Layihə
“Neftçi” həqiqətləri: susdurulan və danışdırılan Abdullayev
(əvvəli bu linkdə)
Bəs, Çingiz Abdullayev kimd…
Bəs, Çingiz Abdullayev kimdi? Həmin Nəsirovun məktəb yoldaşı, dostu. Xalq yazıçısı kluba hörmət, imic qazandırmaq üçün göndərilib. Amma almanın gözəlliyi onun içindəki qurdu gizlədəcək qədər imiş. Abdullayev “Neftçi”yə nəinki nüfuz qazandırmadı, əksinə, onun öz imicinə ciddi zərbə dəydi. Və Çingiz bəy buna özü səbəbkar oldu. O, klubun yiyəsi olmağı bacarmadı, “təqdim olunan”a qane olub, işin icrasının başqalarına yönəldilməsinə göz yumdu.
Abdullayev kitablarını ən çox oxuduğum yazıçılardandı, elə məhz yazıçı kimi də hörmətim sonsuzdu. Amma Müşahidə Şurasının sədri olduğu bu 26 ay ərzində elə şeylər gördüm ki, kaş onu tanımaya, gözəl yazıçı kimi xatırlayardım.
Abdullayevlə bağlı ilk şokedici xəbəri 2015-ci ilin aprelində aldım. Bir neçə gün öncə sədr seçilmiş Çingiz bəyin şuranın təsis iclasında dedikləri mənim üçün gözlənilməz idi. Bəri başdan qeyd edim ki, ondan sonrakı dövrdə gördüklərim təəssüf ki, deyilənlərin həqiqət olduğuna şübhə yeri qoymadı.
Təsis iclasındaca Çingiz bəy maaş davası etmiş, zarafata salaraq “futbolçular bu qədər maaş alırsa, yəqin bizə də 15-20 min dollar verərsiz” demişdi. Hal şahidi deyiləm, məclisdə olanların yalançısıyam. Nə yazıq ki, ötən 26 ay göstərdi ki, Abdullayev də “Neftçi”ni böhrandan çıxarmağa yox, elə pul qazanmağa gəlib.
2500 manat rəsmi maaş, üstəlik, 10 min manat “konvert”. Hətta bundan da narazı olan sədr bir ara onu bu işə qoşanlara etiraz etmiş, bir il öncə maaşının 3500 manata qaldırılmasına nail olmuşdu. Təbii ki, ona verilən karta aybaay yüklənən 10 minlik pay da yerində. Bundan başqa, klub tərəfindən sədrə 150 min manat qiyməti olan avtomobil hədiyyə olunduğu da deyilir.
İndi təsəvvür edin: bu, hələ bir nəfərin qazancıdı, Müşahidə Şurasında daha neçə nəfər var. Və bu qədər qazancın qarşılığında komanda illərdi uğura həsrətdi. Çingiz bəy qazandıqlarının qarşılığında ya klubu təzyiqlərdən qorumaq üçün danışdırılır, ya da bəzən abırına qısılıb, ümumiyyətlə, mətbuatdan qaçır. Son vaxtlar ümumiyyətlə, şuranın yığışmadığını, bu qurumun heç nəyə qarışa bilmədiyini nəzərə alsaq, Abdullayev heç bir iş görmədən 30-40 müəllimin, həkimin, alimin birlikdə qazanacağı qədər maaşa sahib durur.
Abdullayev sonuncu dəfə “Neftçi”nin muzeyinin açıldığı gün danışıb. Onun digər dedikləri cəfəngiyyat idi, Elxan Abdullayev haqdakı fikirlərinə görə isə elə növbəti gün sillə aldı. Baş məşqçinin işindən razılığını bildirən yazıçı onun postunda qalacağını vurğulamışdı – səhəri “Zirə”yə məğlubiyyət komandanın 7-ci pilləyə yürüşünün əsasını qoydu, avrokuboklara məhz “Zirə”nin gedəcəyini böyük ölçüdə müəyyənləşdirdi. Həm də qəsəbə klubuna məğlubiyyət məhz məşqçilər korpusunun biabırçı səhvindən sonra reallaşdı. Məşqçilər əvəzetmə zamanı limiti pozub sədrin üzünü qızartdılar.
