Bileti “yananlar”: AFFA təzminat ödəyəcəkmi?

Dünən baş tutan Azərbaycan – Almaniya oyunu tribunaya toplaşan azarkeşlərə zövq verdi. Millimiz məğlub olsa da, oyunun keyfiyyəti, tempi bilet alanları məyus etmədi.

Lakin oyunla bağlı təşkilati işlərdə bir çox qüsurlar var idi. Belə ki, yüzlərcə biletli azarkeş stadiona girməyi bacarmadı. Onların arasında iranlı turistlər, alman fanatlar, əsasən də yerli azarkeşlər vardı.

Təşkilatçılıqdakı bu qüsurun səbəbini öyrənmək üçün AFFA-nın mətbuat xidmətinin rəhbəri Mikayıl Nərimanoğlu ilə danışdıq. Qurum rəsmisi faktı etiraf etdi: “Bəli, belə hal olub. Bunun səbəbi isə girişdə yaranmış basabasdı. İnsanlar oyun başlayarkən stadiona daxil olmaq istəyib. Heç kim özünə əziyyət verərək daha tez gəlmək istəmir, halbuki biletin üstündə də yazılıb ki, qapılar start fitinə 2 saat qalmışdan açıq olur. Hamı oyun saatında gəldiyindən, ciddi tıxac yaranıb və bileti olan bəzi insanlar kənarda qalıb”.

Nərimanoğlu azarkeşləri günahlandırmaq istəsə də, əslində, belə deyil. Dünyanın böyük, 60-70 min tamaşaçını qəbul edən stadionlarında eyni hal yaşanmır. İnsanlar oyuna yarım saat qalmış da gələrkən rahatca tribunada yerlərini alırlar. Bunu Tiflisdə UEFA superkuboku uğrunda matçda da gözlərimizlə gördük. “Barselona” – “Sevilya” oyununa gələnlər heç bir əngəl olmadan yerlərini ala bildilər. Həmin oyuna dünənki ilə müqayisədə 2 dəfə çox insan gəlmişdi.

Bəlkə tıxacın yaranmasına, sonucda bileti olanların kənarda qalmasına səbəb stadiona girişin yalnız bir istiqamətdən olmasıdı? Nərimanoğlu bu məsələyə də aydınlıq gətirdi: “Ola bilər. Amma buna görə sualı Respublika stadionunun rəhbərliyinə vermək lazımdı. Biz icarəçiyik. Turniket sayı müvafiq tələblərə cavab verəcək sayda idi. Əlavə turniketlər quraşdırmaq, stadionun digər qapılarını açmaq olardı, ya yox? Bu suala cavab verməli tərəf biz deyilik. Düzü, belə ajiotaj da gözləmirdik. Bileti ola-ola içəri girə bilməyən insanların sayı o qədər də çox olmayıb. Amma istənilən halda, məsələni araşdıracağıq”.

Tıxacın yaranmasında polislərin də rolu var. Onlar sanki bilərəkdən süni əngəl yaradırdılar ki, qarışıqlıq yaransın və biletsizləri nəyinsə qarşılığında buraxa bilsinlər. Əməkdaşımızın gözü önündə stadionun digər girişlərindən, xüsusilə restoranları olduğu cənub qapısından bəzi azarkeşlər arenaya buraxılırdı. Onlar polislərlə razılaşıb, buna nail olurdular. Bu isə biletsizlərin tribunaları doldurması, biletli azarkeşlərin kənarda qalması ilə nəticələndi.

Maraqlıdı, AFFA zərər çəkmiş azarkeşlərə təzminat ödəyəcəkmi? Yenə Mikayıl bəyin qeydlərinə baxaq: “Hələlik bizə heç bir müraciət olunmayıb. Müraciət olarsa, baxacağıq. Biletlər araşdırılacaq və müvafiq qərar veriləcək”.

Təbii ki, istifadə olunmayan biletləri yoxlamaq çətin deyil. Əgər turniketlərdə həmin biletlər yoxlanmayıbsa, qeydiyyata düşməyibsə, deməli, onların pulunu geri istəmək olar. Bunun üçün isə AFFA-ya müraciət etmək və təzminat istəmək lazımdı. AFFA da müraciətlərə baxmağa hazırdı.

Təşkilatçılıqda digər qüsur bəzi azarkeşlərin tribunada ola-ola oyuna baxa bilməməsiydi. Belə ki, birinci sırada əyləşənlər meydanı görə bilmir, ayağa qalxır, o zaman da arxadakılara əngəl yaradırdı. Çünki polis və hərbçilər sektorların aşağısında dayandığından ilk sırada əyləşənlərin seçim imkanı yox idi: “Biz birinci sıralara bilet satmamışdıq. Elə sektorlar var ki, hətta 2 və 3-cü sıralar da boş qalmalıydı”.

Nərimanoğlunun açıqlaması məntiqlidi. O zaman bu problem necə yaranmışdı? Axı, birinci sırada əyləşməyə çalışan xeyli insan gördük. Mikayıl bəy bəzilərinin uşaqla oyuna gəldiyini,bir biletlə 2 yeri məşğul etdiyini, azarkeşlərin biletə uyğun yerlərdə oturmadığını iddia etsə də, zənnimizcə, səbəb başqadı. Görünür, mühafizə xidməti biletsiz o qədər çox insanın içəri girməsinə şərait yaradıb ki, onlar hətta bilet satılmayan yerləri də doldurublar.

İstənilən halda, problem var və 30 min insanın gəldiyi oyunda ciddi qüsurlar üzə çıxdı. Bu, bileti ola-ola oyuna baxa bilməyən bəzilərinin küsməsinə də səbəb olacaq. Görəsən, ölkə çempionatımızın, millinin bütün oyunlarında bu qədər azarkeş olsaydı, AFFA nə edərdi?

CAVAD