Ölkə futbolu
Köhnə yanlışların hədəfə gətirdiyi yenilər
Qurban Qurbanov fəryad edir, oyunçu axtarır, mövcud hey?…
Qurban Qurbanov fəryad edir, oyunçu axtarır, mövcud heyətin böyük perspektiv vəd etmədiyini deyir. Adam haqlıdı: ölkədə yüksək səviyyəli oyunçu sayı barmaqla sayılacaq qədərdi.
Rəşad Sadıqov məğlubiyyətləri sıralayır, qələbəyə həsrətdi. Onun rəhbərlik etdiyi 20-21 yaşlılar hər gəlib-gedən üçün başıqapazlıdı. Özü də Bakıda, öz hakimimiz Orxan Məmmədovun heç nədən icad etdiyi penalyitə baxmayaraq, millilərimiz Makedoniyaya uduzur. Və Sadıqovun vəziyyəti, səbəbləri də Qurbanovla eynidi.
Mətbuat bu iki şəxsə hələlik toxunmur. Ancaq təbii ki, pis nəticələr sınaq matçlarında qeydə alındığından, indiki susqunluq müvəqqətidi. “Qarabağ”da qazandıqları nüfuza, işə həqiqətən peşəkar yanaşmalarına, can yandırmalarına görə ictimaiyyət onların uğursuzluğuna yalnız bir müddət dözəcək, səbr edəcək.
Artıq sosial şəbəkələrdə, futbol təsərrüfatının bəzi dairələrində narazılıqlar özünü büruzə verir. Hamının xilaskar kimi təqdim etdiyi indiki məşqçilər korpusu vəziyyətdən çıxa bilmir və tənqid üçün hədəfə çevrilirlər. Millətlər Liqasındakı mümkün uğursuzluqdan sonrakı mənzərəni özünüz təsəvvür edin.
Robert Prosineçki, Berti Foqts, Bernard Lippert olsaydı, nəsə dəyişərdimi? Əsla!
Niyə? Çünki perspektiv yoxdu!
Bəs, bunun günahı kimdədi? 10 ildi ölkə futboluna milyonlar dağıdıb, yalnız görüntü yaradanlar!
O zaman Qurbanovla Sadıqov, eləcə də digər milli məşqçiləri AFFA-nın zibillərini ört-basdır etmək üçün seçilən qurbanlar deyilmi? Tamamilə doğrudu!
Bəs, xilaskar kimi ümid etdiyimiz bu məşqçilərin belə məhv edilməsinə göz yummalıyıqmı? Yox, amma bunun üçün öncə onlar özü üsyan etməlidi!
Bu perspektivi bilə-bilə onlar niyə özünü oda atdı? Əmr böyük yerdən idi, lakin indi elə o böyük yerləri real durumdan agah etmək lazımdı!
Əks halda, imic də əldən gedəcək, futbol təsərrüfatımızın kökünü qazıyan AFFA məmurları daha bir bəhanə qazanacaq. “Çempionlar Liqasının qrupuna vəsiqə qazanan insanlar da bacarmırsa, deməli, bizdə futbolun inkişafı mümkün deyil” deyəcəklər. Bəlkə bu bəhanə ilə dövlət büdcəsindən daha böyük vəsait ayırtdırıb, növbəti 10 ili də onu yeməyə həsr edəcəklər.
Beləcə illər ötəcək, heç nə dəyişməyəcək. Daha doğrusu, adlar – yeyənlər, yedirdənlər dəyişəcək, bundan ölkə futbolu qazanmayacaq. Halbuki vəziyyət faciəvi deyil. Topu srağagün tanıyan İslandiyada futbol təsərrüfatı yaratmaq, onu inkişaf etdirmək mümkündüsə, Azərbaycanda tarixi 100 ildən çox bu oyunun zirvədə olması daha rahatdı. Sadəcə, strategiya doğru, niyyət təmiz olmalıdı.
Quranovu, Sadıqovu bgünkü duruma görə qınamayaq. Hə, onların da səhvi var – bu gün ölkə futbolunun təməl problemlərini həll etmək əvəzinə yalançı görüntü yaradan AFFA rəhbərliyinin çaldığı havaya oynayırlar. Amma günahkar fərdlər deyil, sistemdi. Qurban bəyə, onun məşqçi komandasına məhz sistemi, baxışı, strategiyanı dəyişməkdə yardımçı olmalıyıq. Yeni, həm də sağlam nəslin yetişməsi ilə. Mətbuat, azarkeşlər, futbol ictimaiyyəti AFFA-nın ətrafında yox, doğru yol üçün birləşməlidi.
Milli komandaların indiki məşqçi nəsli də “uğursuz” damğası alsa, daha neçə illəri itirəcəyik. Bu səbəbdən onlar daha yaxşı çalışmalı və bacarıqlarını təkcə meydanda qoymamalıdılar. Düşüncəni dəyişməyə,peşəkarlığın bərqərar olmasına əmək sərf etməlidilər. Milli komandaların hər uğursuz oyununu onlara təzyiq vasitəsi kimi istifadə etməməliyik, bunun ötən illərdə düzgün görülməyən işlərin fəsadı kimi anlamalı, təkrarlanmamasına çalışmalıyıq.
FƏRİD
- Ölkə futbolu2024-04-23 12:31
AFFA-da gündəm: 12 komandalı Premyer Liqa, aşağı liqa klublarına dəstəyin artırılması
- Milli komanda2024-04-23 16:30
Milli komandaya məşqçi seçimi: “Ad açıqlaya bilmərik”
- Milli komanda2024-04-22 13:46
Fişer: “AFFA-dan təklif almamışam”
- Ölkə futbolu2024-04-23 08:00
“Səbail” “Sabah”a uduzsa…