Milli komanda
Dövlət rəhbərliyi qarşısında imtahan
2 gün sonra milli komandamız dünya çempionatının s…
2 gün sonra milli komandamız dünya çempionatının seçmə mərhələsində 6-cı turun oyununa çıxacaq. Rəqib səfərdə 0:4 hesabıyla yenildiyimiz Şimali İrlandiyadı.
Qonaqlar hazırda 10 xalla 2-ci pillədə qərarlaşıb və pley-offa qalmaq üçün ən real şansa malikdilər. Qrupun aşkar favoriti Almaniya olduğundan, digər komandaların fərqli seçimi də yoxdu. Robert Prosineçkinin yetirmələri də hələ ümidini itirməyib. Əla startdan sonrakı büdrəmələr şansımıza zərbə vursa da, hər şey öz əlimizdədi.
Hazırda milli komandamızın 7 xalı var və Bakıdakı oyunda qələbə qazansaq, əsas rəqibimizə çatacağıq. Amma nədənsə AFFA rəhbərliyi indidən azarkeşləri başqa nəticəyə kökləmək istəyir. Baş katib Elxan Məmmədovun “heç-heçə də pis olmayacaq” deməsi bundan xəbər verir. Əcəba, nə oldu?
İrlandlar qarşısıalınmaz komandaya malik deyillər, hətta yendiyimiz Norveç, səfərdə xal aldığımız Çexiyadan da güclü sayılmırlar. O zaman çox maraqlıdı: birdən-birə nə baş verdi ki, erkən təslim olduq? Axı, hələ evdə 2 oyunumuz var və ümidlər tükənməyib…
Deyəsən, yola “Niyə də yox?!” şüarı ilə çıxanlar indidən uğursuzluğa əlyeri qoymaq istəyir. Avstriyadakı yarımaylıq toplanışda sınaqçı-rəqib tapa bilməyən, futbolçuları yalnız məşqlə kifayətlənmək məcburiyyətində qoyan AFFA rəhbərliyi işi bacarmadıqlarını anlayıb və geri çəkilməyə başlayıb. Vəziyyət elədi ki, Prosineçki də daha yaxşı nəticəyə ümid etmir və neçə vaxtdı özünə yeni iş yeri axtarır. Onun “Bursaspor”a getmək perspektivinin daha da artmasının seçmə oyun ərəfəsində aktuallaşması da bundan xəbər verir.
Amma bəhanə axtarmağın yeri yoxdu. Əvvəla, milli komandamıza güvənirik və azarkeşlər, futbol ictimaiyyəti kimi AFFA rəhbərliyi də belə etsə, lap yaxşı olar. Norveçlə matçöncəsi qələbədən dəm vuranların irlandlarla oyunöncəsi heç-heçəyə razılaşması komandaya xəyanətdi. İndiyəqədərki nəticələri, evdə oynamağımızı, bu komandayla Bakıdakı oyunları əsas götürərək qələbədən başqa heç bir nəticənin qaneedici olmayacağını deməliyik.
Ölkədə iqtisadi böhranın yaşandığı, hətta dövlət büdcəsinin ciddi şəkildə azaldıldığı dövrdə “yuxarılar” futbola qayğını azaltmadı. Dövlət rəhbərliyi böyük ümidlər bəslədiyi milli komanda üçün hər cür fədakarlığa razılaşdı. Və bütün bunlar blef kimi ortaya atılan “Niyə də yox?!” şüarına görə idi. Dövlət rəhbərliyi də bu hədəfə inandı, heç bir xərcdən çəkinmədi. Mübarizənin qızğın vaxtında, hər şeyin həll olunduğu bir dönəmdə heç-heçəyə ümid etmək, ictimai fikri buna hazırlamağa cəhd illüziyaların ortaya çıxmasının sübutudu.
İndi yenə bəhanə axtarır, bu şüarın daha çox növbəti tsikl üçün nəzərdə tutulduğunu, indiki yarışın hazırlıq mərhələsi olduğunu deyərək, vaxt qazanmağa çalışırlar. Amma “yuxarılar” da bezib və vəd edilənin yerinə yetirilməsini istəyirlər. Həm də Şimali İrlandiya ilə matçda mümkün qələbə də heç nəyi dəyişməyəcək. Qarşıda növbəti oyunlar var və dövlət rəsmilərini Rusiyaya gedə biləcəyimizə inandıranlar aradan çıxmamalı, növbəti matları düşünməlidilər. Bu seçmə mərhələ futbola qayğısını əsirgəməyən dövlət rəhbərliyi qarşısında imtahandı – ya AFFA rəhbərliyi bu imtahanı uğurla verəcək, ya 10 ildən çoxdu somurduqları pulların qarşılığını verə bilmədiklərini etiraf edib, istefaya gedəcəklər.
Elxan Məmmədovun heç-heçədən dəm vurmasına, indidən hamını buna köklənəsinə aldanmayaq. Hamı stadiona növbəti qələbəni bayram etmək üçün getməlidi. Qələbə futbolçularımızın haqqı və bacara biləcəyi nəticədi, bu, reallaşmasa, məsuliyyət komandanı hazırlaya bilməyən, onlara düzgün toplanış təşkil etməyən rəhbərliyin boynunda qalacaq.
FƏRİD
- Ölkə futbolu2024-04-22 08:00
İddialıların “autsayder ovu”
- Ölkə futbolu2024-04-22 08:34
Musa “Yurqorden” dəftərini bağladı?
- Ölkə futbolu2024-04-23 12:31
AFFA-da gündəm: 12 komandalı Premyer Liqa, aşağı liqa klublarına dəstəyin artırılması
- Milli komanda2024-04-23 16:30
Milli komandaya məşqçi seçimi: “Ad açıqlaya bilmərik”