Ölkə futbolu
“Kəpəz” stadion seçməyib: gəncəlilər bütün klublarla sövdələşməyə gedəcək
Təmirə bağlanan Gəncə şəhər stadionunda qazonun dəyişdirilm?…
Təmirə bağlanan Gəncə şəhər stadionunda qazonun dəyişdirilməsi işləri davam edir. Ot örtüyünün yenilənməsi prosesi oktyabra kimi yekunlaşmalıdı.
Təmir başlanarkən stadionun sentyabra kimi istismara veriləcəyi açıqlanmışdı. Amma 4 ay İrlandiyanın SIS şirkəti üçün yetərli olmayıb. Çünki son günlər arenanın oktyabrda oyunları qəbul edə biləcəyi ilə bağlı xəbərlər yayılmağa başlayıb. Şirkətin vədinə xilaf çıxmasının səbəblərini qoy maliyyəni ayıran AFFA araşdırsın, bizim üçün maraqlı olan “Kəpəz”in harada oynayacağıdı.
Oktyabra kimi Topaz Premyer Liqasında ilk dövrə başa çatacaq. Yeni mövsümün 2 həftəyə start götürəcəyini nəzərə alsaq, gəncəlilər mövsümün əvvəlində doğma komandanı görməyəcək. Bəs, “Kəpəz” oyunları harada keçirəcək? Bakıdakı hansı arena komandaya qucaq açacaq?
Baş məşqçi Şahin Diniyev bu barədə sualımıza maraqlı cavab verdi. Sən demə, gəncəlilər hansısa stadionda rəqiblərini qəbul etmək istəmir: “Vəziyyətdən çıxmaq üçün rəqib komandalara müraciət edəcəyik. Təqvimdə nəzərdə tutulan ev oyunlarımızı rəqiblərin meydanında keçirəcək, 2-ci dövrədəki oyunlarda isə ev sahibi olacağıq. Bununla bağlı klublara müraciət edəcəyik”.
“Bəs, bütün klublar buna razılaşacaqmı” – Diniyev bu suala dəqiq cavab verə bilmədi: “Məncə, burada problem olmamalıdı. Əvvəl-axır hamı ilə həm evdə, həm də səfərdə oynamalıyıq. Vəziyyəti nəzərə alan klubların bu təklifə razılıq verəcəyini düşünürük. Bildiyimə görə, Klublar Komitəsinin son iclasında bütün klublar təmsilçimizə bunun mümkünlüyü ilə bağlı razılığını bildirib. Kimsə təklifimizlə razılaşmasa, yəqin ki, Bakıda hansısa stadionda ev sahibi kimi çıxış edəcəyik. Lakin hansında? Bax, bu suala mən cavab verə bilmərəm, bu barədə klub rəhbərliyindən soruşun”.
Əslində, vəziyyət başadüşüləndi. “Kəpəz”ə bəlkə də bütün klubların əziyyət çəkdiyi Gəncə stadionunun bərbad qazonundan qurtulmaq üçün güzəşt etmək olar. Lakin ortaya qəribə mənzərə çıxır: “Kəpəz” 1-ci dövrəni bütünlüklə səfərdə, 2-ci dövrəni isə evdə oynamalıdı. Gülməli deyilmi?