Ölkə futbolu
Denisin oyunu
Futbol etibarsızdı. Bu gün Denis Silvanın üzləşdiyi aqi…
Futbol etibarsızdı. Bu gün Denis Silvanın üzləşdiyi aqibət qənaətimizi bur daha təsdiqləyir.
“İnter” “Qarabağ”a qarşı normal futbol oynadı, hətta hesabı açmaq üçün daha real şanslar qazandı. Amma qalibi ustalıq səviyyəsi, bir də futbolçuların fiziki durumu müəyyənləşdirdi. Düzdü, ağdamlıların yaraəvəzedici heyəti meydanda istədiyini edirdi, lakin son 15 dəqiqəyə kimi onlar həm süni örtüyün gətirəcəyi zədələrdən qorunmağa çalışır, həm də sanki istədikləri vaxt qol vuracaqlarına əminlikdən arxayın oynayırdı.
Qurban Qurbanov tempi artırmaq, hücumu gücləndirmək üçün 3 dəyişiklik etdi və qısa zamana istədiyinə nail oldu. Riçard Almeyda hələ oyuna alışmamış vacib zərbə vurdu, dirəkdən qayıdan topu Dino Ndlovu tora atdı. Daha sonra ikinci qol gəldi. Zaur Svanadzenin əvəzləmələri isə oyunu gücləndirməyə yox, yorulanların nəfəslərini dərməsinə hesablanmışdı. “Qarabağ”ın hətta ikinci heyəti də “İnter”dən güclüdü.
Çempionlar Liqasında “Atletiko”yla oyunöncəsi “Qarabağ” həm gücünə qənaət etdi, həm də vacib qələbə qazandı. Premyer Liqada ciddi rəqibi olmayan “Qarabağ”ın baş məşqçisi Qurban Qurbanov futbolçulara motivasiya verməkdə çətinlik çəksə də, qələblər sıralanır. Çünki rəqiblər aşkar zəifdi, Qara Qarayevi eksperiment aparıb müdafiəyə yox, qapıya da qoysan, xal qazanmaq problem olmamalıdı. Bir də məşqçinin Elvin Yunuszadəni yenidən qazanması alqışalayiqdi – o qədər səhvdən sonra da Qurbanov bu müdafiəçiyə tam dəstək verib, onu sabit oynayan birinə çevirdi.
Qurbanov millinin düşərgəsində çox əziyyət çəkən oyunçuları qoruyub, Pedro Enrike, Dino Ndlovu kimi futbolçulara praktika qazandırmağa çalışdı. Bəlkə də süni qazon üzərində onların oynadılması riskliidi, lakin 3 həftəlik fasilədən sonra “Atletiko” ilə oyuna çıxacaq oyunçular mütləq top görməliydi. Bu səbəbdən Qurban bəy qarışıq heyətə üstünlük verdi və istədiyinə nail oldu.
Qəzasız ötüşmək mümkün olmadı. Komandanın əsas hücumçusu Ndlovu ikinci qolu vurarkən ayağını zədələdi və texniki heyətin köməyi ilə meydanı tərk etdi. Onun zədəsinin ciddi olub-olmadığı, oktyabrın 18-də Çempionlar Liqasında “Atletiko” ilə matçda oynayıb-oynamayacağı tibbi müayinədən keçdikdən sonra bilinəcək. Lakin ilkin baxışdan görünürdü ki, faciəvi bir şey baş verməyib, bəlkə də birgünlük istirahət cənubi afrikalı legionerə kifayət edəcək.
“İnter” uduzmasaydı, buna görə Denis Silvaya minnətdar olacaqdı. Bu oyunçu 80 dəqiqə müdafiədə o qədər etibarlı oynadı ki, El Yunussidən 14 dəfə az maaş aldığı hiss olunmurdu. Təcrübəsi hesabına soyuqqanlı, inamlı oynayırdı. Lakin bakılıların uduzmasına görə də günahkar odu – ilk qolda adi epizodda topu uzaqlaşdıra bilmədi, ikincidə qapıçının götürəcəyi topu məhsuldar ötürməyə çevirdi.
Futbol buna görə ədalətsizdi. Amma Denisin 10 dəqiqəyə belə dəyişməsinin səbəbi yorğunluq, klub daxilindəki problemlərin yaratdığı psixoloji gərginlik, əvəzedilmədən oynamaq idi. Qəhrəmanın bir anda antiqəhrəmana çevrildiyi matçda baş rolda braziliyalı müdafiəçi “çəkilmişdi”.
CAVAD