130 manat əmək haqqı, 103 manatlıq milli forma

AFFA-nın rəsmi səhifəsi milli komandamızın forma dəstinin qiymətini açıqlayıb. Məlumatdan aydın olur ki, geyim dəsti 103 manata başa gəlir. Üst geyim 49, şort 36, getr isə 18 AZN-di.

Artıq sosial şəbəkədə bununla bağlı müzakirələr gedir və xüsusilə həmkarlarımız fəaldı. Əksəriyyət orta aylıq əmək haqqı 528, minimum əmək haqqı 130 manat olan ölkə üçün bu qiymətlərin həddindən artıq baha olduğu qənaətindədi.

Həmkarlarımızdan Zaur Xudiyev bir sıra ölkələrlə müqayisə də aparıb.

Azərbaycan: forma – 103 AZN, minimum əmək haqqı – 130 AZN
Türkiyə: forma – 300 TL, minimum əmək haqqı – 1600 TL
Fransa: forma – 85 avro, minimum əmək haqqı – 1750 dollar
Almaniya: forma – 100 funt, minimum əmək haqqı – 1532 avro
İspaniya: forma – 100 funt, minimum əmək haqqı – 1114 dollar

Göründüyü kimi, bizdə əksəriyyəti minimum əmək haqqına möhtac əhali həmin formaları alsa, o zaman ay ərzində başqa xərcə qatlaşmamalıdı. Yəqin ki, AFFA bununla sadə camaatı stadionlardan qaçaq salmağı düşünür, eyni zamanda onları milli formaya layiq bilmir. Bu geyimləri yalnız imkanlı adamlar ala bilər.

Bahalı “Nike” formalarını milli üçün seçənlər yəqin ki, bu amilləri nəzərə almayıb. Ya da onlar bu firmanın 3-4cü növ məghsullarına bu qədər baha satmaqla yalnız öz ciblərini doldurmağı düşünür. Axı, forma monopoliyası birbaşa AFFA-nın baş katibi Elxan Məmmədova məxsusdu.