Ölkə futbolu
Vahabzadə heyəti Prosineçkinin məsləhəti ilə müəyyənləşdirib
“Mayın 1-dən təlim-məşq toplanışına başlamışıq. D&uu…
“Mayın 1-dən təlim-məşq toplanışına başlamışıq. Düzdü, arada 3-4 günlük də bir araya gəlsək də, tam heyətlə toplana bilməmişik”. Futbolinfo.az saytının məlumatına görə, bu sözləri 23 yaşadək futbolçulardan ibarət Azərbaycan millisinin baş məşqçisi Yaşar Vahabzadə deyib.
Yığmamız mayın 8-də start götürəcək İslam Həmrəyliyi Oyunlarına hazırlığını davam etdirir. Vahabzadə bu gün təşkil etdiyi mətbuat konfransında komandanın hazırkı durumundan və qarşıya qoyulan hədəflərdən danışıb.
Hazırlığın gedişindən razılıq bildirən baş məşqçi komandanın tam tərkibdə olmamağından gileylənib: “Hələlik 16 futbolçu ilə gündə 2 dəfə hazırlıq keçirik. Uşaqlar yarışın məsuliyyətini dərk edirlər. Ona görə də hər birimiz turnirə ciddi hazırlaşırıq. Əsas çətinlik bəzi futbolçularımızın bizimlə birgə olmamasıdı. Onlar da Azərbaycan kubokunun finalında qarşılaşacaq “Qarabağ”la “Qəbələ”nin futbolçularıdı. Həmin oyunçular mayın 6-da komandaya qoşulacaqlar”.
Vahabzadə turnirdə ilk hədəflərinin qrup səddini aşmaq olduğunu vurğulayıb: “Mətbuatdan da oxumuşuq ki, artıq oyunlarımıza bilet qalmayıb. Əsas məqsədimiz yaxşı oynamaq və qrupdan çıxmaqdı. Bundan sonrasına həmin vaxt baxarıq”.
U-23-ün çalışdırıcısı 23 yaşdan yuxarı futbolçuların seçimi zamanı əsas yığmadakı həmkarı Robert Prosineçki ilə məsləhətləşdiyini bildirib: “Millinin futbolçularının U-23-də oynaması üçün Robert Prosineçkinin icazəsi olmalıdı. Çünki onları bizim üçün vacib olan Şimali İrlandiya ilə oyun gözləyir. Mən bir məşqçi kimi həmin komandadan çox futbolçu istəyərdim. Amma onların da hazırlığını nəzərə alaraq, Kamran Ağayevlə bağlı bu mövqedə qaldım. Ruslan Abışova gəlincə, Prosineçki ilə də məsləhətləşdik ki, müdafiədə bir lider futbolçu kifayətdi. Abışovun İslamiadanın səfiri olmasının heyətə düşüb-düşməməsinə heç bir təsiri yoxdu”.
“Qarabağ” və “Qəbələ” mayın 5-də ölkə kubokunun finalında qarşılaşacağından, bu komandaların üzvləri kollektivə gec qoşulacaqlar. Vahabzadə bu amilin sistemin formalaşması baxımından mənfi təsir edəcəyini etiraf edib. Ancaq o, həmin oyunçuların heyətə hazır vəziyyətdə qatılacaqlarına ümid edir: “Əlbəttə ki, sistemi tam formalaşdırmaqda problem olacaq. Amma həmin futbolçuların hamısı öz klubunda müntəzəm məşq edib və yığmaya hazır gələcək. Düşünürəm ki, fiziki durumları da qaydasında olacaq. Üstəlik, bir çoxunun təcrübəsi var. Rəşad Sadiqov, Tellur Mütəllimov, həmçinin “Qarabağ”da çıxış edən futbolçular mövsümboyu oynayanlardı. Düzdü, bir az çətinlik olacaq. Müdafiədən hücuma çıxmaqda Rəşad Sadiqovun təcrübəsinə böyük inamım var. İki gün vaxtımız olacaq. Çalışacağam ki, bu müddətdə komandanı ilk matça tam şəkildə hazırlayaq”.
Yaşar Vahabzadə Premyer Liqanın bombardiri olan “İnter”in hücumçusu Rauf Əliyevin kənarda qalmasına da aydınlıq gətirib. O, hücumda bacarıqlı gənclərin olduğunu əsas gətirərək, bu addımı atdığını deyib: “İlkin heyətə “İnter”dən oyunçular çağırmışdım. Ancaq zədəli olduqları üçün komandaya qoşula bilmədilər. 3 nəfər yaşlı futbolçu seçmək hüququm var idi. Mirabdulla Abbasov “Sumqayıt”ın heyətində çox yaxşı mövsüm keçirdi. Mahir Mədətov da gənc və perspektivli futbolçudu. Oyunu ilə yığmaya dəvət almağa layiq olduğunu düşünürəm. Bu üzdən limiti hücum xətti üçün ayırmaq istəmədim”.
Çalışdırıcı komandamızın qərarlaşdığı qrupu da dəyərləndirib. O, ilk görüşün Kameruna qarşı olmasının çətinliyindən də danışıb: “Düzdü, rəqibləri hələ görməmişik. Amma ad baxımından ən çətin komandalar bizə düşdü. Adətən, ilk oyunlar çətin keçir. Çünki futbolçularda həyəcan olur. Kamerun yığmasının ayın 5-də “Sumqayıt”la yoldaşlıq görüşünü izləyəcəm. Səudiyyə Ərəbəstanı və Mərakeşin oyununu da ilk turda görəcəyik. Ümumiyyətlə, rəqiblərin kimliyindən asılı olmayaraq, bütün qarşılaşmalarda öz bacarığımızı nümayiş etdirməyə çalışacağıq. Qrupumuzdakı komandaların heyətlərinə nəzər yetirmişik. Çağırılan oyunçuların adları elə də tanış deyil. Amma bildiyim qədərilə Kamerunun heyətində “Monako”, “Kayzerslautern” kimi klublardan oyunçular var. Bakıya skautların da gələcəyini nəzərə alsaq, o futbolçuların məhz bu turnirdən sonra daha da populyarlaşacaqları istisna deyil” (apasport).