Ölkə futbolu
"Siz mənə həm də göz yaşlarını, əsl kişi göz yaşlarını öyrətdiz"
"Qəbələ"nin İtaliyada keçirilən 13 yaşadək f…
"Qəbələ"nin İtaliyada keçirilən 13 yaşadək futbolçular arasında Qallini dünya kubokunda uğurlu çıxışı yerli insanların diqqətini çəkib.
Futbolinfo.az xəbər verir ki, komandamıza turnir boyu bələdçilik etmiş 18 yaşlı Tomazzo turnirdə 4-cü olmuş "qırmızı-qaralar"a sevgisini yazdığı məktubla ifadə edib. Həmin məktubu diqqətinizə çatdırırıq:
"Əziz "Qəbələ",
Məktubu sizə böyük təşəkkürlə başlamaq istəyirəm. Çox sağ ol Azərbaycan, çox sağ ol "Qəbələ". Həm böyüklər, həm uşaqlara təşəkkürümü bildirirəm.
Yolun başlanğıcında təsəvvür edə bilməzdim ki, dünyanın hansı hissəsindən gəldiyini bilmədiyim insanlara belə bağlanaram. Amma Venesiyada sizinlə görüşdüyüm anda xoş insanlar olduğunuzu anladım. Turnirin əhatə etdiyi dörd gündə özümü sadəcə sizin bələdçiniz yox, həmçinin, heyətinizin, komandanızın bir üzvü, dostunuz, ölkənizin təəssübkeşi kimi hiss etməyimə şərait yaratdınız.
Biz həqiqi komanda kimi birlikdə qalib gəldik və məğlub olduq, qələbələrə sevindik və ağladıq. Özümü xüsusi hiss etməyimə səbəb oldunuz, sizinlə dost olduğuma görə fəxr edirəm. Özümü sizdən biri kimi hiss etməyimə şərait yaratdınız, çox xoşbəxtəm, bu, mənim üçün çox vacib idi.
İlk oyunlardan birində sizdən bir nəfərin ağladığını gördüm və Naildən səbəbini soruşdum. O cavab verdi ki, biz emosional xalqıq, bu hal normaldır, mən təəccübləndim. Amma indi, bu məktubu yazarkən, göz yaşlarımı saxlaya bilmirəm, sizdən öyrəndiyim kimi.
Heyətinizə akademiya üzərində apardığı işə böyük təşəkkür edirəm.
Uşaqlar, çox sağolun, mənə komanda olmağın mənasını, hədəflər uğrunda irəliləməyi öyrətdiniz. Siz mənə həm də göz yaşlarını, əsl kişi göz yaşlarını öyrətdiniz. Siz hamınız yaxşı uşaqlarsınız, gülümsəməyi bacarırsınız, hətta işlər yaxşı getməyəndə belə.
Hər birinizin istedadı və potensialı var. Daim diqqətli olun, ciddi məşq edin və məşqçilərinizi dinləyin. Sizin üçün çox darıxacam, ümid edirəm ki, yenə də İtaliyada, bəlkə də Azərbaycanda görüşərik. Sizinlə ayrılıq ərəfəsində son olaraq demək istəyirəm: "Mən yaxşıyam. Hələlik. Sağ ol!" (Azərbaycan dilində yazır).
Sizin "Tomazzo"
Sportinfo.az