Ölkə futbolu
Respublika stadionunun direktoru: “Hamı turniketləri keçib”
Millinin dünənki oyununda bileti ola-ola matça baxa bilm?…
Millinin dünənki oyununda bileti ola-ola matça baxa bilməyən azarkeşlərin narazılığı bitmir. AFFA onlara hər hansı müraciətin olmadığını bildirsə də, redaksiyamıza bu barədə yeni xəbərlər gəlir. “Futbolinfo”nun sosial şəbəkədəki hesabına bir çox azarkeşlər narazılığını bildirir, AFFA-dan təzminat almaq, biletə ödədikləri pulu geri götürmək üçün kömək istəyirlər.
Artıq AFFA onların müraciətlərinə baxmağa hazır olduğunu bəyan edib. Ona görə də müraciət ediləcək ünvan bəllidi. “Futbolinfo” sadəcə, narazıların şikayətlərini işıqlandırmaq imkanına malikdi.
Azərbaycan – Almaniya matçı zamanı azarkeşlərin tıxacda yubanmasının, bileti ola-ola matça baxa bilməməsinin bir səbəbi kimi də stadionun giriş qapılarının hamısının açıq olmaması göstərilir. Hətta AFFA-nın mətbuat xidmətinin rəhbəri Mikayıl Nərimanoğlu bizimlə söhbətdə turnketlərin sayının az olmasının onlara dəxli olmadığını bildirmişdi: “Ola bilər. Amma buna görə sualı Respublika stadionunun rəhbərliyinə vermək lazımdı. Biz icarəçiyik. Turniket sayı müvafiq tələblərə cavab verəcək sayda idi. Əlavə turniketlər quraşdırmaq, stadionun digər qapılarını açmaq olardı, ya yox? Bu suala cavab verməli tərəf biz deyilik”.
Belədə Respublika stadionunun direktoru Şamil Quliyevlə danışmalı olduq: “Turniketlərin sayı kifayət qədərdi. Hər hansı problem yoxdu. Basabasın yaranmasının səbəbi bununla bağlı ola bilməz. Azarkeşlərin əksəriyyəti oyuna 5-10 dəqiqə qalmış gəlir ki, belədə 30 min adamın eyni vaxtda keçməsi mümkün deyil”.
Şamil bəyə oyuna 1 saat qalmış gələn azarkeşlərin də tıxaca düşdüyünü, vaxtında yerini ala bilməməsini dedikdə o, bunları əlavə etdi: “Biz bütün istiqamətlərdən girişləri aça bilmərik. Bu, təhlükəsizlik baxımından fəsadlara səbəb ola bilər. Amma stadionin sektorlara gedən bütün qapıları açıq olub. O tıxacı bilərəkdən kimlərsə yaradıb. Həm də heç kim giriş qapısında qalmayıb, hamı turniketləri keçib. İçəridə yer olmayıbsa, bunun günahkarı biz deyilik, biletsiz insanları kim buraxıbsa, onlardan soruşmaq lazımdı”.
Göründüyü kimi, hamı günahı üzərindən atır, ortada qalan isə bileti ola-ola matça baxmayan azarkeşlərdi. Mühafizəni təşkil edənlərə müraciət etməyi, ümumiyyətlə, lazım bilmirik. Guya polislər nəyisə etiraf edəcəkmi?