Ölkə futbolu
“Zirə”dən gözlənilən qələbə, “İnter”dən kiçik sensasiya
Möcüzə baş verməyib. “Zirə” “Differdan…
Möcüzə baş verməyib. “Zirə” “Differdanj”ı keçməyə borcludu, “İnter” isə hətta bu vəziyyəti ilə də “Mladost”dan daha yaxşıdı. Hər iki komanda üzərinə düşəni etdi və cavab oyunları öncəsi əla üstünlük qazandı.
“Zirə”nin Avropa Liqasında debüt həyəcanı başadüşülən idi. Rəqib yarımhəvəskarlardan ibarət Lüksemburq klubu olsa da, “qartallar”ın avrokubokda ilk oyuna çıxması qismən naraharçılıq doğururdu. Amma Ayxan Abbasov gəncliyinə “yaraşmayan” soyuqqanlılıqla oyuna öz izini sala bildi. Doğru oyun tərzi, etibarlı müdafiə, rəngarəng hücumlar – “Zirə” top buraxmadan 2 qol vurdu və mərhələ aşmaq vəzifəsini böyük ölçüdə həll etdi.
Debütant minimal məqsədinə çatmaq üzrədi. Yeni transferlər komandaya güc qatıb və bu komanda Premyer Liqada da çox işlər görəcək.
“İnter”in qələbəsində yeganə gözlənilməzlik Serbiyada darmadağına imza atması oldu. Sərfəli nəticəyə ümid var idi, lakin bu hesab göydəndüşmə oldu. Bakı klubu hətta ən zəngin vaxtlarında olmayacaq qədər əla görünürdü. 3:0 isə artıq 3-cü mərhələ haqda düşünməyə də əsas verir. Çünki növbəti mərhələdəki rəqib də münasibdi. “Fola” (Lüksemburq) – “Milsami” (Moldova) cütündə qalib gələni də məyus etmək çətin olmamalıdı. İlk oyunda meydan sahiblərinin 2:1 hesablı qələbəsi hələ heç nə demək deyil, amma qalib kim olursa-olsun “İnter”in dişinə görədi.
“Mladost” üzərində qələbənin “İnter” rəhbərliyini necə sevindirdiyini bilmirəm, amma yəqin ki, Müşahidə Şurasının sədri Zaur Axundov qızarmağa imkan tapıb. Axı, o, bu uğurun memarı olan Zaur Svanadzeni qovmaq üçün fürsət gəzirdi. Gürcü çalışdırıcı ilə yeni müqaviləyə tələsməyən, Ramiz Məmmədovu onun postuna əyləşdirmək üçün bəddua edən Axundov indi ilk uğursuzluğa kimi dözməyə məcburdu.
Svanadze “İnter”i ən çətin vaxtlarında ayaq üstə saxlayan məşqçidi. Hətta aylarla maaş almadıqları zamanlarda da şikayətlənmədi, futbolçuları bir ailə kimi ətrafında birləşdirdi. İndi o, vicdanla çalışmağın mükafatını alır. Ağıllı oyun, mükəmməl taktika. Səfər oyununda etibarlı müdafiə olunan futbolçular standart vəziyyətləri də əla dəyərləndirincə uğur qaçılmaz oldu.
Cavab oyunları baş tutmadan sevinmək tezdi. Amma bu nəticələrdən sonra mərhələni keçməmək möcüzə olar.
FƏRİD