Layihə
Dəyişiklik ərəfəsində: 10 ilin katibi
(əvvəli bu linkdə)
AFFA-nın yeni baş katibi problems…
AFFA-nın yeni baş katibi problemsiz biri olmalıdı. O, inkişaf üçün mükəmməl plana sahib olmaqla yanaşı, keçmişi vərəqləməməlidi. Çünki köhnə günahların qurdalanması həm də sponsorların, himayədarların, daha yüksək rəhbərlərin bostanına daş atılması olacaq. Bu səbəbdən yeni gələn keçmişə göz yumaraq çalışmalıdı, onu xələf seçənləri “yada salmamalıdı”. Belə birisi isə məlum dairədən, SOCAR-ın xeyir-duasını alaraq gələcək.
Məmmədov AFFA-nın baş katibi kimi düz 10 il çalışdı. Və bu dövrdə heç 10 faizlik inkişaf görmədik. Haqsızlıq olmasın – bəli, müəyyən işartılar var, lakin bu, Elxan bəyin xidməti deyil, futbola buraxılan milyonların nəticəsidi. Həmin maliyyə Fuad Musayev dönəmində olsaydı, indi fərqli inkişaf mərhələsindən danışırdıq. Yəqin ki, minimal şərtlərlə maksimum nəticələrə çalışan köhnə rəhbərlik uşaq futbolunda əla bünövrə qoyar, indi heç olmasa, ortabab futbol ölkəsinə çevrilərdik. Lakin birbaşa idarəçi olan Məmmədov bunu bacarmadı. Musayevlə onu məhz buna görə müqayisə edirik. O vaxt AFFA-nı rəhmətlik şəxsən idarə edirdisə, indi hər şey Məmmədovdan asılıdı. İndiki prezident Rövnəq Abdullayevin heç AFFA-da kabineti də yoxdu.
İndi uşaq futboluna təkcə AFFA tərəfindən illik 3 milyon manatdan çox vəsait sərf olunur. Bu, Musayevin vaxtındakı AFFA-nın büdcəsinin 2-3 mislidi. Əvəzində hansısa nəticə yoxdu. Gənclər və yeniyetmə futbolunda elə eybəcər sistem qurulub ki, 8 elita komandası Premyer Liqa üçün tətbiq olunan limit qarşısında acizdi. Növbəti mövsümdə start heyətində minimum bir 1996-cı il təvəllüdlü futbolçu oynamalı, iştirak ərizəsinə daha 2-3-nün adı əlavə olunmalıdı. Lakin uşaq futbolunda o qədər problem var ki, heç kim yetişməyib və əksər klublar bu yaşda olan keyfiyyətli kadr tapa bilmirlər. Halbuki 10 illik katibliyi dövründə Məmmədova ölkə futbolunun inkişafı üçün hər cür şərait yaradılmışdı. O, AFFA-nın de-fakto rəhbəri idi, amma əsas qayəni unudub, bütün bacarığını kənar layihələrə, şoulara həsr etdi.
Elxan bəy çox bacarıqlı biridi, əla marketoloq, diplomat, savadlı məmurdu. Lakin çox təəssüf ki, futbolun incəliklərini bilmir, bu sahədə də quru sistem yaratmaqla uğur qazanacağına inanırdı. Mentaliteti, Azərbaycan reallıqlarını nəzərə almadı, köhnələri silib, ətrafını yalnız gənclərdən qurdu. Halbuki bu işlərdə təcrübəlilərə arxa çevirmək, onların illərə dayanan praktikasından istifadə etməmək ağılsızlıq idi.
İndi real vəziyyət elədi ki, Məmmədovun qalstuklu, rusdillilərdən ibarət dəstəsi çarəsiz durumdadı. Hamı özünü ağa sayır, heç kimi qara iş görmür. Futbolda isə qara iş ən vacib olandı. Çünki məhsul torpaqda yetişdiyi kimi, futbolçular da meydanlarda inkişaf edir. Məmmədovun “parnik” məhsullarının keyfiyyəti bu gün özünü “göstərir”. Süni qazonlarda, kənara atılan mütəxəssislərin yerinə gətirilən, 500-600 manata aldıqları kateqoriyayla özünü məşqçi sayan təsadüfi adamların yetişdirdikləri futbolçular elə bu cür də olmalıydı.
Faktiki Elxan Məmmədovun dönəmində 10 ili əhatə edən bir futbolçu nəsli məhv edildi. Onlar həm təhsildən yayındılar, həm futbolçu ola bilmədilər. Deməli, perspektiv avara dəstəsi təmin edildi. 10 illiyin hesabatını versə, baş katibin fərqli nəsə qeyd edə biləcəyinə inanmıram.
Yalançı “Yuventus” məktəbi, hansısa yetirməsini görmədiyimiz “Mançester Yunayted” layihəsi yalnız şou idi. İtalyanlar artıq geri qayıdıb, ingilislərin hər il Mançesterə göndərdiyi seçilmiş gənclərdən isə hansısa göz qabağında deyil – hamısı it-bata düşüb. Çünki seçim də saxta idi, onların istedadı da o səviyyədə deyildi. Elxan bəy istedadları Gəncə məhəllələrində, Tovuz kəndlərində, Qusar dağlarında, İmişli çöllərində deyil, Bayılda, Mərdəkanda yetişdirmək yolunu seçdi və bu, fiaskoya səbəb oldu. Əyalətlərdə futbolun inkişafı unudulan gün top oyununun da sonu oldu.
Və mətbuatın illərdi car çəkdiyi bu fakta göz yumuldu, gözardı edildi. İndi isə məhsul yığmaq vaxtıdı və klublar yerli futbolçu tapa bilmir. Ən pisi isə odur ki, 10 il öncə olduğu kimi 20-30 deyil, cəmi 8 komanda bu əziyyəti çəkir. Bəlkə də komandaların sayını azaltmaq elə bu eyibin üstünü örtmək üçün imiş.
(davamı olacaq)
FƏRİD
- Ölkə futbolu2024-04-30 09:15
“Qarabağ” Avropada 2-ci yeri bölüşdürür
- Ölkə futbolu2024-04-30 15:31
Riad Rəfiyevin çempionatı: hakimlər qışdan bəri “Sumqayıt”a 8 xal hədiyyə edib
- Premyer-liqa2024-04-30 09:30
“Yalnız birlikdə olaraq uğurlar qazana bilərik” – Ozobiç
- I Liqa2024-04-30 14:45
“Araz Saatlı”nın məşqçisinə 2 oyunluq cəza