Ölkə futbolu
“Neftçi” Namiq Ələsgərovu xarici kluba göndərdi – ÖZƏL
Daha bir futbolçumuz ölkə xaricində çıxış edə…
Daha bir futbolçumuz ölkə xaricində çıxış edəcək. Millimizin yarımmüdafiəçisi Namiq Ələsgərov “Neftçi”dən ayrılır.
Futbolinfo.az xəbər verir ki, Namiqin adının dünən “SKA-Xabarovsk”la oyunun iştirak ərizəsinə salınmaması təsadüf deyilmiş. Belə ki, “Neftçi” rəhbərliyi futbolçunu Bakıya göndəribmiş.
Xəbəri saytımıza açıqlamasında “Neftçi”nin mətbuat xidmətinin rəhbəri Anar Şabanoğlu da təsdiqlədi: “Namiqə real təklif var, onu birbaşa müqaviləyə çağırırlar. Biz də “Neftçi” klubu olaraq, milli komanda naminə, futbolçularımızın xarici klublara gedişini dəstəkləyirik. Onlara heç bir maneə yaratmırıq, əksinə, özümüz bunda maraqlıyıq”.
Anar bəyin sözlərinə görə, Namiq Bakıya sənəd problemlərini həll etmək üçün gəlib: “Onun bizimlə mövsümün sonuna kimi müqaviləsi vardı. Amma biz onu birdəfəlik satmaq istəmirik, icarəyə verəcəyik. Bu səbəbdən bu gün onunla yeni müqavilə imzaladıq və anlaşmanın müddətini 2019-cu ilin yayına kimi uzatdıq. Bu proses yekunlaşdığından, indi onu icarəyə verəcəyik”.
Ələsgərovun hansı komandaya gedəcəyi hələlik sirr saxlanılır. Bunun səbəbi isə danışıqlar prosesinin tam yekunlaşmamasıdı. Klub ad açıqlanmasının danışıqlara mənfi təsir edəcəyindən ehtiyatlanaraq, müştəri klubun adını məxfi saxlayır. Lakin yaxın saatlarda, ən geci sabah müqavilə rəsmiləşəcək.
“Neftçi”nin Namiqin milli komanda naminə perspektivini düşünməsi yaxşıdı. Bu mövsüm heç cür özünə bənzəməyən yarımmüdafiəçi bəlkə də mühiti dəyişməklə inkişafa nail olacaq, potensialını tam açacaq. “Bakı”da, “Kəpəz”də və “Qarabağ”da çıxış edərkən Namiqin hansı səviyyədə olduğunu görmüşük.
Lakin beyinlərdə sual yaradan mənzərə də var. “Neftçi”nin baş məşqçisi heyət yetərsizliyindən şikayətləndiyi, üstəlik, səviyyəli yerli oyunçuların az olduğu bir zamanda Namiqin buraxılması nə qədər məntiqəuyğundu? Düzdü, bakılıların yarımmüdafiənin cinahında oynamağa layiq bir neçə oyunçusu var, Namiq əvəzedilməz olmayacaq. Bununla belə, yenə də Ələsgərovun gedişi heç də ən yaxşı variant sayılmamalıdı. Əhmədov bəlkə də futbolçunun heç cür özünə gələ bilməməsini də nəzərəalaraq, buna razılaşıb.
Namiqin gedişi ilə büdcəyə də müəyyən qənaət ediləcək. Yəqin ki, bundan sonra legioner alışındakı düyün çözüləcək. İndi menecerlər futbolçuları “Neftçi”yə daha həvəslə təklif edə biləcək.