=6-6, top fərqi 50-26
1-ci dövrə: 6:0
2-ci dövrə: 1:0
3-cü dövrə: 2:1
“Neftçi” – “Qəbələ”
Hakimlər: Elvin Əsgərov, Vaqif Musayev, Mehman Mahmudov, Ömər Paşayev.
AFFA nümayəndəsi: Mübariz Hüseynov.
Hakim-inspektor: Şaiq Həmidov.
Bakı. “Bakcell Arena”, 20:00.
Turun ən maraqla gözlənilən oyunu “Qəbələ” ilə “Neftçi” arasında baş tutacaq. Qış fasiləsindən sonra inamlı çıxışı ilə seçilən paytaxt klubu liderlə dueldə də öz "dişini" göstərməyə çalışacaq. Lakin üçüncü dövrənin ən yaxşı nəticə göstərən komandasına çevrilən və nəticədə liderliyi ələ keçirən qəbələlilər də Bakıya ancaq qələbə üçün gəliblər. Mümkün heç-heçə daha çox "Qarabağ"ın işinə yaraya bilər.
Tərəflər arasındakı son 5 matçda “Neftçi” qalib gələ bilməyib. Bakılılar öz meydanında 4 oyundur xala, 6 matçdır qələbəyə həsrətdi. Ümumiyyətlə, əvvəlki 35 oyundan 14-də bakılılar, 13-də isə qəbələlilər qələbə qazanıblar. 8 oyunda qalib müəyyənləşməyib. Top fərqində isə bölgə təmsilçisinin minimal üstünlüyü diqqət çəkir.
“Qəbələ” bu rəqiblə son oyunlarda ardıcıl 3 qələbə qazanıb. Cari mövsümə təsadüf edən bu görüşlərdən xüsusilə birinci dövrədəki oyun böyük əks-sədaya səbəb olmuşdu. Masazırdakı "Əlincə Arena"da keçirilən qarşılaşmada bölgə təmsilçisi 8 cavabsız qola sevinmişdi. Həmin matçda Baqali Dabo het-trikə, Ruslan Qurbanov dubla imza atmış, Vitali Vernidub, Filip Ozobiç hərəyə bir dəfə fərqlənmiş, bakılıların müdafiəçisi Jayro isə avtoqol müəllifi olmuşdu. İkinci dövrədəki oyun da bol qollu alınmışdı. Qəbələdə baş tutan və beş qolun vurulduğu görüşdə Sergey Zenyov dubla imza atmış, Asif Məmmədovla Rəşad Eyyubov hərəyə bir dəfə fərqlənmişdi. Qış fasiləsində məhz "Qəbələ"yə transfer olunan Araz Abdullayevin indiki komandasının qapısına vurduğu yeganə qol isə "Neftçi" üçün sadəcə, təsəlli xarakteri daşımışdı. Bu komandaların son oyununda isə "Qəbələ" doğma meydanda tək qolla qalib gəlmişdi. Daniel Subotiç komandasına vacib 3 xal qazandırmışdı. Bu gün isə "Neftçi" cari mövsümdəki bütün məğlubiyyətlərin qisasını almaqla "Qəbələ"ni həm də liderlikdən edə bilər.
Statistika: 35 oyun, +14=8-13, top fərqi 44-45
1-ci dövrə: 0:8
2-ci dövrə: 1:4
3-cü dövrə: 0:1