Ölkə futbolu
46-cı ölü
Fəaliyyətini dayandırdığı rəsmən açıqlanan AZAL Peşə…
Fəaliyyətini dayandırdığı rəsmən açıqlanan AZAL Peşəkar Futbol Klubunun ömrü 21 il sürüb. 1996-cı ildə Azərbaycan Beynəlxalq Gənclər Komitəsi (AMMK) eyniadlı futzal klubu yaradıb. Hazırda menecer fəaliyyəti ilə tanınan Kamil Məmmədovun təsisçisi və prezidenti olduğu klub 2004-cü ilə qədər kiçik meydanlarda mübarizə aparıb. Komanda hətta avrokuboklarda, UEFA kubokunda da mübarizə aparıb.
2004-cü ildə klub yaşıl meydanlara “köçüb”. Həmin vaxt I dəstədə çıxış edən U-17 ilə birləşən AMMK Şakir Qəribovun baş məşqçiliyi altında aşağı liqada mübarizəyə başlayıb. Məhz birləşmə ilə futbol həyatına başlayan klub 13 il sonra “Zirə”yə birləşmə ilə fəaliyyətinə son verib.
İlk mövsümdə güclülər dəstəsinə yüksələn komanda rəhbərliyini, təsisçilərini, adını, bir sözlə, hər şeyini dəyişdi. 2005-ci ildə “Xəzər Lənkəran”la qarşılaşma (0:2) ilə Premyer Liqa tarixinə start verən “Olimpik” adı altında çıxışlara başladı.
Tarixinin ən uğurlu mövsümü 2007/08 olan paytaxt təmsilçisi uzun müddət lideri olduğu yarışın qızıl medallarını son turda “Qarabağ”a uduzmaqla əldən verib. Gümüş mükafatçı 2008/09 mövsümündə UEFA kubokunda qüvvəsini sınayıb və ilk cəhddə Serbiya “Voyvodina”sına yenilib – 0:1, 1:1.
2009-cu ilin yayında adını yenidən dəyişən klub bu dəfə “Olimpik-Şüvəlan”a çevrilib. Amma bir ildən sonra yenidən adını dəyişən paytaxt təmsilçisi bu dəfə AZAL-a dönüb (apasport).
Lakin bu komanda ötən əsrin 90-cı illərinin əvvəllərində fəaliyyət göstərən AZAL deyil, eyni adda ikinci klub kimi tarixə düşüb.
2010/11 mövsümündə 4-cü olan bakılılar Avropa Liqasına yüksəlib. 2011-ci ilin yayında “Minsk”lə görüşlər də avrokubok qələbəsi gətirməyib – 1:1, 1:2. Maraqlıdı ki, UEFA AZAL-ın şirkət adı olması səbəbindən klubu “Olimpik” olaraq tanımaqda davam edib. Bu, bakılıların 4 matçlıq avrokubok macəralarının sonuncusu olub ki, 2 heç-heçəsi olan komanda eyni sayda məğlubiyyət alıb.
Bundan sonrakı illərdə çempionatda nəticələri enişə doğru gedən AZAL ciddi nailiyyət əldə etməyib. Ümumiyyətlə, 2005-ci ildən başlayan 12 mövsümlük elita macəraları 362 oyundan ibarət olub. Bu müddətdə 127 qələbə qazanan komanda 104 heç-heçə edib və 131 dəfə uduzub. Paytaxt təmsilçisi 379 qol vurubsa, 380 top buraxıb.
Premyer Liqadakı 12 mövsümdə komandanı Stepan Çordaş, Peter Kurçubiç, Əsgər Abdullayev, Nazim Süleymanov, Elxan Abdullayev, Rafiq Mirzəyev, Vaqif Sadıqov və son 3 mövsümdən artıq dövrü bu postda keçirən Tərlan Əhmədov çalışdırıb.
AZAL ölkə kubokunda ən yaxşı halda yarımfinalda oynayıb. Bu da 2009/10 və 2010/11 mövsümlərinə təsadüf edib.
Qeyd edək ki, AZAL Azərbaycan klublarının “qəbiristanlığında” yeni simadı. İndiyədək Premyer Liqada oynamış 58 komandadan yalnız 12-si peşəkar fəaliyyətini davam etdirir. AZAL güclülər dəstəsinin 46-cı ölüsüdü.
- Ölkə futbolu2024-04-30 09:15
“Qarabağ” Avropada 2-ci yeri bölüşdürür
- Ölkə futbolu2024-04-29 08:00
Avrokuboka vəsiqə üçün vacib qələbələr: Sumqayıtda hakimlər də iş başında idi
- Ölkə futbolu2024-04-29 09:25
“Nitsa” Benzianı istəyir
- Ölkə futbolu2024-04-30 15:31
Riad Rəfiyevin çempionatı: hakimlər qışdan bəri “Sumqayıt”a 8 xal hədiyyə edib