Ölkə futbolu
Mikayıl Nərimanoğlu Gəncədəki evini satır
"Kəpəz”dəki maliyyə yeyintilərinə görə klubdak?…
"Kəpəz”dəki maliyyə yeyintilərinə görə klubdakı və AFFA-dakı işini itirən Mikayıl Nərimanoğlu "kölgə”yə çəkilib.
Futbolinfo.az xəbər verir ki, AFFA-nın sabiq sözçüsü, Elxan Məmmədovun yaxın kadrı olan Nərimanoğlu baş katibin çabaları ilə sudan quru çıxarılıb. "Kəpəz”dəki yeyintilərdə cinayət tərkibi olsa da, işə prokurorluq orqanları qarışmayıb və AFFA məsələni daxili auditin əliylə yoluna qoymağa nail olub.
Ən yüksək səviyyədə Mikayıl Nərimanoğluna və onun himayədarlarına ismarıc göndərilib ki, "Kəpəz”in büdcəsindən oğurlanan pullar geri qaytarılmalıdı. İndiyə qədər konkret rəqəm açıqlanmasa da, söhbətin təxminən 400 min manatdan getdiyi məlumdur.
Artıq həmin məbləğin böyük bir hissəsi klubun büdcəsinə geri qaytarılıb. Məhz bunun da sayəsində "Kəpəz” yeni legionerlərlə sözləşmə imzalayıb, ölkə xaricinə təlim-məşq toplanışına yollanıb.
Etibarlı mənbələrdən aldığımız məlumata görə, Mikayıl Nərimanoğlu borcunu tam ödəyə bilməyib və ən sonda Gəncədəki evini satmağa qərar verib. Onun Gəncədə inşa etdirdiyi ev hazırda tələm-tələsik, öz real dəyərindən xeyli aşağı qiymətə satışa çıxarılıb. Evin yerləşdiyi ərazidə topraq xeyli baha olsa da, çarəsiz durumda olan Nərimanoğlu hazır tikilini 70 min manata satır.
Mənbəmiz bildirir ki, hazırda alqı-satqı ilə məşğul olan şəxslər AFFA-nın sabiq sözçüsü üçün müştəri axtarırlar. Məbləğ aşağı olduğu üçün Nərimanoğlunun evinin tezliklə satılacağı gözlənilir.
Sport7.az