Müsahibə
Rövnəq Abdullayev: "Bu, doğrudan, biabırçılıqdı, cinayətdi"
Bu gün AFFA İcraiyyə Komitəsinin iclası keçirilib. Fut…
Bu gün AFFA İcraiyyə Komitəsinin iclası keçirilib. Futbolinfo.az xəbər verir ki, iclasdan sonra mətbuat konfransı təşkil olunub.
Mətbuat konfransında AFFA prezidenti Rövnəq Abdullayev, baş katib Elxan Məmmədov və PFL prezidenti jurnalistlərin suallarını cavablandırıb.
Rövnəq Abdullayev öncə bunları söyləyib: "İcraiyyə Komitəsinin iclasında mühüm məsələlər müzakirə edildi. Xüsusilə, danışılmış oyunlarla bağlı. UEFA-da bu cür oyunları izləyən böyük qurum yaradılıb. Premyer Liqayla bağlı heç bir şübhə olmayıb. Həmin qurumdan Birinci Divizionla bağlı müraciət edilib. Sabah artıq bu barədə radikal qərarlar qəbul edəcəyik. Bu, Azərbaycan Respublikasının qanunlarına görə cinayətdi. Həmin insanlar cinayət məsuliyyətinə cəlb ediləcək. Bu gün bir neçə fakta baxdıq. Doğrudan, biabırçılıqdı. Mənə çox pis təsir etdi.
“İnter” klubunun da taleyi müzakirə edildi. Klubun gələcəyi ilə bağlı bankdan təminat aldıq. Mövsümün sonuna kimi klubu AFFA idarə edəcək. Mövsümün sonunda kluba yeni sponsorun cəlb edilməsilə bağlı danışıqlar gedir.
Bundan başqa veteran futbolçulara təqaüd verilməsiylə bağlı da müzakirə aparıldı. Bu ənənə yalnız iki ölkədə var – İngiltərədə və bizdə. Buna əsasən, bu gün daha bir neçə futbolçuya AFFA tərəfindən təqaüd verilməsi qərara alındı".
– AFFA tərəfindən bir neçə klubda Müşahidə Şurası yaradılıb. “Kəpəz”də də həmçinin. Ancaq klubdan edilən açıqlamada Gəncə şəhər stadionunun təmir olunması üçün AFFA-dan maliyyə gözlədiklərini deyiblər. Bəs yaradılmış Müşahidə Şurası nə işə yarayır?
– Müşahidə Şurası komandalara maliyyə ayırmaq üçün yaradılmayıb. Bunun yaradılmasında səbəb şəffaflığın təmin edilməsi, klubun bir nəfərin əlində cəmlənməsinin qarşısını almaqdı. Gəncə şəhər stadionuna gəldikdə isə, bu arena mövsümün sonunda yeni ot örtüyü ilə təmin ediləcək. Bu, çox bahalı işdi. Ancaq bizim planımız var ki, 10-12 stadionun ot örtüyü dəyişdirilsin.
– Ötən il Media Komitəsi yaradıldı. Bu qurumun gələcək taleyi necə olacaq?
– Elxan Məmmədov: Media Komitəsi məhz Rövnəq bəyin göstərişi ilə yaradılmışdı. Bu komitə fəaliyyətini davam etdirəcək. Komitənin yaradılmasına səbəb, ölkəmizdə keçiriləcək AÇ-2020 üçün jurnalistlərin hazırlanmasıdı.
– Rövnəq Abdullayev: Hər il hakimlərin toplanışı olur. Mən tərəfdarıyam ki, bu cür jurnalistlərin treninqi keçirilsin. Belədə, jurnalistlərin yazısının keyfiyyəti daha da artırılacaq.
– Seçim necə olacaq?
E. M.: Eyni qaydada olacaq. Seçkini siz keçirəcəksiz və öz nümayəndələlərinizi seçəcəksiz.
– Dediz ki, tapşırıq vermişəm, Premyer Liqada komanda sayı artırılsın. Ancaq komandaların çoxuna AFFA baxır. Sayı düzəltmək üçün yeni gələn klublara da AFFA baxacaq?
