Layihə
AFFA UEFA-ya necə hesabat verir?
UEFA-nın milli assosiasiyalar üzrə koordinatoru Mariya Arxangel…
UEFA-nın milli assosiasiyalar üzrə koordinatoru Mariya Arxangelskaya AFFA-nın maliyyə hesabatının analiz edilməsi məqsədi ilə Bakıda işgüzar səfərdədir. Qonaq AFFA-nın Mərdəkan qəsəbəsindəki Futbol Mərkəzində milli komandalar üçün inşa olunmuş təlim-məşq bazası ilə də tanış olub.
Bu təftiş təsadüfi deyil, zaman-zaman belə yoxlamalar aparılır. UEFA ayırdıqları maliyyənin təyin olunan istiqamətlər üzrə necə sərf olunduğuna diqqət yetirir. Burada hansısa problem də yoxdu. AFFA yəqin ki, bütün sənədləri qaydasına salıb və qonaqlar da razı yola salınacaqlar.
Bizim üçün maraqlı olan UEFA-ya təqdim olunan hesabatla AFFA-nın ictimaiyyətə açıqladığı hesabatın eyni olub-olmamağıdı. “Futbolinfo” yerli assosiasiyanın açıqladığı hesabatda bir sıra pozuntular aşkarlayıb, bunu silsilə yazılarla oxuculara çatdırmışdı. Həmin hesabat UEFA-dan gələn qonaqlara da təqdim olunsa, ortaya mütləq problemlər çıxacaq. Amma yəqin ki, AFFA-dakılar işini ehtiyatlı tutmuş olar.
Yeri gəlmişkən, biz məlum hesabatla bağlı AFFA-ya müraciət edib, detallı izahat istəmişdik. Çünki bir çox xərclərdə şübhələr var idi. AFFA-nın balansında olan idman qurğularına xərclənən vəsait, eləcə də bir sıra digər xərclər reallıqdan uzaq idi. Lakin bugünədək müraciətimizə rəsmi cavab almamışıq. AFFA-nın mətbuat katibi Mikayıl Nərimanoğlu əməkdaşımızla söhbətində detallı hesabatı açıqlamağın mümkün olmadığını bildirib. Halbuki AFFA ictimai təşkilatdı və şəffaf fəaliyyət göstərməyə məcburdu. Bununla belə, qurum bildiyini edir və müraciətləri vecinə almır.
UEFA nümayəndələri Bakıda ikən, saytımız vasitəsilə bir daha AFFA-dan geniş hesabat verməsini, qaranlıq qalan məsələlərə aydınlıq gətirməsini tələb edirik. Şişirdilmiş məbləğlərlə göstərilən və AFFA rəhbərliyinə yaxın şirkətlərə həvalə edilən işlərin təfsilatlı hesabatına ehtiyac var. Biz İspaniyada villa sahibi olan AFFA işçisi xanımın qazancının detallarını istəmirik, istədiyimiz büdcənin hara xərclənməsinin detallı açıqlamasıdı.
Bilmək istəyirik ki, başqa klublar özlərinə məxsus stadionların qazonunu 1000 manata ideal səviyyədə saxladığı halda, nəyə görə “Agrosport” aylıq 15 min manat alaraq, AFFA-nın balansındakı “Dalğa Arena”ya, “Bakcell Arena”ya normal qulluq edə bilmir? Ümumiyyətlə, nəyə görə belə bahalı müqavilələr imzalanıb, ölkədəki sosial-iqtisadi durum niyə nəzərə alınmayıb, alternativ variantlar niyə axtarılmayıb, SOCAR-ın pulu niyə dağıdılıb?
Bilmək istəyirik ki, keytrinq xidmətinə görə bir oyuna 8000 manat xərclənməsi nə qədər realdı. Bu, UEFA-dan gələnlərə də maraqlı olmalıdı. Çünki 17 yaşlıların qıtə çempionatının xərclərinin əsas hissəsini bu qurum çəkmişdi.
Bilmək istəyirik ki, 17 günlük yarışa görə xərclənən 958 min manatlıq hotel xərcləri həqiqətə nə qədər uyğundu? Gündəlik 56 min manat xərc görəsən, UEFA-nın təcrübəsində olubmu?
Bilmək istəyirik ki, püşkatmaya 157, açılış mərasiminə 379, bağlanışa 114 min manatın sərf edilməsinin yazılı açıqlaması necədi?
Bilmək istəyirik ki, nəqliyyat, təbliğat və s. bəndlər altında gizlədilən 1 miyon manatlıq vəsait UEFA nümayəndələrinə necə izah olunur?
Biz bu sualları UEFA nümayəndələrinə, müvafiq dövlət orqanlarına ünvanlamamış AFFA-dan cavab gözləyirik. Bu qədər təmiz işləyirsizsə, hesabatı təqdim edin, qorxursunuzsa, dövlətin pulunu yemisizsə, bunun da cəzasını çəkməlisiz. Məqamdı, şəffaf işlədiyinizi göstərin. Susmağınız, gizlətməyiniz qüsurlu olmağınızı ifşa edir.
AĞA
- Ölkə futbolu2024-04-25 12:30
AFFA-dakı yoxlamaların nəticəsi: “Sumqayıt”ın prezidenti dəyişəcək
- Ölkə futbolu2024-04-25 17:10
Klublar çətin vəziyyətdə: AFFA yardımları dondurub
- Ölkə futbolu2024-04-26 08:00
Juninyo – Avropanın ən yaxşı braziliyalısı
- Ölkə futbolu2024-04-25 09:04
11 illik “Qarabağ” tilsimi davam etdi