Üçhakimiyyətlik

Topaz Premyer Liqasında 2-ci tur da heç-heçəsiz bitdi. Favoritlər sensasiyaya imkan verməyib, turnir cədvəlində qütbləşmə yaratdı. İndi 3 komandanın 6, 3-nün 0 xalı var. Daha 2 komanda qələbə də görüb, məğlubiyyət də.

“Neftçi”nin “Səbail”lə oyundakı məğlubiyyəti sensasiya deyildi. Komandanın məzmunsuz oyunu bu nəticəni qaçılmaz edirdi. Bəlkə də paytaxt derbisində heç-heçə daha ədalətli nəticə olardı, amma debutant ona son dəqiqələrdə hücum etmək cəsarəti verən rəqibini bağışlamadı. İndi 1 ayın komandası olan “Səbail”in də xalı var, 80 yaşlı “Neftçi” isə yalnız top fərqinə görə 7-ci pilləyə yüksəlməsinə sevinir.

“Qarabağ” öz ampluasındadı. Ağdamlılar turnirlər arasında fərq görmür və heyət fərqinə baxmayaraq, hamı ilə qələbəyə oynayır. “İnter”lə oyun çətin keçdi, lakin fərq yarada bilən oyunçulara sahibsənsə, nəticə qazanmaq mümkündü. Son dəqiqə qollarının qələbəni gətirdiyi şənbə günü çempionun da bəxti üzünə güldü. Əfran İsmayılov rəqibinin 90 dəqiqəlik müqavimətini bir zərbəylə qırdı.

Bügünkü matçlarda da yalnız rəqiblərdən biri qol vurdu. “Qəbələ” digər meydan sahibləri kimi yeganə qola sevindi. Fərq onda idi ki, gümüş medalçı qələbə topuna ilk hissənin sonlarında imza atdı. “Sumqayıt” əla müqavimət göstərməsinə baxmayaraq, daha artığına nail ola bilmədi. Roman Qriqorçuk “Qarabağ” la növbəti tur matçı öncəsi heyətlə bağlı bəzi rotasiyalara getmişdi, amma istənilən halda, komandanın oyununda əvvəlki şaqraqlıq yoxdu. Yeni transferlərdən narazı olan ukraynalı mütəxəssis faktiki, ötənilki heyətdən yararlandı.

Turda yeganə səfər qələbəsini qazanan “Zirə” həm də mövsümün ilk darmadağınına nail oldu. Yevlaxda “Kəpəz”i rahatlıqla yenən Ayxan Abbasovun yetirmələri rəqibin zəifliyindən maksimum istifadə etdi. Gəncəlilər didərgin həyatına davam edərkən son pilləyə endi. Bu nəticə bəlkə də meydandakı oyunun tam əksi deyildi, lakin fərdi səhvlər qol sayına birbaşa təsir etdi.

AĞA