– R.A. Ötən il qarşımıza məqsəd qoymuşduq ki, növbəti mövsümdən çempionatda 10 komanda iştirak etsin. Ancaq lisenziyalaşdırma da əsasdı. Bu işlər FİFA və UEFA-nın tələblərinə əsasən görülməlidi. “İnter” məsləsində də belə olacaq. Klubun bazası var. Bu baza bank tərəfindən futbolun inkişafına verilsə, sponsor tapıla bilər. Biz baxırıq, harada baza varsa, ora sponsor cəlb etməyə çalışırıq. Lisenziyası, bazası olsa, “Turan” da, “Mil-Muğan” da Premyer Liqaya çıxa bilər. Birinci Divizion AFFA-nın köməyilə keçirilir. Bəzi klubların vəziyyəti bizə pis təsir edir. Yüksək liqanın Azərbaycanın bütün regionlarını əhatə etməsini istəyirik. Region komandalarının fəaliyyətini dayandırması təəssüf doğurur. “Xəzər Lənkəran” fəaliyyətini dayandırdı. Hazırda yalnız region klublarından “Kəpəz” fəaliyyətini davam etdirir. Ancaq istəyirik ki, region komandalarının sayı çox olsun.
– Qarşıdan İslam Həmyerliyi Oyunları gəlir. Orada çıxış edəcək komandaya həvəsləndirici mükafat vəd olunacaq? Komandadan hansı nəticə tələb olunacaq?
– Niyə həmişə maliyyə tərəfinə baxırıq? Bundan öncə milli qürur məsələsi var. Oyunçular özlərini yaxşı tərəfdən göstərmək üçün mübarizə aparmalıdılar. Komandanın qarşısına heç bir tələb qoyulmayıb. Tələbimiz yalnız yaxşı oyun nümayiş etdirməkdi.
– Klubların maliyyələşməsində bütün yük SOCAR-ın üzərinə düşür. Düşünmürsüz ki, bu məsədə dövlətin köməyi lazımdı?
– SOCAR da elə dövlətdi də (gülür). Məsələ o deyil, yavaş-yavaş futbola bu oyunu əsl sevənlər gəlir. Bir var, iş adamı özünü göstərmək üçün gəlir, bir də var futbolu sevən insanlar. Cənab prezident futbolun inkiçafını SOCAR-a təhvil verib. Biz də bunun üçün çalışırıq.
– Uşaq futbolunda vəziyyət elə də yaxşı deyil. Aşağı yaş qruplarında keçirilən yarışlarda texniki məğlubiyyətlərin sayı çoxdu. Komandalar oyuna gəlmirlər. Bundan başqa, aşağı yaş qruplarından ibarət millilərə xaricdən oyunçular cəlb edilir…
– E.M. Düzdü, komandalar oyuna gəlməyəndə texniki məğlubiyyət verilir. İntizam Komitəsi bu məsələlərə baxır. Bu, bütün dünyada belədi. Xaricdə də aşağı yaş qruplarının oyuna gəlmədiyi hallar olur. O ki qaldı kütləviliyə, regionlarda regional turnirlər keçiririk. Bundan başqa, məktəbli kuboku keçiririk. Milli komandaya gəldikdə isə, burada U-15-dən cəlb olunma başlayır. O ki qaldı başqa ölkədən gələn oyunçulara, onlar özü müraciət edir. Məşqçilər həmin oyunçuların çıxışından razı qaldıqda, milliyə cəlb edilirlər.
