Ölkə futbolu
"Zirə"nin yaratdığı fərq: "Qəbələ"nin taleyi öz əlində deyil
Sona 4 tur qalmış 4 xallıq fərq – indi çempionluq yarışı…
Sona 4 tur qalmış 4 xallıq fərq – indi çempionluq yarışı içində olan "Qarabağ"la "Qəbələ"ni məhz bu məsafə ayırır. Bu isə o deməkdi ki, ağdamlılardan fərqli olaraq, izləyicisinin qızıl medalları qazanmaq şansı daha azdı və ən əsası, öz əlində deyil. "Qəbələ" növbəti turda lideri məğlub və "Qarabağ"ın daha bir dəfə büdrəməsinə ümid etməlidi. Bundan başqa, "qırmızı-qaralar" da bütün oyunlarda qələbə qazanmalıdı. Əks halda, Adam klubu ardıcıl 4 dəfə çempion olub, ölkə rekordunu yeniləyəcək.
***
Topaz Premyer Liqasında 24-cü tura Sumqayıtda start verildi. Şəhərin eyniadlı təmsilçisi mövsümdə 3-cü dəfə "Neftçi"yə qalib gəlməklə 5-ci pilləyə yüksəldi. 3 dəqiqə ərzində vurulan 2 qol "Sumqayıt"ın avrokubok ümidlərini də yenidən çiçəkləndirdi. Çünki indi "Zirə" ilə xal fərqi uçurum səviyyəsində deyil. Qalan 4 turda inadla hədəfə doğru irəliləmək olar.
"Neftçi" öz ampluasındadı. Həftəiçi "Qarabağ"la kubok matçında olduğu kimi, bakılılar yenə 0:2 hesabıyla uduzdu. Həm də bu dəfə rəqib 3 dəqiqə ərzində Elxan Abdullayevin yetirmələrini şoka sala bildi. Saatın tamamında qapıçı Maksim Vaylonun inamsız oyunu, ardınca Amil Yunanovun fantastik qolu nəticəni müəyyənləşdirdi. Və növbəti dəfə sübut olundu ki, "Neftçi" hətta autsayderlə oyunda da favorit qismində çıxış edə bilmir. Bununla yanaşı, komanda qış fasiləsindən bu yana hesabda geri düşdüyü heç bir oyunda xal qazana bilməyib.
"İnter" – AZAL görüşü formal xarakterli idi. Hər iki komanda faktiki hədəfsiz qalıb. Meydan sahibləri bu oyundakı qələbəylə Avropa Liqasına vəsiqəni rəsmiləşdirsə də, onsuz da heç kimin buna şübhəsi yox idi. Eyni sözləri AZAL haqda da demək olar, lakin durum fərqlidi. "Təyyarəçilər" bu məğlubiyyətlə (1:2) elitayla rəsmən vidalaşdı – onların da bu taleyi yaşayacağı çoxdan bəlli idi.
Paytaxt derbisindən sonrakı mətbuat konfranslarının mövzusu da oxşar idi. Belə ki, həm qaliblər, həm də məğlublar pulsuzluqdan, çətinliklərdən gileyləndi.
Liderlərin görüşü eyni vaxtda başladı. "Qarabağ"ın qulağı Qəbələdə idisə, qəbələlilər də Bakıdan xoş soraq gözləyirdi. Maraqlıdı ki, dünən 19.32-yə kimi Roman Qriqorçukun yetirmələri zirvədə idi. Çünki "Qəbələ" "Zirə"yə erkən qol vurmuş, "Qarabağ" isə "Kəpəz" qarşısında geri düşmüşdü. Düzdü, fasiləyəcən ağdamlılar hesabı bərabərləşdirdi, lakin belə olan halda da şəxsi görüşlərin nəticəsinə görə ağdamlılar ikinci pilləyə düşmüşdü. Vəziyyəti 47-ci dəqiqədə başla qol vuran Migel Madeyra dəyişdi, daha sonra isə "Zirə" intriqanı öldürdü.
"Qarabağ"ın heyətində ciddi itkilər olsa da, "Kəpəz"lə ev matçında büdrəmək yolverilməz idi. Uzun fasilədən sonra Respublika stadionuna qayıdan ağdamlılar sönük təsir bağışladıqları ilk yarıda bəlkə də qanunauyğun qol buraxdılar. Künc zərbəsindən sonra hesabı açan Kərim Diniyev atası Şahin bəyi ümidləndirsə də, fasilə ərəfəsində Dino Ndlovu gözlənilməz zərbə ilə yerli azarkeşlərin həyəcanına son qoydu. Təşvişsiz, həyəcansız oynayan "Qarabağ" fasilədən dönən kimi hesabı 2:1 edəndə isə qonaqların əks-hücumlara bel bağlayaraq, ən azı 1 xal qazanmaq arzusunun üstündən xətt çəkildi. Qalan vaxtda top saxlayan meydan sahibləri "dişsiz" rəqibin 5 oyunluq məğlubiyyətsiz seriyasına son qoydu.
"Qəbələ"nin büdrəməsi artıq sensasiya sayılmır. Komandanın oyununda düşüş diqqət çəkir və "qırmızı-qaralar"ın çox asan qol buraxmaları onları dəfələrlə çətin vəziyyətdə qoyub. Bu dəfə də belə oldu və saysız qol vəziyyətlərini boşa verən meydan sahibləri Avropa Liqasına vəsiqə həvəsində olan "Zirə"nin müqavimətini qıra bilmədi. Qızıl medallar uğrunda yarışda özü özünə problem yaradan Qriqorçukun yetirmələri vəziyyəti düzəltmək üçün tez ayılmalı, bir az da bəxtə ümid etməlidilər.
AĞA
- Ölkə futbolu2024-04-30 09:15
“Qarabağ” Avropada 2-ci yeri bölüşdürür
- Ölkə futbolu2024-04-29 08:00
Avrokuboka vəsiqə üçün vacib qələbələr: Sumqayıtda hakimlər də iş başında idi
- Ölkə futbolu2024-04-29 09:25
“Nitsa” Benzianı istəyir
- Ölkə futbolu2024-04-30 15:31
Riad Rəfiyevin çempionatı: hakimlər qışdan bəri “Sumqayıt”a 8 xal hədiyyə edib