Təbriklər, "Qarabağ"! Təşəkkürlər, "Qəbələ"!

Topaz Premyer Liqasında daha bir mövsümün sonuna çatırıq. Hələ bitimə daha 2 tur var, 8 oyun izləyəcəyik, amma çempion da bəllidi, digər mükafatçılar da.

"Qarabağ" layiq olduğu çempionluğu 26-ı turda rəsmiləşdirdi. "Kəpəz"in "Qəbələ"ni yenməsinin ardından ağdamlılar "İnter"i darmadağın edib, arzusuna çatdı. Həm də ardıcıl 4-cü qızıl medalla ölkə rekordunu təzələyən Qurban Qurbanovun yetirmələri taxtda qalmağı bacardı.

8 komandalı, iddialı komandanın az olduğu Azərbaycan çempionatında qalib olmaq bəlkə də böyük uğur sayılmaz. Amma bu, tarixdi və "Qarabağ" istənilən halda, hamıdan yaxşı olduğunu isbatladı. "Atlılar" Qurbanovun vaxtındakı çempionluqlarından ən zövqsüzünü yaşadı. Çünki bu heyət əvvəlkilərlə müqayisədə ən zəifi, oyun planında bəlkə də ən axsağı idi. Lakin bu da hədəfə çatmağa əngəl olmadı.

"Qarabağ" istəyinə birnəfəsə çatmadı. Ağdamlılar "Qəbələ"nin timsalında ciddi rəqiblə mübarizə apardı və yalnız daha təcrübəli olması üzündən ən incə məqamlarda, həlledici anlarda hədəfdən yayınmadı. Söz-söhbətlər, qalmaqallar, narazılıqlar arxada qaldı və heç biri ağdamlıların 1-ci pillədə dayanmasının səbəbi deyil. "Qarabağ" əsas rəqibləri ilə matçlarda xeyli xallar itirsə də, digərlərinə acımadı, xalları topladı və zirvədə qaldı. Bu komandanı yalnız təbrik etmək və avrokuboklarda uğur arzulamaq lazımdı.

Elitayla vidalaşmasına baxmayaraq, AZAL, eləcə də "Sumqayıt", "Kəpəz" və "Zirə" çempionun müəyyənləşməsində böyük rol oynadı. Bu komandalar "Qarabağ"la müqayisədə "Qəbələ"dən daha çox xal qopardılar. "İnter" isə əksinə, ağdamlılara cəmi 4 xal verdiyi halda, Roman Qriqorçukun yetirmələrinə qarşı bir o qədər uğurlu ola bilmədilər. Beləcə şəxsi oyunlarda ağdamlılardan üstün olan "Qəbələ" məhz digər oyunlardakı büdrəmələrə görə gümüş medallarla kifayətləndi.

Qışdan, xüsusilə "Qarabağ"ın heyətindəki ciddi itkilərdən sonra çempionluğa inamı artan "Qəbələ" bəlkə də gec ayılmasına, mövsümün əvvəlində daha güclü heyət formalaşdırmadığına görə qızıl medalları qazana bilmədi. Komandanın oturmuş heyətinin olmaması, aparıcı fiqurların dəyişməsi də hədəfdən yayınmanın səbəblərindən biridi. Xüsusilə aparıcı yerli oyunçuların azlığı həlledici məqamlarda sözünü dedi. Cavid Hüseynovdan məlum səbəblərdən lazımınca istifadə edə bilməyən "Qəbələ"yə təcrübə azlığı da mane oldu.

Bütün bunlara baxmayaraq, "Qəbələ" son turlara kimi "Qarabağ"a layiqli rəqib kimi diş göstərdi. Bəlkə də Qriqorçukun yetirmələrinin sayəsində Premyer Liqada intriqa son turlaradək qaldı, ağdamlıların diqtəsini görmədik. Ölkə futboluna fərqlilik gətirdiyinə görə də ildən-ilə nəticələrini yaxşılaşdıran əyalət təmsilçisinə təşəkkür düşür. Yola davam etmək, əldə olanı qorumaq və daha da böyümək üçün bünövrəni zədələmədən ciddi əlavələr etmək lazımdı.

İndi ölkənin 2 ən güclü komandasını kubokun final matçı gözləyir. Son turlardakı formal oyunlarda hər iki komanda Naxçıvandakı dueli düşünəcək. Nəticə nə olursa-olsun, hər iki kollektivin ölkə futbolunda çəkisi var və onlar dəbi müəyyənləşdirən kollektivlərdi. Hər ikisini qorumaq, dəstək olmaq, avrokuboklarda yenə yanaşı zəfərə yürüdüklərini görmək lazımdı. Çempionluğa görə "Qarabağ"a təbrik, layiqli mübarizəyə görə "Qəbələ"yə təşəkkür düşür.

AĞA