– “CBC Sport”un fəaliyyətilə bağlı bəzi söz-söhbətlər var…
– “CBC Sport”un nəticələri yaxşıdı. Bu cür söz-söhbətlər isə yəqin ki, rəqabətdən qaynaqlanır (gülür). Hazırda ölkədə iki idman kanalı var. Bu cür rəqabətin olması yaxşıdı. Bu kanalda hətta aşağı liqanın oyunları da yayımlanır. Məni əsas narahat edən ölkədəki azarkeş amilidi. Bu, mənim yaralı yerimdi. Xaricdə insanlar oyunlara traktorla gəlirlər. Klub rəhbərləri azarkeşləri stadiona cəlb etmək üçün çalışmalıdılar. Boş stadionda futbolçu öz potensialının 20 faizini göstərmir. Azarkeşsiz futbolçu özünü göstərmir. Tamaşaçısız aktyor kimidi. Azarkeşlərin oyuna gəlməməsində ictimai qınaq olmalıdı.
– Almaniya millisiylə daha öncə də qarşılaşmışıq. Əvvəl baş məqşçimiz Berti Foqts idi, indi Robert Prosineçkidi. Hansında yaxşı nətəcəyə daha çox ümidlisiz?
– Almaniya millisi fenomendi. Bu komandaya uduzmaq da şərəfdi. Almaniya millisi qol belə buraxmayıb. Ancaq əsas olan meydandakı mübarizədi. Millimizdən əsasən, yaxşı mübarizə gözləyirəm. Almaniya millisi maşındı. Bu komandayla oynamaq çox çətindi.
– Seçkiylə bağlı ən çox Balkan ölkələrinə səfər edirsiz. Bunda Prosineçkinin rolu nə dərəcədədi?
– E.M.: Siz Balkan deyəndə, yəqin ki Xorvatiyanı nəzərdə tutursuz (gülür). Bu ölkənin futbol federasiyası ilə Prosineçkidən öncə də münasibətimiz var idi. Bəzi ölkələr var ki, adlarını açıqlamaq istəmirlər. Ancaq qərb ölkələrinə də səfər etmişəm. Aprelin 5-nə qədər bütün Avropa ölkələrinə səfər edəcəm.
– Futzal Federasiyası futbol klublarında futzal komandasının yaradılmasını təklif edir. Federasiya prezideti Zaur Axundov bununla bağlı İcraiyyə Komitəsində məsələ qaldıracağını qeyd etmişdi…
– R. A.: Futbol komandalarını güclə saxlayırıq. Hələ ki, klublarda futzal komandası yaratmaq planımız yoxdu. Klublar özü-özünü maliyyələşdirməlidi. Sponsordan asılı olmamalıdı. Futbol həm də kommersiyadı. Bizdə bu işlə məşğul olacaq menecerlər, mütəxəssilər hazırlanmalıdı.
– Oğlunuz Rəşad Abdulalyev “Səbail”in Müşahidə Şurasının sədridi. Klub Premyer Liqaya vəsiqə qazanacağı halda onun bu vəzifədə qalması söz-söhbətə səbəb olmayacaq ki?
– Gəlin bu məsələyə son qoyaq. O da futbol azarkeşidi. Mən özüm qəsdən onu bu işə cəlb etdim ki, sevdiyi işlə məşğul olsun. Sevərək çalışır. “Səbail” Premyer Liqaya vəsiqə qazanan kimi o, istefaya gedəcək. Mən burada ola-ola o, klub rəhbəri ola bilməz. Bu, ictimai vəzifədi. Konfliktə səbəb ola bilər.
– Danışılmış oyunlarda iştirak etmiş klublarla, oyunçularla bağlı ən sərt cəza nə olacaq?
– R. A.: Bilirsiz, əvvəl bu məsələləri sübut etmək çətin idi. Ancaq indi UEFA-da elə qurum var ki, hətta “Göyəzən”lə “Şahdağ”ın oyununun video çəkilişinə kimi təqdim edirlər. Çində bu komandaların oyununa hansı, neçənci dəqiqədə pul qoyuluşu qoyulduğunu təqdim edirlər. Heç ağlıma da gəlməzdi ki, Çində “Göyəzən”lə “Şərurspor”un oyununa pul qoyuluşu edilsin (gülür). Bilirsiz, adi gözlə bunu müəyyənləşdirmək olmur. Ancaq həmin matçlara nə qədər pul qoyulduğuna baxdıqda, bəzi şeylər daha çox aydınlaşır.