Premyer-liqa
“Sumqayıt”da dini qarşıdurma?
"Neftçi"ni 2:0 hesabı ilə məğlub etməklə 5-ci p…
"Neftçi"ni 2:0 hesabı ilə məğlub etməklə 5-ci pilləyə yüksələn "Sumqayıt" yenidən diqqətləri üzərinə çəkməyi bacardı. Futbolinfo.az sport7.az saytına istinadla xəbər verir ki, "gənclik şəhəri" təmsilçisinin bu uğurunda komandanın baş məşqçisi Samir Abasovun əməyi danılmazdı. Xarizmatik çalışdırıcı çətin məqamlarda komandasını toparlaya, vacib qələbələr qazana bilir. "İnter"in avrokuboklara qatılması sual altında olduğundan "Sumqayıt" qalan turlar ərzində 5-ci pilləni qorumağı bacarsa, ölkəmizi Avropa Liqasında da təmsil edə bilər.
Bu günlərdə Samir Abasovla bağlı xoşagəlməz informasiya yayılıb. Bildirilir ki, Abasov yetirmələri ilə həddən artıq aqressiv davranır, onları ağır söyüşlərlə təhqir etməkdən belə çəkinmir. Onun bu cür davranışı isə futbolçularda narazılıq doğurur.
Çalışdırıcının məşqdə söyüş söyməsi Kamran Abdullazadənin narazılığına səbəb olub və futbolçu çalışdırıcıya etirazını bildirib. Abdullazadə deyib ki, onun şəxsiyyətini təhqir etməyə heç kimin ixtiyarı yoxdu. Bundan sonra isə Abdullazadə Samir Abasovun qəzəbinə tuş gəlib və baş məşqçi onu əsas heyətdən kənarlaşdıraraq əvəzedici komandaya göndərib.
Digər bir olayda isə Bəhlul Mustafazadənin adı hallanır. "Qəbələ"ni "Sumqayıt"a dəyişən Mustafazadənin dinə baxışları onun başına bəla olub. Ateist olduğunu dilə gətirən futbolçunun fikirləri baş məşqçinin və klub rəhbərliyinin xoşuna gəlməyib və ona bildiriblər ki, sözlərini geri götürməsə, komandadan göndəriləcək. Bir müddət əsas heyətdən kənar qalan Bəhlul dünən "Neftçi"ylə oyunda son dəqiqələrdə əvəzetmədən meydana daxil olub. Əvvəlki turlarda isə Bəhlul 90 dəqiqə ərzində ehtiyat oyunçular skamyasını tərk etməyib.