Dünya futbolu
Karyerasını bitirdiyini göz yaşları içində bəyan etdi
Məşhur argentinalı futbolçu Matias Delqado 35 yaşında oyun…
Məşhur argentinalı futbolçu Matias Delqado 35 yaşında oyunçu karyerasını başa vurduğunu elan edib.
Futbolinfo.az xəbər verir ki, son olaraq İsveçrənin "Bazel" klubunun şərəfini qoruyan yarımmüdafiəçi geridə qalan mövsümdə bu kollektivl 38 oyuna çıxmış, 12 qola imza atmışdı. O, sözügedən qərarını jurnalistlər üçün təşkil etdiyi mətbuat konfransında açıqlayıb. Futbolçunun karyerasını başa vurmaq qərarını göz yaşları içində elan etməsi diqqətdən yayınmayıb. "Bazel" də rəsmi saytı vasitəsilə yarımmüdafiəçinin karyerasını başa vurduğunu bildirib və ona gələcək həyatında uğurlar arzulanıb.
Delqado azərbaycanlı futbolsevərlərə daha çox Türkiyənin "Beşiktaş" klubundakı çıxışı ilə tanışdı. O, 2006-2010-cu illər aralığında "ağ-qaralar"ın heyətində 83 oyun keçirmiş, 13 qol vurmuşdu.
"River Pleyt"in yetirməsi olan Matias peşəkar karyerasına 2000-ci ildə ölkəsinin digər klubu "Çakarita"da başlayıb. O, 2003-cü ildə məhz bu klubdan "Bazel"ə üz tutmuşdu. Üç mövsüm İsveçrə çempionatında çıxış etdikdən sonra Delqado 2006-cı ildə "Beşiktaş"a transfer olunmuşdu. 2010-da Türkiyəni tərk edə argentinalı Birləşmiş Ərəb Əmirliklərinin "Əl-Cəzirə" klubunda 3 mövsüm keçirdikdən sonra yenidən "Bazel"ə qayıtmışdı. O, 2013-cü ildən İsveçrədə çıxış edirdi.
Delqado 6 dəfə İsveçrə, 1 dəfə Türkiyə, 1 dəfə də BƏƏ çempionu olub. O, bu ölkələrin hərəsində 1 dəfə kuboka da sahib çıxıb.