Ölkə futbolu
Ramin Musayev: “Premyer Liqada 12 komanda iştirak edəcək”
Bu gün Birinci Divizionun püşkü atılıb.
Fut…
Bu gün Birinci Divizionun püşkü atılıb.
Futbolinfo.az xəbər verir ki, 2017/18 mövsümünün püşkatma mərasiminə qatılan Peşəkar Futbol Liqasının (PFL) prezidenti Ramin Musayev jurnalistlərin suallarını cavablandırıb:
“Bu il 10 komanda 3 dövrədən ibarət çempionatda yarışacaq. Reqlamentə görə 1-ci dövrədəki qarşılaşmalar 3-cü dövrədə də təkrarlanacaq. Limitə bağlı onu deyə bilərəm ki, 6 yerli, 2 legioner, 3 nəfər isə 21 yaşa kimi futbolçu çıxış edə bilər. Ötən il UEFA-dan məktublar aldıq. Bütün komandaların adı oyun-alqı satqısında hallanmışdı. Amma bu il elə olmayacaq. Hər oyuna nümayəndəmiz göndəriləcək. Danışıqların olduğu bəlli olsa, komandalar cəzalanacaq və oyunun nəticəsi ləğv ediləcək. Milli Məclisdə qərar qəbul edilib. Həmin klub rəhbərləri cinayət məsuliyyəti daşıyacaq və həbs ediləcək. Bir də ölkənin adı UEFA-da oyun-alqı satqısına düşsə, 1 komandamız avrokuboklardan uzaqlaşdırıla bilər. Bu isə hamımız üçün ləkədi. Ona görə də diqqətli olun. Hüquq-mühafizə orqanları ilə danışıqlarımız olub. İlk məsuliyyəti klub rəhbəri daşıyacaq”.
Musayev “Bakılı”nın çemionatdan uzaqlaşdırılması ilə bağlı bunları deyib: “Bakılı” klubunun prezidenti Misir Əbilov müracət edib, divizionda iştirak etmək istəməyib. Səbəb kimi ölkə xaricində olduğunu göstərib. Dedi ki, özüm burada olmayacamsa, çempionatda iştirak etmək istəmirəm”.
O, həmçinin iranlı futbolçuların diviziondakı çıxışı ilə bağlı da danışıb. Onların əsgərlikdən yayınması ilə bağlı iddialara bu cür cavab verib: “İranlıların Azərbaycanda oynayıb qayıtmasına gəlincə, onlara legioner futbolçu kimi baxılır və üstünlük verilir. Hər yerdən legioner futbolçu gəlir, amma iranlı olmaz? Bu İranla aramızda münaqişəyə səbəb ola bilər”.
“Şahdağ”ın Dağıstan çempionatında oynamaq istəyi ilə bağlı fikirlərin absurd olduğunu deyən Ramin bəy Regional Liqanın yaradılması haqqında bunları bildirib: “Demişəm ki, orada çıxış edəcək klublarda maraq yaransın deyə, 30-40 min manat mükafat ayrılsın. Elxan Məmmədovla bu haqda danışdıq, o da təkliflə razılaşdı”.
Sonda Musayev növbəti mövsüm Premyer Liqaya Diviziondan 4 komandanın yüksələcəyini bildirib: “Növbəti mövsümdə elitaya 4 klub çıxacaq və Premyer Liqada 12 komanda iştirak edəcək. Nəticədən və imkanından asılı olaraq, komandalar Premyer Liqada iştirak edə biləcək”.