Ölkə futbolu
Evsiz “Kəpəz” və “Kəpəz”siz ev
Gəncədə təzadlı mənzərədi. “Kəpəz” Premyer Liqad…
Gəncədə təzadlı mənzərədi. “Kəpəz” Premyer Liqada oynadığı vaxt şəraitsizlikdən əziyyət çəkirdisə, I diviziona düşməsi rəsmiləşdikdən sonra şəhər stadionu təmir edilir.
Futbolinfo.az xəbər verir ki, Gəncə stadionunda startı verilən təmir işləri səngiməyib. Gənclər və İdman Nazirliyinin balansında olan arenadakı quruculuq işləri “Kəpəz”in taleyi bəlli olandan, klub reqlamentə görə elitada yerini itirdikdən sonra da dayanmayıb. Təmir-bərpa işləri davam edir, klub bazası ən yaxşı şəkildə yenilənir, indiyədək olmayan məşq meydançaları salınır.
Əcəba, bütün bunlar “Kəpəz”in elitada saxlanılacağına işarədimi? Çətin! AFFA bu klubla bağlı mövqeyini ortaya qoyub və dəyişməsi möcüzə olar. Bəs, təmir işlərinin davam etməsinin səbəbi nədir?
Vəziyyət belədir ki, “Kəpəz” AFFA-nın maliyyəsi hesabına yaşayırdı, stadion isə nazirliyin balansında idi. Azarkeşlərin, futbol ictimaiyyətinin illərdi etdiyi fəryad nazirliyin qulağına indi çatıb. Və büdcə ayrılıb, təmir işləri başlanıb. Şəraitsizlik üzündən Bakıda məskunlaşan komanda bundan sonra Gəncədə qala bilər. Amma elitadan düşən komandanın, ümumiyyətlə, yaşamağı da sual altında olduğundan əminliklə deyə bilərik ki, bazanın, stadionun təmirinə xərclənən vəsait havaya sovrulur.
“Kəpəz”in ehtiyac duyduğu vaxt olmayan şərait indi onun yoxluğunda yaradılır. Kim üçün, nə üçün?
Təbii ki, Gəncə gözəl stadiona, əla infrastruktura layiqdi. Lakin işlər düzgün planlaşdırılmayıb. Məsul qurumlar əlbir işləmədiyindən, AGİN-lə AFFA ölkə idmanının inkişafını düşünərək eyni nöqtəyə vurmadığından yaranan pərakəndəlik belə mənzərəni ortaya çıxarıb. Evsiz “Kəpəz” və “Kəpəz”siz ev…
Belə təmir işləri nazirlik xətti ilə reallaşırsa, büdcədən ayırmalardan qidalanır. Yəqin ki, “Kəpəz” bir neçə il elitada, bəlkə də birdəfəlik olmayacaq. Və böyük futbol yenidən Gəncəyə qayıdanda yəqin ki, dağılmış baza, uçulmuş stadion görəcəyik. Hələ salınmasından 1 il ötməyən, 800 min manata başa gələn yeni ot örtüyünü demirik. O zaman yenidən təmir üçün maliyyə axtarılacaq. Və bir neçə il ötəndən, komanda didərgin həyat yaşayandan sonra tapılacaq…
Azərbaycana yaraşan təzadlı mənzərədi.
AĞA
- Ölkə futbolu2024-04-16 13:19
AFFA-da fırtınaqabağı sakitlik: maliyyə yoxlaması davam edir
- Ölkə futbolu2024-04-17 10:49
12 komandalı çempionat: necə etməli?
- Ölkə futbolu2024-04-16 09:10
Lunyov “Qarabağ”dan ayrıla bilər
- Ölkə futbolu2024-04-17 09:23
Mirzov “Neftçi”dən ayrılır: Premyer Liqadan təklifləri var