Maksim Medvedev: "Bu tarixi şansı əldən vermək istəmirik"

UEFA Çempionlar Liqasının pley-off mərhələsi çərçivəsində doğma meydanda Danimarka "Kopenhagen"i ilə qarşılaşan "Qarabağ" ilk oyundan 1:0 hesablı qələbə ilə ayrıldı.

Futbolinfo.az xəbər verir ki, Ağdam klubunun kapitanı Maksim Medvedev matçdan sonra jurnalistlərin suallarını cavablandırıb:

– Oyun haqda nə deyə bilərsiz?
– Çox ağır oyun oldu. Rəqibin heyətində yüksək səviyyəli futbolçular yer alıb. Çalışdıq, yaxşı mübarizə aparaq. Rəqibi 3 gün idi analiz edir, keçirdikləri oyunların videoyazılarına baxırdıq. Bu, tarixi bir şansdı, əldən qaçırmaq istəmirik. Tək biz yox, bütün ölkə meydanda idi. Çempionlar Liqasının himni ilk dəfə stadionumuzda səslənən zaman azarkeşlərin çıxardığı səs tüklərimizi biz-biz etdi. Onlara təşəkkür edirik. Cavab oyununda da Avropadakı azarkeşlərimizin bizə dəstək olacağına inanırıq.

– İkinci hissədə ikinci qolu gözləyirdik. İmkanlar da oldu. Amma kənardan baxanda elə təəssürat var idi ki, sanki sizə bu hesab sərf etdiyindən ehtiyatlı oynayırsız…
– Oyundan əvvəl sual versəydiniz, heç-heçəyə də razı ola biləcəyimizi deyərdik. Amma bu gün 1:0 hesabı ilə qələbə qazandıq. Çalışırdıq ev oyununda qol buraxmayaq. Düzdü, fərqi artıra bilərdik, amma qapıçıları 3 epizodda yaxşı oynadı.

– Birinci hissədə rəqibin heyətində yer alan Benqtssonla mübahisəniz oldu. Bu cür hal sonra da davam etdi. Oyunun gedişində sanki sizi təxribata çəkirdilər…
– Onlar təcrübəli futbolçulardı. Bilirlər ki, emosinonal futbolçularımız var, təxribata gedə bilərik. Lakin matçdan əvvəl baş məşqçimiz bunu bizə demişdi.

– Yəni rəqibin bu “silahın”dan xəbərdar idiz?
– Əlbəttə, bilirdik. Skandinaviya ölkələrri hər zaman belə olub. Çalışırdıq vərəqə almayaq. O da tuturdu, mən də tuturdum, beləcə oyunu başa çatdırdıq.

– Danimarkada bu azarkeşlər olmayacaq. Rəqib azarkeşlərin yaradacağı atmosfer oyununuza necə təsir edəcək?
– Öz gücümüzlə, əziyyətimizlə bu yerlərə gəlmişik. Bütün respublikamız bilir ki, səfərə “vuruşmağa” gedirik. İnanıram ki, Avropadakı azarkeşlərimiz bizi yalqız qoymayacaqlar. Onlar hətta sosial şəbəkələrdə bizə müraciət edirlər ki, bilet verin, stadiona gələk. Avropada türklər, Azərbaycanlılar çoxdu. Onları cavab oyununda gözləyirik.

– Qrup mərhələsi sevincini Bakıda qeyd etmək daha maraqlı olardı…
– Bu, hər birimizin arzusudu ki, qrup mərhələsində oynayaq. Amma mərhələ 2 oyundan ibarətdi. Bizi daha çətin oyun gözləyir. Çempionlar Liqası himnini səsləndirdik. Bunun davamı gəlsə, yaxşı olar.