Ölkə futbolu
Prosineçki AFFA rəsmilərinə acıqlandı: "Siz məni ələ salırsız?"
Azərbaycan millisi DÇ-2018-nin seçmə mərhələsində …
Azərbaycan millisi DÇ-2018-nin seçmə mərhələsində Şimali İrlandiya ilə ev oyununun çalışmalarını davam etdirir. Bakıda 4 günlük hazırlıqdan sonra Robert Prosineçki komandanı mayın 20-də Avstriyaya aparıb.
Xorvatiyalı mütəxəssis hələ tam heyətlə toplanış keçə bilmir. Buna səbəb bəzi futbolçuların sonradan düşərgəyə gəlməsidi. Bu da ilk növbədə ölkədən kənarda çıxış edənlərdə bağlıdı. Almaniyanın II Bundesliqasında "Aue"nin formasını geyinən yarımmüdafiəçi Dmitri Nazarovla hücumçu Renat Dadaşov ötən gün məşqlərə qoşulub. "Boavişta"da mövsümü bitirən yarımmüdafiəçi Emin Mahmudov da hazırda burdadı.
Prosineçki hazırda 2 futbolçunun yolunu gözləyir. Bunlar müdafiəçi Pavel Paşayev və yarımmüdafiəçi Eddi İsrafilovdu. Slovakiya çempionatında mövsümü bitirən Ramil Şeydayev dünən Avstriyaya gəlibsə, Ukrayna Premyer Liqasında "Stal"ın heyətində sezonu başa vuran Paşayev bu gün özünü toplanış məkanına yetirəcək.
Sıraya ən gec qoşulan İsrafilov olacaq. Eddinin çıxış etdiyi "Kadis" İspaniya Sequndasında 4-cü yerdə gedir və Primeroya vəsiqə uğrunda mübarizə aparır. Komandanın çempionatda 2 oyunu qalıb ki, bunlardan biri iyunun 4-ü evdə "Elçe"ylədi. İsrafilov məhz matçın ertəsi – iyunun 5-də millimizə qoşulacaq.
Həmin vaxt Avstriya təlim-məşq toplanışı bitəcək və Prosineçki oyuna son 5 gündə hazırlığı yenidən Bakıda keçirəcək. Eddi onda yığmamızın sıralarında olacaq. "Kadis" çempionatı iyunun 11-də "Vayladolid"lə səfər matçı ilə bitirəcək ki, İsrafilov həmin qarşılaşmada klubunda olmayacaq.
Azərbaycan – Şimali İrlandiya görüşü iyunun 10-da Tofiq Bəhramov adına Respublika stadionunda keçiriləcək. Deyəsən, millimiz britaniyalılarla vacib duelədək oyun praktikası qazanmayacaq. Prosineçki Avstriyada minimum 2 yoxlama matçı keçirmək istəsə də, AFFA-nın bu sahəyə məsul şəxsləri baş məşqçinin tapşırığını yerinə yetirə bilməyib.
Balkanlı mütəxəssisə həvəskar yerli klublarla qarşılaşmaq məsləhət görülsə də, o, bundan qətiyyətlə imtina edib: "Bu, nə deməkdi? Siz məni ələ salırsız?".
Prosineçki həmin gün oteldə kimsəni danışdırmayıb, siqaret və pivə ilə başını qarışdırıb (sportinfo).