Ölkə futbolu
Zaur Axundovun adqoydusu, kiçik toyu, Ədalətli şousu…
Birazdan “İnter” – “Kəpəz” oyunu baş…
Birazdan “İnter” – “Kəpəz” oyunu başlayır. Topaz Premyer Liqasında 10-cu turun sıradan oyunu. Amma “İnter” rəhbərliyi bu matçı KİÇİK TOY kimi qeyd etmək istəyir.
Nəyi kəsəcəklər, niyə kəsəcəklər, necə kəsəcəklər – bunu bilmirəm, amma “İnter”i kəsib, “Keşlə”yə çevirəcəkləri dəqiqdi. Klubun Müşahidə Şirasının sədri Zaur Axundov AFFA-nın baş katibi Elxan Məmmədovla Peşəkar Futbol Liqasının prezidenti Ramin Musayevi də kirvə kimi çağırıb. Dəllək çoxdan hazırlığa başlayıb, bu gün nöqtəni qoyacaq.
“İnter Arena” yenə aşıb-daşacaq, anşlaq olacaq. 3 gündü Nizami rayonunun idarə və müəssisələrində iş aparılır, tapşırıqlar verilib – hamı stadiona gedəcək. Səbəb nədi? Axundov yeni övladına kiçik toy edir, adqoydu mərasimi düzənləyir.
Fasilədə Ədalət Şükürov da oxuyacaq. Futbolçularına maaş verə bilməyən klub rəhbərliyi şou naminə bu müğənni üçün vəsait tapıb. Yəqin məşhur mahnsını da oxuyacaq: “Sənin adın nədir…”, ay “Keşlə”…
Belə tədbirlər, bayram əhval-ruhiyyəli nəsnələr yaxşıdı, amma səbəb ola. “İnter”in dəfni buqədərmi böyük olaydı? Axı, Axundov 5-6 aya autsayderə çevirdiyi iddialı bir komandanın ocağını söndürüb, indi də külüylə oynamaqla nəyi göstərmək istəyir? Ağasına nəyi sübut edir, nəyi nümayiş etdirir? Yoxsa neft borusundan daha yoğun kanal arzusundadı?
Axundov təzadlı biridi. Rauf Əliyev komandadan gedəndə əsdi-sovurdu, vəziri Rəmiş Malıyevə inanıb, “qayıdacaq” deyə and içdi, axırda da gülünc duruma düşdü. O, hələ də elə bilir ki, qol gücü, hərbə-zorba və ya zurna-nağara ilə böyük dağlar ucaltmaq olar. Xasiyyət də dəyişmir. Məsələn, 6-cı turun “Zirə”ylə səfər oyunundan sonra paltardəyişmə otağına girib, futbolçuları “optovoy” söyüb, kişilikdən, namusdan dəm vurub. Yaddan çıxarıb ki, üzbəüz söydükləri aylardı maaş almayan futbolçulardı və onlar bu mövsüm Zirədə xal qazanan yeganə komandanın üzvləridi.
Həmin “kişilik dərsi”ndən bu yana “İnter” yarım xal da qazanmayıb və Axundov da onlar üçün kiçik toy etmək qərarına gəlib. Bəlkə…
AĞA