Ölkə futbolu
Tərzin bu gün, Barqas bu həftə, Seqoviya ilə Mujek yanvarda gedəcək
“Neftçi” daha 4 futbolçusu ilə yollarını …
“Neftçi” daha 4 futbolçusu ilə yollarını ayırmağa hazırlaşır. Amma budəfəki ayrılıqlar asan başa gəlməyəcək.
Buna qədər Pavel Dreksa, Rahil Məmmədov, Edson Kastilyo və Məqsəd İsayevlə sağollaşan “ağ-qaralar” Fəhmin Muradbəyli, Maksim Vaylo və Təyyar Məmmədovu icarəyə verib. Klub rəhbərliyi “təmizləmə əməliyyatı”nda sayı 11-ə çatdırmaqda israrlıdı.
Futbolinfo.az xəbər verir ki, bakılılar Daniel Seqoviyanı yola salmağı çoxdan arzulayır. Baş məşqçi Tərlan Əhmədovun güvənmədiyi forvard isə problem yaradır. İspan oyunçu ciddi təklifi olmadığından, qalmaqda və qüvvədə olan müqaviləyə əsasən, maaşını almaqda israrlıdı. Oynayıb-oynamamaq onun üçün o qədər də önəmli deyil, lakin bakılılar Danieli yola salmaq, əvəzində daha səviyyəli hücumçu almaq istəyir.
Seqoviya məşqçinin planlarına daxil olmadığını və klubun onu göndərmək üçün təzminata razı olacağını bildiyindən belə davranır. O, maliyyə məsələsində güzəştə getmir. Təbii ki, sonda ortaq məxrəcə gəlinəcək. Hər iki tərəf bilir ki, bu əməkdaşlıqda fayda yoxdu, lakin həm klub, həm də futbolçu danışıqları uzadır, problemdən imkan daxilində uduşlu çıxmaq istəyir.
Məsələnin yanvarın sonuna kimi uzanması da mümkündü. Dəqiq olan isə odur ki, Seqoviya heyətdə saxlanılmayacaq: ya hansısa məbləğə razılaşacaq, ya da təzminatı tam şəkildə verilib yola salınacaq.
Uqo Barqasın gedişi daha realdı. Daha doğrusu,elə bu həftə 31 yaşlı hücumçu Boliviya klubu “Bluminq”ə keçəcək. “Neftçi”nin baş meneceri Eldəniz Yusifovun dediyinə görə, fransalı forvardla danışıqlar davam edir: “Barqasın bizimlə müqavilə müddəti davam edir. Bizə müraciət edib və öz tələblərimizi bildirmişik. Hadisələrin gedişi onu göstərir ki, tezliklə futbolçu ilə yollarımızı ayıracağıq”.
Barqasla müqavilənin yaxınlarda yeniləndiyini nəzərə alsaq, cəmi bir ay sonra onunla vidalaşmaq haqda qərar verilməsi anormal görünür. Bəlkə də ortada hansısa menecer oyunları var – axı, hər yeni anlaşma müəyyən xidmət haqqı, faiz deməkdi. Yusifov isə fərqli məqamdan danışır: “Özü yaxınlaşıb bizdən xahiş etdi. Fransa vətəndaşı olsa da, Argentina əsillidi və ailəsinə yaxın olmaq istəyir. Bu baxımdan Boliviyadan aldığı təklifi dəyərləndirmək fikrindədi. Bunun üçün o, bizimlə hesablaşmalıdı, müqavilə öhdəlikləri var. Düzünü desəm, qalmasında o qədər də maraqlı deyilik. Əvəzinə daha yaxşı hücumçu axtarışındayıq. Ancaq təbii ki, onu havayı buraxmayacağıq – o, bəzi itkilərə razılaşmalıdı”.
Seqoviya ilə Barqasın məsələsi fərqlidi, lakin “Neftçi” hər iki hücumçunun getməsində maraqlıdı. Daniel hələ yubanacaq, Uqo ilə isə ilkin danışıqlar olub və o, həftə ərzində “ağ-qaralar”la vidalaşacaq.
Bakılıların heyətdə görmək istəmədiyi Tərzin Cahangirovun məsələsi də həllini tapacaq. Yarımmüdafiəçi kluba görüşə dəvət olunub və bu gün məsələyə nöqtə qoyulacaq. “Keşlə”yə gedişi gündəmdə olan oyunçu ilə anlaşma davam etsə də, tərəflər müqaviləyə qarşılıqlı razılıqla xitam verməlidi. Ola bilər ki, futbolçuya müəyyən miqdarda kompensasiya da ödənsin.
“Neftçi” müdafiəçi Mateo Mujeki də yola salacaq. Onunla bir Qazaxıstan klubu maraqlanır. Futbolçu həmin klubla razılaşsa, bakılılarla anlaşmaq çətin olmayacaq, əks halda, yanvarda danışıqlar stolu arxasında yenə rəqəmlər “danışacaq”.
AĞA
- Ölkə futbolu2024-04-22 08:00
İddialıların “autsayder ovu”
- Ölkə futbolu2024-04-22 08:34
Musa “Yurqorden” dəftərini bağladı?
- Ölkə futbolu2024-04-23 12:31
AFFA-da gündəm: 12 komandalı Premyer Liqa, aşağı liqa klublarına dəstəyin artırılması
- Milli komanda2024-04-23 16:30
Milli komandaya məşqçi seçimi: “Ad açıqlaya bilmərik”