Bir müddət sonra hamı gedəcəyini, istefaya göndəriləcəyini proqnozlaşdırdığı Elxan Abdullayevlə bağlı daha bir fakt ortaya çıxdı. Klub bir neçə gün öncə məşqçiləri cəzalandıracağını açıqlamışdısa, bu dəfə onunla yeni – 3 illik müqavilə bağlandığı bəyan edildi. Köməkçilər – Deriberinlə Getman qurban verildi, Abdullayev şərəfləndirildi. Və bu qərar klub adından təqdim edildi, Çingiz bəyin fikrinin öyrənilib-öyrənilmədiyi bəlli olmadı.
Bəlkə də Çingiz bəydən olsaydı, nüfuzu bu işlərə qarışmaq üçün kifayət etsəydi, Abdullayevi qovmağı üstün tutardı. Lakin onun söz sahibi olmadığını hələ Elxan bəyin təqdimatı zamanı göstəmişdilər. Sədr Ağasəlim Mircavadovla danışıb, müqaviləni razılaşdırmış, son anda futbolçulara Elxan bəy təqdim olunmuşdu. Yəni həmin vaxt göstərmişdilər ki, sənin klubdakı nüfuzun nədən ibarətdi: istədiyin adamla danışıq apara bilərsən, klubun taleyini AFFA-dakı qrup müəyyən edir.
Elxan Abdullayevlə yeni müqavilə həm də məcburi addım idi. Ortada reallıq var. Samir Əliyev, Əsgər Abdullayev qovulduqdan sonra SOCAR-dakı day-dayın xüsusi tapşırığı ilə Vəli Qasımov baş məşqçi postuna gətirilmişdi. Və bu adam daha ciddi islahatların qarşısını almaq üçün son ümid idi. Vəli bəy də ümidləri doğrultmayanda islahatların miqyası dəyişdi. Müşahidə Şurasında bəzi səlahiyyət bölgüsü aparıldı, idarəetmə sisteminə korrektə olundu və icraçı direktor Elnur Məmmədov da Qasımovla birlikdə qurbana çevrildi. Abdullayev də qovulsaydı, özüylə Orxan Hüseynzadəni aparmalı idi.
Məşqçilərin, əsas idarəçilərin dəyişilməsindən sonra uğursuzluqlar davam edəcəyi halda şura hədəfə çevriləcəkdi. Yəni ki, məşqçilərin, icraçı direktorların gedişi heç nəyi dəyişmirsə, deməli, sistemə əl gəzdirilməli, Müşahidə Şurası yenidən formalaşmalı idi. Elə bu səbəbdən Abdullayevə ümid etməyə-etməyə onu postunda saxladılar. Axı, şuranın hədəfə çevrilməsi, dəyişilməsi Elxan Məmmədovun planlaşdırdığı strategiyanın iflası demək olacaqdı. Fərqli qaydada idarə olunan “Qarabağ”la “Qəbələ”nin qitədəki uğurlarından, bu mövsüm avrokuboka bütün vəsiqələrə AFFA-nın istədiyi formalı şuralaşmaya getməyən komandaların vəsiqə qazanmasından sonra “Neftçi”də də hansısa islahata ehtiyac olsaydı, sistem, layihə məhv olacaqdı. Məhz bunun qarşısını almaq üçün Elxan Abdullayevlə müqavilə zorən imzalandı.
(davamı olacaq)
VÜSAL MAHMUDOV
- Ölkə futbolu2024-04-25 12:30
AFFA-dakı yoxlamaların nəticəsi: “Sumqayıt”ın prezidenti dəyişəcək
- Ölkə futbolu2024-04-25 08:00
Musa Qurbanlı: “Başımı dik tutmağa çalışıram”
- Ölkə futbolu2024-04-25 17:10
Klublar çətin vəziyyətdə: AFFA yardımları dondurub
- Ölkə futbolu2024-04-26 08:00
Juninyo – Avropanın ən yaxşı braziliyalısı