AFFA-nın yeni tərəfdaşı: bahalı anlaşmanın səbəbləri

AFFA yeni müqaviləyə hazırlaşır. Qurum milli komandalarımızı geyindirmək üçün "Nike" ilə anlaşma ərəfəsindədi. "Futbolinfo"nun əldə etdiyi məlumata görə, artıq bu geyim firması ilə danışıqlar yekunlaşıb və bütün milli komandalarımız tezliklə "Nike" geyinəcək.

Ölkədəki ağır iqtisadi durumu, maliyyə çatışmazlığını nəzərə alsaq, AFFA-nın birdən-birə dünyanın ən məşhur geyim şirkətlərindən biri ilə əməkdaşlığı müəmmadı. Daha ucuz variantlar varkən, futbolçularımızın brend məhsullar geyməsi bu qədərmi vacibdi? İndiyə qədər əməkdaşlıq edilənlərdən qəfil imtinanın səbəbi nədir?

Kiçik araşdırmadan sonra əsl səbəbi tapa bildik. Məlum oldu ki, futboldan şəxsi biznesi üçüm yararlanan AFFA rəhbərliyi, xüsusilə də baş katib Elxan Məmmədov geyim bazarını da bir əldə cəmləşdirir. Yeni mövsümdən bütün milli komandalarımız, həmçinin AFFA-dan maliyyələşən Premyer Liqa klubları – "İnter", "Neftçi", "Sumqayıt", "Kəpəz" və "Səbail" eyni firmaya müraciət edəcək. Təbii ki, say çoxluğu müəyyən endirimə və güzəştlərə səbəb olacaq. Lakin bu güzəştlərin kimsəyə xeyri olmayacaq. Büdcədən saya uyğun maliyyə ayrılacaq, endirimlər isə bir qrup insanın mənafeyinə xidmət edəcək.

Bəs, niyə "Nike"? Çünki brend mallar daha qiymətli olur və ondan daha çox qazanmaq imkanı yaranır. AFFA-nın xərclərinin artması, dövlət büdcəsinin talanması heç kimin vecinə deyil, təki öz cibləri dolsun.

Maraqlıdı ki, bu, monopolistlərin ilk belə cəhdi deyil. AFFA-nın balansında olan stadionlara qulluq göstərən "Agrosport"dan eyni məqsəd üçün istifadə olunur. "Qarabağ", "Qəbələ" kimi klublar hər hansı meydanın saxlanılması üçün illik 10-15 min manat sərf edirsə, "Agrosport" "Dalğa Arena"nın, "Bakcell Arena"nın təkcə qazonunun yaşıl qalması üçün 180-200 min manat vəsait alır, Olimpiya stadionunda bu məbləğ daha yüksək hesablanır.

Bunda əsas məqsəd məhz şəxsi qazancın artırılmasıdı. AFFA-nı idarə edənlər tender elan etmir, onlara bağlı olmayan şirkətləri yaxına buraxmır, belədə saxta "ən yaxşı" adı ilə ən bahalı xidmətlərdən faydalanırlar. Bu, təkcə geyim və ya qazon biznesində deyil, digər xidmətlərdə də belədi.

"Nike" ilə əməkdaşlıq da buna hesablanıb. AFFA-nın faktiki rəhbərliyi şəxsi biznesini zənginləşdirməkdən doymur və hər gün özləri üçün yeni imkanlar yaradırlar. "Obyekt" özlərinin, vasitəçilər özlərinin – dövlətin pulu dağıdılsa da olar…