Ölkə futbolu
Bir maliyyə mənbəyinə möhtac qalmağın fəsadları
Ölkə klublarının bir maliyyə mənbəyində birləşməsi əvv…
Ölkə klublarının bir maliyyə mənbəyində birləşməsi əvvəl-axır fəsada səbəb olacaq. Həm ağır maliyyə yükü, həm də idarəetmədəki problemlər belə deməyə əsas verir.
Premyer Liqadan “Neftçi” və “Sumqayıt”ın dolayısı ilə, “Kəpəz”lə “İnter”, eləcə də diviziondan 6 klubun birbaşa SOCAR-dan maliyyələşməsi bu qurumun üzərində böyük yükdü. Şirkətin AFFA-nın da əsas himayəçisi olduğunu nəzərə alsaq, şirkətdə yaranan hər xırda problem özünü ilk növbədə futbol təsərrüfatında büruzə verir.
Elə bu üzdəndi ki, ölkə klublarında yaranan problemlər oxşar olur. Maliyyə axını dayanan kimi və ya hər hansı gecikmə olanda bütün klublar bunu eyni dərəcədə hiss edir.
“İnter”də maaşların yubanması, futbolçuların hətta fevralın əməkhaqqını almaması hamıya bəllidi, bunu rəhbərlik də etiraf edir. Eyni hal “Zaqatala”, “Mil-Muğan” kimi divizion klublarında da mövcuddu. Etiraf etməsələr də, bildiyimizə görə, “Neftçi”, “Kəpəz” və “Sumqayıt” da gecikmələrin əsiridi.
Bir anlıq SOCAR-ın ümumiyyətlə, yatırım edə bilməyəcək duruma düşməsini təsəvvür edin. O zaman divizionda yarış iflic olar, eltada əksər klublar yarıyolda dayanar. Hələ ki, belə bir durum yoxdu və klublar pis-yaxşı yola davam edirlər. Lakin sabahı indidən düşünmək lazımdı. İş adamlarını bu sahəyə cəlb etmək, onları futbola investisiya qoymağa hansısa güzəştlər sayəsində həvəsləndirmək lazımdı.
“Qarabağ” və “Qəbələ” hazırda iş adamlarının sayəsində ayaqdadı. Elə ölkə futbolunun üzünü ağ edən də bu klublardı. Futbolun inkişafını istəyiriksə, onlara dəstək verilməli, belə klubların çox olmasına çalışılmalıdı. Əks halda, tezliklə ölkə çempionatı gözünü bir maliyyə mənbəyinə dikən klublar yığınına çevriləcək.
CAVAD