Layihə
“Neftçi” həqiqətləri: Elxan Məmmədov adaşını seçim qarşısında qoyacağını vəd etmişdi…
(əvvəli bu linkdə)
Elxan Məmmədov ötən il vəd…
Elxan Məmmədov ötən il vəd vermişdi ki, qışda adaşı seçim etməli olacaq. Belə ki, Abdullayev ya milli komandada işinə davam etməli, ya da “Neftçi”nin baş məşqçi postunda qalmalı idi. 2017-nin 6-cı ayını yaşayırıq və heç nə dəyişməyib.
İndi baş katib bunun izahını verməli, niyə yalan danışdığını əsaslandırmalıdı. AFFA İcraiyyə Komitəsinin üzvü olan Mahir Məmmədovun tapşırığından çıxa bilməməsini də etiraf edə bilər, o zaman biz də Abdullayevi Məmmədov üçün belə əziz edən səbəbi araşdırıb, açıqlayarıq. Dövlətin pulu, komandası kiminsə əyləncəsi naminə perspektivsiz işlərə görə dağıdılmamalıdı. Dövlət, SOCAR yata bilər, lakin mətbuat hələ də ayıqdı.
Elxanın “Elxan sevgisi” onun tapşırılması ilə məhdudlaşa bilməz. Məmmədov onu vəd etdiyi seçim qarşısında qoya bilməyibsə, deməli, öz maraqları da var. Bu barədə daha sonra bəhs edəcəyik.
“Neftçi” həmişə tramplin olub. Adətən bu klubun rəhbərləri sonradan AFFA-ya rəhbər gələr, dövlət srukturlarında vəzifəyə hazırlanardı. Paytaxt klubuna başçılıq etmək nüfuz məsələsi sayılırdı. Lakin indi durum fərqlidi – bu klub o qədər gözdən salınıb ki, hətta Çingiz Abdullayev kimi xalq yazıçısı məhz burada imicini xərcləyir, gözdən düşür. O, böyük oyunların ortasında qalıb – nə oradan çıxmaq üçün kreativ ideyaya malikdi, nə də cəsarətə. Ümumi axına qoşulub və “Neftçi”nin məhv edildiyi cinayət hadisəsində susqun şahid, əlaltı, istifadə ediləndi.
“Neftçi” artıq azarkeş ordusunun tapınağı da deyil. 90-cı illərdə, XXI əsrin əvvəllərində sovet dönəmindən qalan tərəfdarlarının bir qismini qoruyan, ən azı tribunaların yarıyadək dolu olmasına nail olan klub indi skamyalar üçün futbol oynayır. Orta hesabla “Neftçi”nin hər oyununu 400-500 azarkeş izləyir və onların da böyük əksəriyyəti rəqibin fanları olur. Komandanın azarkeşləri küsdürülüb, didərgin salınıb, son turlarda olduğu kimi – oyunları boykot edəcək həddə gətirilib.
Vəziyyət o qədər kritikdi ki, rəqib azarkeşlər “Neftçi”nin ev oyunlarında 80 yaşlı klubu təhqir edəcək bannerlə gəlir və heç kim onlara nəsə deyə bilmir. Yubileyini biabırçılıqla qeyd edən bakılılar hətta sovet dönəmində İrəvanda belə alçaldılmamışdı, amma “Bakcell Arena”da “vaqon”la təhqir edildilər. İndiki “Neftçi” isə o qədər aciz klubdu, o qədər aciz rəhbərliyi var ki, buna etiraz da edə bilmədi. Dilləri qısadı – 8 komanda arasında 7-ci olan 80 yaşlı klubun rəhbərləri heç olmasa, bu sahədə 8 illik iş təcrübəsinə malik olmalıdılar. Amma “Neftçi” dünyanın gəliş-gedişini anlamayan südəmərlərə tapşırılıb, həmin banner açılanda isə onların hansı küncə qısıldığını bilmək çətin deyil.
Təbii ki, belə biabırçılığın qarşısını almaq üçün cəsarət lazımdı. Lakin “Neftçi” rəhbərliyindən heç kimdə bunu görmədik. Onlar hamısı ya postunu qorumaq, maaşını, “konvert”ini itirməmək üçün gizləndi, ya da dağıtdıqları komandaya görə məsuliyyət yükündən qorxduqları üçün üzə çıxmadılar.
“Neftçi”nin bu vəziyyətə salınması bacarıqsızlığın nəticəsidi. Lakin digər tərəfdən buna görə hesabat istənmədiyini, sorğu-sual edilmədiyini görən inhisarçı dəstə fürsəti əldən vermir. Perspektivi olmayan “şuralaşma oyunu”nu bəhanə edib vaxt qazanan, layihənin nəvaxtsa özünü doğruldacağını söyləyən Elxan Məmmədov (halbuki bugünədək baş katibin heç bir layihəsi nəticə verməyib, əvəzində milyonlar dağıdılıb – müəl.) bu durumdan da istifadə edir. Komandanı böhrandan çıxarmaq adı ilə milyonlar xərclənir, nəticənin yaxşılaşacağı vədləri verilir. Və bunu klubun ona heç bir dəxli olmadığını deyən baş katib edir. O, kluba göndərdiyi kadrlarını öz kanalları vasitəsi ilə qoruyur, üstəlik, onlar üçün yeni imkanlar açır.
SOCAR-ın özündə də ikitirəlik var və futbola ayrılan pullar əsasən Məmmədovun day-dayı olan Elşad Nəsirovun vasitəsi ilə istiqamətləndirilir. Bu şəxs isə AFFA İcraiyyə Komitəsinə məhz Bakı klubundan seçilib, futbola ayrılan neft pullarının da nizamlayıcısıdı.
(davamı olacaq)
VÜSAL MAHMUDOV