Ölkə futbolu
Qələbələrə meydandan kənarda davam edək!
Adlardan qorxmayın. Aşağı-yuxarı bu səviyyəli komandalar gələ…
Adlardan qorxmayın. Aşağı-yuxarı bu səviyyəli komandalar gələcəkdi. Əsas olan qrupa düşmək idi, “Qarabağ” da onu bacardı.
Təmsilçimizin Çempionlar Liqasında yarışacağı qrup rəngarəngdi. Bizim üçün ölüm qrupudu, hətta 3-cü yerə də ümid yoxdu. İndi qalır şərəflə mübarizə aparmaq və ölkəni daha da yaxşı tanıtmaq.
Artıq iş futbol müstəvisindən çıxıb. Məşqçilər, futbolçular matçları layiqli şəkildə yola verəcək, əsas məsələ bu imkandan başqa cür faydalanmaqdı.
Bakıya İngiltərə çempionu “Çelsi”, İspaniya nəhəngi “Atletiko”, İtaliya futbolunun simvollarından “Roma” gəlir. 3 böyük ölkədə Azərbaycanın tanıtımı üçün əla fürsətdi – bu imkanları dəyərləndirməliyik. Hafiz Məmmədovun milyonlar xərcləyib, yalvararaq Bakıya gətirdiyi “Atletiko”nu “Qarabağ” UEFA-dan pul alaraq qarşılayacaq. Ağzına gələn “Marca”nın əməkdaşları gəlib qaçqın komandanın uğurundan yazmağa məcbur olacaq.
Əziz azarkeşlər, rəqiblərin sosial şəbəkədəki səhifələrinə hücum etməklə qəhrəman olmurlar. Qəhrəmanlarımız var, onlar qrup oyunlarında da ən yaxşı nəticə üçün döyüşəcəklər. Biz özümüzü ən yaxşı şəkildə göstərək, ölkəmizi, mədəniyyətimizi sərgiləyək, Qarabağ probleminə, üzləşdiyimiz haqsızlıqlara diqqət çəkək. Komanda bura kimi meydanda qələbələr qazandı, indi növbə bizimdi, meydandan kənarda nələrəsə nail olaq.
Adlardan qorxmayın. Qışa kimi futboldan zövq alın…
AĞA