Ölkə futbolu
Əhmədovun vədi, vaxt istəməsi və demədikləri
“Hər şey qaydasındadı. İşlər normaldı, heç bir pr…
“Hər şey qaydasındadı. İşlər normaldı, heç bir problem yoxdu” – bu sözləri sportinfo.az-a açıqlamasında “Neftçi”nin baş məşqçisi Tərlan Əhmədov deyib.
Əhmədova inanmaq istəyirik, lakin kənardan elə görünmür. Yoxlama oyunlarında ardıcıl 3 məğlubiyyət öz yerində, yola salınan 10-dan çox futbolçunun da yeri doldurulmayıb. Vaxt bitir, heyət komplektləşməyib, bu üzdən komanda tam heyətlə hazırlaşmayıb. Tezliklə mövsümün ikinci yarısı, eyni zamanda bəhanələr başlayacaq. Yeni gələnlərin formaya düşməsi üçün vaxt istənəcək və s. Vaxt isə yoxdu.
“Geridə qalan 3 oyun mənim üçün yalnız bir cəhətdən çox vacib idi: komandamın xarakterini, nəyə qadir olmasını görmək istəyirdim. Bilmək maraqlıdı ki, görüm, futbolçular yorğunluq fonunda özlərini göstərə biləcək, ya yox. Bir gündə iki oyuna çıxmaq asan deyil. Fevraldan etibarən çempionatda ağır oyunlarımız bir-birini əvəzləyəcək. İki gündən biri meydana çıxmalı olacağıq. O mərhələnin hazırlığını bu ərəfədə görməliyik. Açığı, Antalyada heç bir oyunun nəticəsi mənim üçün maraqlı deyil. Mən bura bunun üçün gəlməmişəm. Futbolçularla söhbətdə də dedim ki, mən razıyam, bütün oyunları uduzaq, amma əyər-əskikləritmiz, mövsümün əvvəlində görmədiyimiz səhvlər üzə çıxsın. Ona görə də sistematik iş getməlidi. Çünki çempionatda bütün rəqibləri tanıyırıq, kimin hansı gücdə olmasına bələdik. Burda qarşılaşdığımız komandaların isə nə gücünə bələdik, nə də futbolçularının ayrı-ayrılıqda səviyyəsinə. Hər bir problem burda çıxır ortaya və indi də bunun üzərində işləyirik. Bu üç məğlubiyyətə görə üzülmürəm. Mən bəzi futbolçuları yoxlayırdım, müxtəlif taktiki gedişləri nəzərdən keçirirdim ki, gördüyüm səhvlərin üzərində işləyək”.
Tərlan bəyin dediklərində həqiqət payı var. Amma nəyə qadir olduğunu görmək istədiyi komanda 1:8 hesabıyla uduzursa, deməli, hazır deyil. Baxdın və gördün ki, futbolçular yorğunluq fonunda darmadağın olur, deməli, çempionatda da bu hal təkrarlanacaq. Yoxlama oyunlarının nəticəsi həqiqətən önəmsizdi, amma “SKA-Xabarovsk”la oyunun hesabı nəticə yox, faciə idi.
Əhmədov deyəsən, həqiqətən üçillik müqavilə arzusundadı. Rəhbərliyin guya ona yeni müqavilə təklif etməsi ilə bağlı yazılanları özü də arzulayırmış kimi görünür: “Neftçi”ni istəyənlər, Tərlanı istəyənlər hər halda bilməlidi ki, bu komandanı 3-5 aya, yarım ilə, hətta 1 ilə tam düzəltmək mümkün deyil. Buna zaman lazımdı. Heç kim yaddan çıxarmasın ki, Tərlan komandanı hansı vəziyyətdə götürüb və onda nələr baş verirdi. Düşüblər komandanın üstünə, hərə nə gəldi yazır, danışır. Hamı öz işində vaxt istəyir, mənə çatanda isə kimsə səbr etmək istəmir. Burdan “Neftçi”nin azarkeşlərinə səslənirəm: sözüm sizədi, heç kimə fikir verməyin, oturun bizi gözləyin. “Neftçi” istədiyinizdən də yaxşı komanda olacaq. O komandanı mən yaradacam! Heç biriniz ürəyinizi sıxıb eləməyin”.
Maraqlı mesajdı, sanki azarkeşləri ovutmaq üçün deyilib. Bəli, Tərlan bəyin yaxşı komanda yaratmaq üçün müəyyən potensialı var, lakin komandanın düşərgəsindən gələn xəbərlər bundan xəbər vermir axı. 2-3 gün öncə oyunçu çatışmazlığından danışan məşqçi, bu gün hər şeyin yaxşı olacağını deyir. Həm də heyətdə heç bir dəyişiklik olmadan. Bu yalan, bu başaldatma kimə lazımdı? Əhmədov oynatmağa 11 normal futbolçu tapmırsa, komandanı necə quracaq?
Klub prezidentinə tərif qağdırmağı yaddan çıxarmayan Tərlan bəyin transferlərdən, Aqil Məmmədovun qəfil gedişindən bir kəlmə danışmaması da maraqlıdı. Ayağa qalxmaq üzrə olan komandada indiki heyət oynayacaqsa, onların nəyə qadir olduğunu 2 dövrədə görmüşük. Əhmədov dediklərini bir də oxumalıdı ki, yayda üfürəcəyi bəhanələr gülünc alınmasın.
CAVAD
- Ölkə futbolu2024-04-22 08:00
İddialıların “autsayder ovu”
- Ölkə futbolu2024-04-22 08:34
Musa “Yurqorden” dəftərini bağladı?
- Ölkə futbolu2024-04-23 12:31
AFFA-da gündəm: 12 komandalı Premyer Liqa, aşağı liqa klublarına dəstəyin artırılması
- Milli komanda2024-04-23 16:30
Milli komandaya məşqçi seçimi: “Ad açıqlaya bilmərik”