Ölkə futbolu
“Qəbələ”nin Qisməti
“Roma” və “Yuventus”un Çempionlar Liqa…
“Roma” və “Yuventus”un Çempionlar Liqasında çıxardığı hoqqalardan sonra bir oyuna görə kiminsə üstündən xətt çəkmək olmur. Ona görə “Qəbələ”nin ölkə kubokunun ilk yarımfinal matçında evdə uduzması hələ onları hesabdan silinməsinə imkan vermir. Bakıdakı cavab görüşündə hər şey ola bilər. Stiven Monrozun son dəqiqələrdə vurduğu təsəlli qolu isə bitmiş intriqanı yenidən diriltdi.
“Neftçi” layiqli qələbə qazandı, haqqını yemək olmaz. Bakılılar daha istəkli oynadı, 2:1 hesabından daha yaxşı nəticəyə də layiq idilər. İddialı “Neftçi”nin işartıları görünməyə başlayıb, zamanla doğru islahatlara davam edilsə, yeni mövsümdə çempionluğa oynayan komanda da görə bilərik. Yeni rəhbərlik Mayk Kampas kimiləri yox, ən azı Soni Mustivar səviyyədə futbolçular alsa, klubdaxili birliyə nail olsa, hamı bir hədəfə köklənsə, azarkeşlərin titul həsrəti bitəcək, uğurlar davamlı olacaq.
Lakin o da var ki, dünənki oyunda məğlubiyyəti “Qəbələ” özü istədi. Tarixinin ilk tituluna bu qədər yaxın ikən klub ciddi böhrana düşüb, rəhbərliklə futbolçu-məşqçi heyəti arasında rabitə görünmür. Futbolçular qələbə ruhunu itirib, oyun intizamı pozulub, hamı mövsümün tezliklə bitməsini gözləyir. Ciddi qan dəyişikliyi olmasa, avrokuboklar biabırçı nəticələrlə yadda qalacaq.
“Qəbələ”nin məğlubiyyəti daha çox fərdi səhvlərin nəticəsi idi. Baqali Dabo, Vitali Vernidub və Dmitri Bezotosnının yoxluğunda zəif bəndlər daha rahat görünür. Hücum dişsiz, müdafiə etibarsız, Aqil Məmmədov isə oyun praktikasız… Roman Qriqorçuk boşluqları doldurmaq istərkən Təmkin Xəlilzadənin formada olmaması, Qismət Alıyevin inkişafdan dayandığı, Filip Ozobiçin xeyli gerilədiyi üzə çıxır və zəncirin qopmuş halqaları komandanın boynuna zövqsüz asılmış bahalı boyunbağıya dönür.
“Qəbələ”nin yerli cavanlarla bağlı ciddi problemi var. Akademiya “yarımfabrikatlar” buraxır, heyətə qoymağa düz-əməlli oyunçu qalmır. Bəlkə də “Zirə”yə göndərilən Sadiq Quliyev, “Sumqayıt”dakı Bəhlul Mustafazadə ilə Ehtiram Şahverdiyev bu gün komandaya kömək edə bilərdi, lakin bu, ehtimaldı. Yusif Nəbiyevə də ümid bəslənirdi, indi isə…
Hə, bir də Qismət Alıyev var. İlk qolda rəqibə məhsuldar ötüürmə verən, ikincidə hücumun qarşısını kəsə bilməyən, amma limit üzündən oynamağa məcbur biri. Yaşı lazımi həddi keçən kimi Elvin Camalovun yanında, ehtiyatda əyləşəcək. Hələliksə “Qəbələ”nin qisməti Qismətlə uduzmaqdı. Komandanın problemi bir oyunçu ilə bağlı deyil, sadəcə, qollardakı səhvlərinə görə o, ön plana çıxır.
Əyalət klubu mövsümü hələ ötən yay uğursuz transferlər edəndə, qışda onların bəzilərini səviyyəsizliklərinə, bəzilərini büdcəyə qənaət etmək üçün göndərəndə uduzub. Son illər zərgər dəqiqliyi ilə çalışan işçilər baxımsızlıqdan xarab olan mühərrikin işlək olmayan detallarına çevriliblər. Hər şey var, heç nə yoxdu…
Qriqorçukun Bakıda cütün taleyini dəyişmək imkanı var. Amma bunun üçün azı 2 qol vurulmalıdı. “Neftçi” isə uduzmağı çoxdan tərgidib. “Qəbələ”nin köməyinə yalnız 2 cəbhədə oynayan rəqibin yorğunluğu gələ bilər. Çünki bakılılar çempionatda da güc qoymağa məcburdu, avrokuboklara vəsiqənin taleyini təkcə kuboka buraxmaq olmaz. 2-ci pillədə möhkəmləndiyindən futbolçularına istirahət verməyə imkanı olan “qırmızı-qaralar”dan fərqli olaraq, “Neftçi” 2 gündən sonra “Zirə” ilə səfər matçında qələbə qazanmağa məhkumdu.
Bəli, dünən “Qəbələ” ruhsuz, dişsiz idi, cavab matçında isə hər cür sürpriz mümkündü. Neftçi“ finala bir addım yaxındı, lakin hələ finalda deyil…
AĞA
- Ölkə futbolu2024-04-12 08:00
Mikayıl Cabbarovun kadrları azərbaycanlılara qarşı
- Digər idman növləri2024-04-12 00:29
“Anadolu Efes” növbəti mərhələdə
- Milli komanda2024-04-12 18:00
Millinin Gürcüstanla oyunlar üçün heyəti açıqlandı
- Ölkə futbolu2024-04-13 08:35
Leandro Azərbaycan dilini öyrənib: “Qarabağ”da yaşadıqlarım mənim üçün gözəl hekayədir”