Ölkə futbolu
Məmmədovun xoru: hakimlərin toplanışa göndərilməməsi bu təyinata hesablanmışdı
Elə bil xor kapellosudu. Hamısı bir-bir danışır. Hətta Zaur Axu…
Elə bil xor kapellosudu. Hamısı bir-bir danışır. Hətta Zaur Axundovun cibində gizlənən Rəmiş Malıyev də, “Sumqayıt”ı futbolçu alverinə qurban verən Riad Rəfiyev də…
Kim ki, Elxan Məmmdəovun qanadı altında boy atır, qaz vurub, qazan doldurur, hamı danışır, dəstək nümayiş etdirir. Fritz Stuxlikin təyinatından sonra AFFA-nın baş katibi bütün kadrlarına danışmaq tapşırığı verib, onlar da dil-dil ötür. Sanki bu təyinat futbolumuzu bataqlıqdan çıxaracaq.
Ölkə futbolunda ən problemsiz sahə hakimlikdi. Və AFFA uşaq futbolu, milli komandalar, klub futbolu və s. problem içində olan sahələri unudaraq bütün diqqəti hakimliyə yönəldib. Elxan Məmmədovun xoru da bir ağızdan eyni mahnını oxuyur. Təyinat o qədər risklidi ki, əks təbliğatdan, acı fəsadlarından çəkindikləri üçün tərif yağdırır, ictimaiyyətə qəbul etdirməyə çalışırlar.
Hakim və Hakim-İnspektorlar komitəsinin yeni sədri nə iş görəcək ki? Axı, hakimliyimiz o qədər bərbad durumda deyil. Hakimlik ölkəmizdə həmişə ən öncül sahələrdən olub, ən güclü məktəblərdən birinə sahibik. Hətta hakim idarəçiliyi futbolumuzun ümumi səviyyəsindən 1 addım irəlidədi. Sadəcə, bu sahəyə diqqət yetirilməyib, peşəkarlar kənar tutulub, yeniliklərin tətbiqi üçün münbit şərait yaradılmayıb. Və bu gün UEFA-nın tövsiyələrini yerinə yetirmək üçün əcnəbi mütəxəssis gətirməyə ehtiyac yox idi.
Kimlərsə – bəlkə də Ruad Rəfiyev – Stuxlikin gətirilməsindən menecer haqqı alacaq, avstriyalıya çəkilən xərcdən kimlərsə özünə pay ayıracaq, eyni zamanda Peşəkar Futbol Liqasını ofsayda salıb tam monopoliya yaradacaqlar deyə komitənin əcnəbiyə tapşırılması yolverilməzdi. Fritz hansısa fövqəlistedad, bacarıq sahibi deyil. Onun edəcəklərini daha yaxşı reallaşdıracaq xeyli mütəxəssisimiz var. Stuxlik ölkə futbolunu, hakimlərimizi və s. öyrənmək üçün 1 ili xərcləyəcək. Və onunla imzalanan üçillik müqavilə, xərclənəcək milyon avrodan çox vəsait havaya sovrulacaq.
Elə bütün bunları nəzərə alan baş katib “ansambl”ına xor tapşırığı verib, onlar da mətbuata daraşaraq açıqlamalar verirlər. Tərif tərif dalınca… İşin mahiyyətindən, prosesin necə gedəcəyindən, avstriyalının hansı bacarığa sahib olmasından xəbərsizcə… Hamı ancaq tərifləyir – məqsəd Məmmədovun addımına haqq qazandırmaqdı. Uşaq futbolundan, millilərdən, çatışmazlıqlardan danışarkən siçan deşiyində gizlənənlər indi bülbül olub.
Hamının da əlinə əsas düşüb. Turun açılış oyunundakı hakim səhvlərini misal gətirib bu təyinatı alqışlayırlar. Kimsə də demir ki, İnqilab Məmmədovun səhvlərinin səbəbkarı da elə baş katibdi. Məhz Elxan Məmmədov yayda onların toplanışa getməsinə imkan vermədi, hazırlığa süni şəkildə mane oldu. Heç bir hazırlıq keçməyən hakimlər əvvəl-axır büdrəməliydi və bu oldu. Məmmədov ədalət təmsilçilərinin hazırlığına süni şəkildə əngəl olmuşdu ki, indiki təyinat üçün səbəb ortaya çıxsın.
Elxan Məmmədovun bərbad solo çıxışını xor davam etdirir. Amma bu “sənət əsəri” artıq qulaq pərdələrimizi cırır, tezliklə repertuar dəyişməlidi. Bayağı ara mahnısıdı, klassik əsər deyil…
CAVAD
- Ölkə futbolu2024-04-30 09:15
“Qarabağ” Avropada 2-ci yeri bölüşdürür
- Ölkə futbolu2024-04-30 15:31
Riad Rəfiyevin çempionatı: hakimlər qışdan bəri “Sumqayıt”a 8 xal hədiyyə edib
- Premyer-liqa2024-04-30 09:30
“Yalnız birlikdə olaraq uğurlar qazana bilərik” – Ozobiç
- Ölkə futbolu2024-04-30 10:29
“Qarabağ” üçün daha bir potensial rəqib