Ölkə futbolu
Malıyev maaşların gecikdiyini təsdiqlədi: “Hər şey yoluna düşəcək”
“İnter” məskunlaşdığı bazanı boşaltmağa başlayı…
“İnter” məskunlaşdığı bazanı boşaltmağa başlayıb. Klub “Şəfa” stadionundan mərhələli şəkildə ayrılacaq və “Dalğa Arena”ya yerləşəcək.
Əsas və əvəzedici komandalar Mərdəkanda məskunlaşacaqsa, uşaq komandaları ilə bağlı durum fərqlidi. AFFA himayədarlıq etdiyi klubun yeniyetmələrini idarəsində olan digər məkana – Bakı Olimpiya Stadionuna yerləşdirəcək.
Klubda maliyyə vəziyyəti isə hələ də yoluna düşməyib. Dünən Serbiya “Mladost”u ilə oyundan öncə futbolçulara mayın maaşı ödənilsə də, klubun digər əməkdaşları hələ gözləyir.
Klubun icraçı direktoru Rəmiş Malıyev futbolinfo.az-a açıqlamasında işçilərə həqiqətən 3 aylıq borcları olduğunu etiraf etdi: “Klubda elə vəziyyətdi ki, problemlər bitmək bilmir. Amma hamısı yoluna düşəcək. Tez bir zamanda klubun “Dalğa Arena”da məskunlaşmasını və başqa problemləri yolua qoymalıyıq. Yubanan maaşların nə vaxt veriləcəyini dəqiq deyə bilməyəcəm. Amma əmin olun ki, problemin həlli ilə məşğuluq və ən qısa zamanda hamının maaşını verəcəyik”.
Rəmiş bəydən klubun Müşahidə Şurası barədə də soruşduq. Beynəlxalq Bankla münasibətlər kəsiləndən sonra şurada da ciddi dəyişiklik olmalıdı. Çünki oradakıların əksəriyyəti keçmiş himayədarın nümayəndələri idi. Malıyev bu məsələyə də aydınlıq gətirdi: “Başverənlərdən xəbərdarsız. Klubda çox dəyişiklik oldu. İndi problemləri sırası ilə həll etməliyik. Hələlik başımız qarışıqdı. Zaur Axundov Müşahidə Şurasına sədr təyin olunub. Üzvlər arasında dəyişikliklər olacaq. Amma buna indi vaxt yoxdu. Zamanıyla hər şey yoluna düşəcək, yeni üzvləri siz də tanıyacaqsız”.