Ölkə futbolu
“Neftçi”nin şərikli transferləri
Qızın iki adaxlısı olduğunu eşitmişdik, futbolçunun eyni…
Qızın iki adaxlısı olduğunu eşitmişdik, futbolçunun eyni vaxtda fərqli klublarla anlaşdığını da gördük. Özü də ikisi birdən və hər ikisində də eyni klubun imzası var.
“Neftçi” həm Səlahət Ağayev, həm də Elvin Məmmədovla anlaşıb. Lakin qəribə olan onların heç birinin bakılılara qoşulmayacağıdı. Peşəkarlıqdan uzaq olmağın nəticəsidi ki, baş məşqçi Elxan Abdullayev onların heç birini komandanın ilk toplanışına şağıra bilməyəcək.
Elvin ümumiyyətlə, əlçatmazdı. Bu futbolçu ilə bağlanan müqavilə yalnız kağız parçasıdı. Məmmədov “Neftçi” ilə ayı 5000 manat olan müqaviləni imzalayan kimi “Qəbələ” daha yaxşı şərtlərlə ona üz tutub. Həm 8000 minlik maaş, həm avrokubokda oynamaq perspektivi, həm də daha peşəkar məşqçi ilə çalışmaq – bütün bunlar yarımmüdafiəçinin 2 gün öncə anlaşdığı paytaxt təmsilçisindən vaz keçməsi üçün yetərli oldu.
Bəs, “Neftçi” niyə Məmmədovu saxlamağa cəhd etmədi? Axı, əldə müqavilə var idi və notarial qaydada təsdiqlənməsə də, futbolçuya mane ola bilərdilər.
Bildiyimizə görə, Elvinə bu işdə milli komandanın inzibatçısı İslam Abbasov kömək edib. Onun bircə zəngi klub rəhbərliyinin Məmmədovu sərbəst buraxması üçün kifayət edib. Paytaxt klubunda da yeni vəzifəyə təyinat almış bu şəxs yığmada bir yerdə çalışdıqları Elxan Abdullayevlə nə danışıb, nə bölüblərsə, yarımmüdafiəçidən rahatca imtina ediblər. Təsəvvür edirsiz: adlı-sanlı adamların toplaşdığı Müşahidə Şurası, klubun rəhbər şəxsləri yox, yığmanın inzibatçısının zəngi ilə.
“Neftçi”də digər qeyri-peşəkarlıq nümunəsi Səlahət Ağayevlə bağlıdı. Klub bu qapıçı ilə anlaşıb, amma o, avrokubokda sabiq klubu “İnter”ə kömək edəcək. Kəsəsi, toplanışı bir komanda ilə keçirib, çempionatda digərinin heyətində oynayacaq.
Maraqlıdı, “Neftçi” başbilənləri “İnter”in avrokubokda ilk mərhələdəcə dayanacağına bu qədərmi əmindi? Bəs, “bankirlər” 1-2 mərhələ keçsə, qrupa düşsə, necə olacaq? Həmin vaxt qapıçını “İnter”in əlindən alsalar, transfer etmək hüququ olmayan həmşəhərliləri çarəsiz qalacaq, Səlahətin Zaur Svanadzenin yanında qalmasına göz yumsalar, özləri çətin vəziyyətə düşəcək. Burada qeyri-peşəkar davranan təkcə “Neftçi” deyil, “İnter” də eyni bulaqdan su içir.
“Neftçi” hələlik son mövsümlərdəki uğursuzluqlardan dərs çıxarmamışa bənzəyir. Allah axırını xeyir etsin.
FƏRİD