Layihə
Dəyişiklik ərəfəsində: Xələf axtarışı başladı
Həyatda əvəzedilməz insan yoxdur. Düzdü, kiməsə eynil?…
Həyatda əvəzedilməz insan yoxdur. Düzdü, kiməsə eynilə əvəz tapmaq mümkün deyil, lakin zamanı gələndə hamını əvəz etmək olur.
Xələf sələfdən yaxşı və ya pis, hansısa xüsusiyyətlərinə görə biri digərinin tam əksi ola bilər. Amma istənilən halda, hamıya əvəzedici tapılır.
Hansısa önəmli işçini itirəcəksənsə, mütləq yerinə bir başqası gələcək. Qurduğun iş, sistem kiməsə görə dağıla bilməz, dağılmamalıdı. Dağılırsa, deməli, getməsi lazım olan ilk şəxs elə sən özünsən.
20 ildir içərisində olduğum redaksiya fəaliyyətində də belə görmüşəm. Saysız-hesabsız istedadlı insanlarla işləmişik. Gedişinə təəssüfləndiklərimiz də olub, getməsini özümüz istədiklərimiz də. Və bütün hallarda onları kimsə əvəz edib, adətən bütün əvəzetmələrin hazırlığına xeyli öncədən başlamışıq. Hansısa iş yoldaşımız gedəcəyini əvvəlcədən xəbər verəndə və ya artıq budaqdan qopmalı yarpaq olduğunu hiss etdikdə mütləq yerinə kimisə hazırlamışıq.
Bizi də əvəz ediblər, biz də əvəz etmişik.
Hər bir eranın sonu var. İşimiz futbol təsərrüfatıyladısa, mövzumuz da kənardan deyil. Necə məşqçilər, futbolçular, legionerlər, klubar, onların rəhbərlərini görmüşük. Fuad Musayevin dördəlli yapışdığı AFFA prezidenti postundan uzaqlaşdırılmasına da şahidik, ölkə futbolunun simasını dəyişən Mübariz Mənsimovun süqutunu da, dəb müəyyənləşdirən Hafiz Məmmədovun ofsayda salınmasını da.
İndi də ölkə futbolunun de-fakto sahibi Elxan Məmmədov erasının bitiminin işartıları görünür. Düzdü, konkret zaman demək çətindi – o, bu ilin sonunda da yola salına bilər, baş katibin qalxanı olan AVRO-2020 layihəsi yekunlaşanda da. Amma mütləq gedəcək. Çünki ölkə futbolu o qədər dərin böhrandadı ki, buradan qurtuluş yoxdu və KİMSƏ getməlidi.
Ölkədə bəlli sistem var. Belə ki, ən üst səviyyədə təmsil olunan insanlar adətən toxunulmaz qalır, iş icraçıları, əsasən də həddi aşanlar vurulur. Bu baxımdan futbolda da hədəf bəllidi. Milyonların havaya sovrulduğu dövlət proqramı sonucunda heç bir ciddi irəliləyiş yoxdur, uşaq-gənclər futbolunda durğunluq var, millinin nəticələri aclıq dövrüylə müqayisədə aşağı-yuxarı eynidi.
Yalnız klub futbolunda təzadlı durumdu. AFFA çempionat iştirakçıların sayını heç cür artıra, stabil saxlaya bilmir, müxtəlif dəstələrin təşkilində qüsurlar saysızdı. Bunun müqabilində 3 klubumuz Avropa Liqasında qrup mərhələsini görüb, “Qarabağ”la “Qəbələ” isə bunu adətə çevirib.
Amma klubların beynəlxalq arenada yüksələn nəticələrinin AFFA-ya yaxından-uzaqdan dəxli yoxdu. Sadəcə, bu klublar sabitliyə dayanan yaxşı sistem qurublar, sponsorları fədakarlıqdan çəkinmir və nəticəsini görürlər.
Milli səviyyəsində isə vəziyyət bərbaddı. Hay-küylü layihələr, “Niyə də yox?!” şüarı, Avro-2020-nin təşkilatçılarından biri olmaq böyük ölçüdə heç nəyi dəyişmir. Bütün bunlar yalnız dövlət qayğısının, büdcə pullarının xərclənməsinin nəticəsidi, hansısa real işin meyvəsi deyil.
Və bunun məntiqi nəticəsi kimi, futbol təsərrüfatında xaos var, tənəzzül dərinləşir. İndi günah keçisi tapmaq, məsuliyyəti boynuna yükləmək üçün kimsə lazımdı. Və təbii ki, bu baxımdan yalnız Elxan Məmmədov bütün parametrlərə uyğun gəlir.
Onun seçilməsində qəribə, qeyri-adi heç nə yoxdu. Əslində, dağıdılan milyonların qarşılığında heç bir irəliləyişin olmamasında həqiqətən də bir nömrəli günahkar odur. Komitəbaz baş katibin heç bir layihəsi uğurlu olmadı, 10 ili hədər etdi və əsas söz sahibi olmasına rəğmən, hansısa inqilabi dəyişiklik görmədik. Klubların bir əldə cəmləşməsi, futbol təsərrüfatında şəxsi mənafelərə xidmət edən monopoliyalaşma göstərdi ki, inkişaf üçün idarəetmənin bu üsulu keçərli deyil.
Təbii ki, Məmmədov istedadlı, bacarıqlı biridi. Onun tamamilə iş görmədiyini də demək insafsızlıq olar. Məhz onun sayəsində strukturlaşma mümkün oldu, ölkə futbolu müəyyən qəlibə düşdü, idarəetmə sistemi formalaşdı. O, yalnız şəxsi mənafeyi ön plana çıxanda xidmətlərini kölgə altına saldı.
Və belə bir kadrı ümumiyyətlə, siyahıdan silmək lazım olmayacaq, yəqin ki, başqa sahədə yenə ona güvənəcəklər. Amma futbol təsərrüfatında yeni nəfəsə ehtiyac var və seçimlər, tədbirlər görülməsi başlanılıb.
Yazının əvvəlində əvəzedici axtarışı, onun hazırlanması ilə bağlı qeydləri boşuna yazmamışam. Baş katib faktiki bütün ipləri öz əlində cəmləşdirib və sabah onun birdən-birə yola salınması ciddi tormozlanmaya səbəb ola bilər. Buna görə də onun səlahiyyətləri yavaş-yavaş əlindən alınır, idarəçilik başqalarına da öyrədilir. Onun fəaliyyətini diqqətlə izləyənlər, əməllərindən mətbuat vasitəsi ilə xəbər tutanlar da var.
(davamı olacaq)
FƏRİD
- Ölkə futbolu2024-04-30 09:15
“Qarabağ” Avropada 2-ci yeri bölüşdürür
- Ölkə futbolu2024-04-29 08:00
Avrokuboka vəsiqə üçün vacib qələbələr: Sumqayıtda hakimlər də iş başında idi
- Ölkə futbolu2024-04-29 09:25
“Nitsa” Benzianı istəyir
- Ölkə futbolu2024-04-30 15:31
Riad Rəfiyevin çempionatı: hakimlər qışdan bəri “Sumqayıt”a 8 xal hədiyyə edib