Ölkə futbolu
“Neftçi”yə yox, vasitəçilərə xidmət edən transferlər
Avstriyada təlim-məşq toplanışında olan “Neftçi&rdq…
Avstriyada təlim-məşq toplanışında olan “Neftçi” son günlər transfer bazarında xeyli fəallaşıb. Bakılılar ardıcıl transferlərlə diqqət çəkir.
Amma iş ondadı ki, yeni gələn oyunçuların komandanın gücünə güc qatacağı şübhə doğurur. Yeni gələnlər əcnəbilər olsa da, onların yüksək səviyyəsindən bəhs etmək mümkün deyil.
Bakılılar David Derlis Meza Kollini oyun qurucusu kimi dəvət edib. Baş məşqçi Elxan Abdullayev çoxdandı bu mövqeyə oyunçu axtarırdı, lakin parqvaylı bu rol üçün nə qədər uyğun biridi?
2007-10-cu illər aralığında Yunanıstan “Atromitos”unda çıxış edən, amma burada cəmi 2 oyun keçirdikdən sonra ayrı-ayrı 3 yunan klubunda icarədə olan yarımmüdafiəçi İtaliya “Çezena”sında da çıxış edib. “Messiniakos”da 32 oyuna 1 qol vurduğu üçün Apenninə çağırılan legioner burada 23 oyunda cəmi 1 dəfə fərqlənib. Lakin o, bu göstəriciyə 2 mövsüm ərzində nail olub. İcarədə olduğu “Pavia”da isə 39 matça cəmi 1 qol vurub.
Heç cür istedadını aça bilməyən, sıradan komandalarda oynayan Kolli 2013-cü ildə böyük pullar qarşılığında Bakı “İnter”inə gətirilib. Burada 2 mövsüm ərzində 56 matç keçirib 4 qol vuran futbolçu “Qəbələ”də çətinlik çəkib. Cəmi 4 oyunda forma geyən paraqvaylı vətənində oynadığı 2016-cı ildə də qola həsrət qalıb (15 oyun). İndi isə 10 ilik karyerası ərzində cəmi 17 qol vuran, son dəfə 4 il əvvəl qapı torunu silkələyən oyun qurucusuna Elxan Abdullayev xilaskar gözü ilə baxır.
Bu oyunçu ölkəmizdə qardaşı ilə birgə çıxış edib. Amma onu son mövsümdə “Zirə”də oynamış Sezarla bir tutmaq olmaz. Adlar yanıldıcı ola bilər, lakin Derlis daha zəif futbolçu idi. Elə bu səbəbdəndi ki, klub riskə getməyərək onunla 1 illik müqavilə bağlayıb.
"Neftçi”nin digər yeni oyunçusuna da böyük ümidlər bəsləmək olmur. Mateo Muzek Georgi Navalovskini əvəz etmək üçün gətirilib. İndidən deyə bilərik ki, xorvat oyunçu sələfini unutdura bilməyəcək. 2 illik müqavilə bağlayan 22 yaşlı futbolçunun karyerası elə də zəngin deyil. Sloveniya "Rudar”ından gələn cinah oyunçusu “Luçko”, “Draqovoljaç” kimi xorvat klublarında, həmçinin Sloveniyanın “Qoriça” və “Zavrç” komandalarında oynayıb – hərəsində 1 il, ilyarım. Hər hansı parlaq çıxışı olmayıb, “Neftçi”yə də daha çox solaxay olduğu üçün gətirilib. Oyun təcrübəsi zəngin deyil, yalnız yaşının azlığı müsbət məqam sayıla bilər.
Təbii ki, bu transferləri iş başında görmədən onları mühakimə etmək doğru deyil. Lakin ortada statistika var, eyni zamanda Meza Kollini canlı izləmişik, Muzekin də nə bacarığa sahib olduğunu internet qaynaqları hesabına araşdıra bilirik. Onların son illər Bakı klubuna dəstəylə gətirilib-göndərilənlərdən fərqli olmayacağını əminliklə demək olar.
Bəs, belə aşağı səviyyəli oyunçuların transferində məqsəd nədi? Klub rəhbərliyindən soruşsaq, heyəti gücləndirmək istədiklərini deyəcəklər. Halbuki güclü olmaq üçün Navalovskini saxlamaq, eyni zamanda daha yaxşı oyunçu gətirmək lazım idi. Hətta Venesuelanın “Mineros Quayana” klubuna icarəyə verilən Edson Kastilyo da bu 2 nəfərlə müqayisədə daha yaxşı ola bilərdi. Amma həm Giorgi, həm də Edson ona görə göndərildi ki, büdcədən kənara çıxılmasın, onların yerinə yeni əcnəbilər gətirmək mümkün olsun. Keyfiyyət heç kimin vecinə deyil, hər yeni gələn vasitəçilər üçün qazanc mənbəyidi. Hətta klub prezidenti Orxan Hüseynzadənin bəhs etdiyi sabit heyət haqqında nağıl da yaddan çıxıb.
Meza Kolli qardaşılarını Azərbaycana Kamil Məmmədov gətirib. Vaxtilə onlar indi “Neftçi”ni inhisra alan bu menecerə yüzminlər qazandırıb. İndi o, yenə imkan düşən kimi artıq kimsəyə lazım olmayan Derlisə iş yeri tapdı və təbii ki, özü də 30 min manat qazandı. Muzekə görə isə o və şəriki Riad Rəfiyev bir o qədər “qatladı”. “Neftçi”nin bu transferlərdən nə qazanacağı kimsənin marağında deyil, əsas odur, havadarı AFFA-da oturan bu cütlük yenə qazanclı çıxdı. Kreditlə yaşayan “Neftçi” yenə karvansaradı, oyunçular gəlib-gedir, bir neçə işbaz varlanır. Sponsorlardan transferlər üçün əlavə maliyyə ala bilməyən rəhbərlik indi olub-qalan pulu da belə vecsiz oyunçulara sərf edir.
FƏRİD