Ölkə futbolu
Torba tikildi: Ramiz Məmmədov öz ampluasındadı
O hələ “İnter”ə gələndə torba tikmək üç…
O hələ “İnter”ə gələndə torba tikmək üçün gəldiyini yazmışdıq. Xisləti budur, harda işləyibsə, belə işlərlə məşğul olub.
“Qəbələ”də fakt qarşısında qoyulub, qovulmasaydı, hələ də orada idi. Neçə-neçə məşqçinin başını yeyib, 3-4 dəfə təyinat alar, hər transfer dövründə oyunlar oynayardı. Nə etsin? O da belə insandı. Məşqçi bacarığı bundan ibarətdi.
“Keşlə” (keçmiş "İnter") Zaur Svanadzeni istefaya göndərdi və Ramiz Məmmədovu onun xələfi seçdi. Gözlənilən idi. Bu adam kluba qondarma vəzifəyə – əvəzedicilərin koordinatoru gətiriləndə bəlli idi idi ki, baş məşqçi olmaq üçün gəlir. Klubun rəhbəri Zaur Axundovla əlbir olub, gürcünün torbasını tikdilər.
Avrokuboklardan sonra Svanadzeylə yollar ayrılmalı idi. Amma o zaman mətbuatın təzyiqi, ictimai qınaq qarşısında risk etmədilər, zaman gözlədilər. Və nəhayət, bəzi futbolçuların bilərəkdən zəif oyunu nəticəsində ardıcıl 4 məğlubiyyət sıralandı, torba tikildi.
Məmmədov aylardı bəzi futbolçulara söz verib – qışda “Keşlə”də olacaqsız. Kişinin oğlu danışıq aparıb, qeyri-rəsmi müqavilə bağlayıb, yalançı çıxası deyildi ki? Yəqin ağası Zaur Axundova arxalandığından belə iş tutub. İndi isə plan həyata keçir. Komandadakı bəzi oyunçularla əlbir fəaliyyətin nəticəsində gürcülər yola salındı. Çətin günlərdə yarıac-yarıtox işləyib, komandanı böhrandan çıxaran, dağılmağa qoymayan Svanadzedən sonra yemək üçün əla zaman olan “qış transfer pəncərəsi” dövründə onlar iş başındadı.
Ramiz Məmmədov, sən nə imişsən? Hamı torba tikməyə gəldiyini bilirdi, görürdü, sən isə gizli-gizli iş aparıb, yolundan dönmədin, məqsədinə çatdın.
P.S.: Məmmədovun ikinci dövrənin sonuna kimi əvəzləyici baş məşqçi olacağını Axundov açıqlayıb. O, Zaur İsmayılovun ona kömək edəcəyini bildirib.
P.P.S.: Heç qışda da başqası gəlməyəcək. Axundov ona yaraşan baş məşqçini tapıb və nəyisə bölə bilməyib düşmən olacaqları günə kimi yanaşı addımlayacaqlar.