Müsahibə
Eldəniz Yusifov: "Neftçi"nin dəvətini geri çevirmək düzgün olmazdı"
Uzun müddət AZAL-da çalışan həmkarımız Eldəniz Yusi…
Uzun müddət AZAL-da çalışan həmkarımız Eldəniz Yusifov artıq "Neftçi" ilə anlaşıb. Futbolinfo.az xəbər verir ki, adıçəkilən şəxs bundan sonra "ağ-qaralar"ın aşağı yaş qrupları üzrə əlaqələndiricisi vəzifəsində fəaliyyətini davam etdirəcək. Birinci dəstəyə göndərilən AZAL isə orada yeni, "Şüvəlan" adı ilə çıxış edəcək.
Yusifov yeni işi ilə bağlı müsahibə verib. Həmin müsahibəni təqdim edirik:
– Eldəniz bəy, "Şüvəlan"dan tam olaraq ayrıldızmı?
– "Neftçi"nin akademiyasında baş koordinator kimi çalışacam. Ayın 1-dən etibarən "Şüvəlan"dan ayrılıram. Rəhbərliklə də görüşmüşük. Fikrimi bildirmişəm. Düzdü, Premyer Liqada 13 il işlədim. Amma xahiş etdim ki, belə bir təklif var və dəyərləndirmək istəyirəm. Sağ olsunlar, başa düşdülər, halallıq aldım. Dostluğumuz qüvvədə qalır, münasibətlərimiz davam edir. Amma iş başqa şeydi. Artıq fəaliyyətimi başqa komandada davam etdirəcəm.
– "Şüvəlan"da qalmağı təklif etmişdilər?
– Əlbəttə, təklif etdilər. Amma fikrimi əsaslandırdım ki, "Neftçi" elə "Neftçi"di. Hər dəfə ələ belə şans düşmür. "Neftçi" rəhbərliyi də sağ olsun ki, mənə və Rüstəm Əfsərliyə (klubun yeni mətbuat katibi) təklif etdilər. Onların dəvətini geri çevirmək olmazdı. Vaxtilə o insanların əksəriyyəti ilə bir yerdə işləmişik. Beləcə ayın 1-dən etibarən bu klubda fəaliyyətə başlayacam.
– Əsas işiniz nədən ibarət olacaq? Şəxsən qarşınıza hansı məqsədləri qoyublar?
– Ayın 1-dən etibarən bu məsələlər haqda danışacağıq. Təbii ki, müəyyən vəzifələr, iş səlahiyyətlərim olacaq, tapşırıqları yerinə yetirəcəm. İşə başlayandan sonra bunları tam təfərrüatı ilə müzakirə edəcəyik. Bəzi şeyləri aydınlaşdırmağa ehtiyac var. Fikirləri dinləyəcəm. Müəyyən məqsədlər uğrunda çalışacağıq. Bu gün üçün əsas odu ki, yeni iş yerim bəllidi.
– AZAL-da əsasən mətbuat katibi kimi çalışırdız. "Neftçi"nin təklif etdiyi sahədə təcrübəniz varmı? Çətin olmayacaq?
– AZAL yaranan gündən vəzifəm olub. İşim elə idarəetmə idi. Menecer kimi çalışmışam. 2010-cu ildən bəri klubda faktiki menecer kimi fəaliyyət göstərirdim. Həm Təşkilati İşlər Üzrə Menecer idim. Həm klubun akademiyasında aşağı yaş qruplarının, eyni zamanda əsas və əvəzedici komandanın fəaliyyətini əlaqələndirirdim. Bundan əlavə lisenziyalaşdırma üzrə məsul şəxs idim. Yəni futbolda bildiyiniz, təsəvvür etdiyiniz bütün təşkilati işlərlə məşğul idim. Yəni, bu sahədə böyük təcrübəm var. İstənilən məqamı qiymətləndirə bilərəm, təcrübə toplamışam. Bildiyim sahə olduğu üçün çətinlik yoxdu. Sadəcə, müəyyən uyğunlaşma var. Klubun tələblərini bilmək, infrastruktur imkanlarına uyğun iş görmək üçün zamana ehtiyac var. Yəqin ki, çox zaman tələb olunmayacaq. "Neftçi" böyük, tarixi olan klubdu, hər halda tələbi buna uyğun olacaq. İstənilən məsələyə yanaşma tərzi də fərqlidi. Ən azı klubun zəngin keçmişi bunu tələb edir. Hazırkı durumu qiymətləndirib, ona uyğun tapşırıqları yerinə yetirəcəyik.
– "Neftçi"dən başqa təkliflər vardı?
– Açığı, əvvəllər vardı. Amma son vaxtlar, ayın 3-ü AZAL fəaliyyətini dayandıranda təklif yalnız "Neftçi"dən gəlmişdi.
– Təkliflər AZAL-da gördüyünüz eyni işlə bağlı idi? "Neftçi" klubda mətbuatla bağlı iş təklif etmişdi?
– Öz fikrimi bildirmişdim ki, yenidən mətbuat sahəsinə qayıtmaq istəmirəm. Odu ki, buna uyğun başqa təklif etdilər və razılaşdım.
– Maraqlıdı, yenidən mətbuat xidmətində niyə çalışmaq istəmirsiz?
– Açığı, mən 2010-cu ildən bəri mətbuat katibi kimi fəaliyyət göstərmirdim. Bür müddət Rüstəm Əfsərli, daha sonra Elvin Yaqubov AZAL-da bu işlərlə məşğul oldu. Bu sahədən bir qədər uzaq düşmüşdüm. Həm də idarətmə mənim marağımı daha çox çəkən sahədi. Özüm də Dövlət İdarəçilik Akademiyasını bitirmişəm. Bəlkə də aldığım təhsildən irəli gələn bir işdi ki, məndə idarətməyə bağlılıq var. Bu sahəni də mətbuat vasitəsi ilə tanımışam. Bu sırf mətbuatı istəməməyim anlamına gəlmir. Yəni, mətbuatdan bir qədər uzaq düşdüyüm üçün, "Neftçi" kimi klubda bu sahədə çalışmağım düzgün olmazdı. Belə fəaliyyət heç vaxt uğurlu alınmaz. Ona görə də idarətmə sahəsinə üstünlük verdim. (sport7.az)