Ölkə futbolu
Zorən azarkeşlik: “Zirə”nin sponsorları işçilərini stadiona getməyə məcbur edib
Avropa Liqasının 2-ci təsnifat mərhələsi çərçivə…
Avropa Liqasının 2-ci təsnifat mərhələsi çərçivəsində baş tutan “Zirə” – “Astra” oyununda maraqlı mənzərəyə şahidlik etdik. Gözləmədiyimiz halda “Dalğa Arena”da anşlaq gördük.
Rumınlarla cavab oyunu üçün stadiona xeyli adam gəlmişdi. İlk oyunda 1:3 hesabıyla yenilən komandanın belə dəstək görməyi xoş idi. Lakin ikinci hissə başlayan kimi tribunalarda seyrəklik yaranması şübhələrə yol açırdı.
“Futbolinfo” dünən 0:0 bitən matça “tamaşaçı marağı” ilə bağlı maraqlı xəbər öyrəndi. Sən demə, tribunalar məcburi şəkildə doldurulubmuş.
Belə ki, klubun sponsorlarından olan “Bakıelektrikşəbəkə” bu işdə fəal rol oynayıb. Komandanın geyimlərində adı yazılan “Santral Elektrik”in rəhbərliyi bütün işçilərinə oyuna getməyi tapşırıb. Hətta hamıdan yazılı izahat da alınıb. Məsələn, “Bakıelektrikşəbəkə”nin Nizami rayon şöbəsində 54 işçi oyuna gedəcəkləri, əks halda işdən çıxarılacaqları ilə bağlı sənədə qol çəkiblər. Onlara cəmi 25 bilet verilib, qalanlarına isə özlərinin problemi həll etməsi tapşırılıb. Digər rayonlarda da şirkətin əməkdaşları eyni şərt qarşısında aciz qalıblar.
İş yerini itirmək qorxusundan oyuna getməyə məcbur olan əməkdaşlar 45 dəqiqə matçı izləyəndən, siyahıya, fotoyoxlamaya düşdükdən sonra aradan çıxıb. Elə bu səbəbdən ikinci hissədə arenadakı azarkeş sayında ciddi azalma olub. Mərdəkandan şəhərə qayıtmaqda problemlə üzləşməkdən qorxan bir sıra işçilər arenanı vaxtından əvvəl tərk edib. Bu səbəbdən onları “Dalğa”ya daşımaq üçün ayrılan avtobuslar matç bitdukdən sonra geriyə yarıboş qayıdıb.