"Beşiktaş"dan transfer "bomba"sı – FOTO

Türkiyə çempionu "Beşiktaş" bu yay ən səs-küylü transferlərdən birini rəsmiləşdirib. Futbolinfo.az xəbər verir ki, İstanbul klubu portuqaliyalı müdafiəçi Pepe ilə apardığı danışıqları nəhayət ki, müsbət sonluqla yekunlaşdırıb. "Qara qartallar" 10 ildi Madrid "Real"ının şərəfini qoruyan 34 yaşlı futbolçu ilə razılığa gəldiklərini rəsmi sayt vasitəsilə ictimaiyyətə çatdırıblar. 

Lissabonda futbolçunun özü və meneceri ilə baş tutan və 4 saat davam edən həlledici görüşün sonunda tərəflər 2 illik müqaviləyə razılaşıblar. Pepenin yaxın günlərdə İstanbula gəlməsi və təşkil olunacaq imza mərasimində "Beşiktaş"lı tərəfdarlarla görüşməsi gözlənilir.

Türkiyə mətbuatı bu transferin maddi detallarını da üzə çıxarıb. "Beşiktaş" müqavilə haqqı kimi təcrübəli futbolçuya bəribaşdan 3 milyon avro ödəyəcək. Portuqaliyalı müdafiəçi yeni klubunda ilinə 3 milyon 350 min avro məvacib alacaq. O, bir mövsüm ərzində azı 35 oyuna çıxacağı halda əlavə 350 min avro qazanacaq. "Beşiktaş" çempion olacağı halda Pepe 250 min avro da mükafat əldə edəcək. 

Braziliyanın "Korintians" klubunun yetirməsi olan Pepe peşəkar karyerasına 2001-ci ildə Portuqaliyanın "Maritimo" komandasında başlayıb. 2004-cü ildə o, "Porto"ya transfer olunub. 2007-ci ildən etibarən isə o, Madrid "Real"ının şərəfini qoruyurdu. Braziliyada anadan olan portuqaliyalı futbolçu İspaniya nəhəngində 10 il ərzində 229 oyun keçirib, 13 qola imza atıb. 2007-ci ildən etibarən Portuqaliya yığmasında oynamağa başlayan Pepe bu komanda ilə 86 oyuna çıxıb, 5 qol vurub.