Ölkə futbolu
Kipr uzaqlaşdı, Belarus fərqi azaltdı – klub reytinqi
Avropa Liqasının 3-cü təsnifat mərhələsinin ötən gec?…
Avropa Liqasının 3-cü təsnifat mərhələsinin ötən gecə baş tutan cavab oyunları Azərbaycanın UEFA reytinqindəki mövqeyinə ciddi təsir göstərməyib.
Komanda.az xəbər verir ki, ölkəmiz bu siyahıda əvvəlki mövqeyində qalıb. Ötən gün Azərbaycanın avrokuboklardakı təmsilçilərindən "Qəbələ" növbəti oyununu keçirdi. Doğma meydanda Yunanıstan "Panatinaikos"u ilə qarşılaşan əyalət klubu cavab görüşündə də uduzaraq (1:2, ilk oyun 0:1) mübarizəni dayandırdı. Beləcə, "Qəbələ" son oyununda da ölkəmizə xal qazandıra bilmədi.
Hazırda UEFA reytinqində 55 ölkə arasında 22-ci pillədəyik. Azərbaycanın hesabında 17.375 reytinq xalı var. Onun 2.625 xalı (0.875 "Qarabağ", 0.750 "İnter", 0.625 "Zirə", 0.375 "Qəbələ"nin payına düşür) cari mövsümdə qazanılıb.
Bizdən öndə qərarlaşan İsrailin 18.425 reytinq xalı var və 3 təmsilçisi mübarizəni davam etdirir. Azərbaycanı 17.250 xala malik Belarus izləyir. Bu ölkənin isə bizim kimi, cəmi 1 təmsilçisi yoluna davam edir.
Onu da əlavə edək ki, klublarımızın təsnifat mərhələsindəki istənilən qələbəsi Azərbaycana 0.250 reytinq xalı qazandırır. Heç-heçə isə 0.125 xal verir. Qrup mərhələsində heç-heçə 0.250, qələbə 0.500 xalla qiymətləndirilir.