Layihə
GÜNÜN NİDASI: Milinkoviç çox duruş gətirməyəcək!
Premyer Liqada bir neçə narahat klub var. Onların məşq&cced…
Premyer Liqada bir neçə narahat klub var. Onların məşqçisi hər an dəyişə bilər.
Düzdü, “Qəbələ” bu siyahıdan çıxmışa bənzəyir. “Neftçi” üzərində son qələbəylə özünə gələn komandanın rəhbərliyi ən çətin vaxtlarda da Sənan Qurbanova güvəndi. “Qırmızı-qaralar” növbəti dəfə qara zolağa düşməsə, ən azı qışa kimi hansısa dəyişiklik gündəmdə olmayacaq.
“Səbail” texniki qələbələr üzündən böhrandan çıxıb. “Zirə” və “Qarabağ” o səhvləri etməsəydi, bəlkə də indiyədək Aftandil Hacıyev istefaya göndərilmişdi. Amma xal ehtiyatı artdı və gənc məşqçi də rahatladı. Böyük büdcə qarşılığında 8 oyuna 7 xalı ona bağışlamazdılar.
Hazırda “Zirə” son pillədədi və ilk olaraq ağıla Samir Abasovun istefaya göndərilməsi gəlir. Lakin bu klub artıq bir dəfə dəyişiklik edib və Ayxan Abbasovun xələfinin də yola salınması gözlənilmir. Heyət yetərsizliyi fonunda baxımlı oyun da klub rəhbərliyini tərəddüddə qoyub. Yəqin ki, qış fasiləsinə kimi dözəcəklər. Hətta dünən azarkeşlərin məşqçini istefaya səsləməsi də həlledici olmayacaq.
Fikrimizcə, hazırda baş məşqçisini dəyişmək perspektivi baxımından ən öndə gedən klub “Keşlə”di. Mladen Milinkoviç dünən mövsümdə ilk qələbəyə sevinsə də, serbin vəziyyəti yaxşı deyil. Komanda ən bərbad futbol sərgiləyən kollektivdi və autsayder olması qanunayğundu.
İş ondadı ki, “Keşlə”də 11 legioner, xeyli təcrübəli futbolçu,hətta milli üzvləri var. Əvəzində məşqçi 7 oyuna cəmi 5 xal yığa bilib. Düzdü, heyət pis komplektləşib, daha çox əvvəlki çalışdırıcının vaxtındakı oyunçulardı. Lakin elə bu oyunçular ötən mövsüm Yuri Maksimovun rəhbərliyi altında ölkə kubokunu qazanmışdılar, üstəlik, Milinkoviç də bir neçə futbolçunun – Georgios Georgiados, Samir Məsimov, Ruslan Nəsirli, Conatan Ayite, Edvinas Girdvanis, Samba Diallo Quidileye – gətirilməsinə razılıq verib, qismən istədiyi komandanı qurub. Bunun qarşılığında komanda son pillələrdədisə, deməli, məşqçi istefası gündəmdədi.
Milli komandaların oyunlarına görə yaranan fasilə dönəmində istefa reallaşmadı. “Zirə”ylə son oyundakı qələbə də serb məşqçini bir qədər rahatlaşdırdı, lakin belə oyunla uğurun davamı mümkün deyil. 2-3 turdan sonra yenidən bu məsələ gündəmə gələcək. Milinkoviçin yeni ildə “Keşlə”də olmayacağını əminliklə demək olar. Klubun rəhbəri Zaur Axundovun xasiyyətini, xarakterini nəzərə alsaq, hər şey elə növbəti turdan sonra da reallaşa bilər.
“Keşlə”nin yeni baş məşqçisiylə bağlı müzakirlər günlərdi mətbuatın gündəmini zəbt edib. Tərlan Əhmədovla bağlı xəbərlər təsadüfi deyil. Özü rəhbərliyə xəbər göndərib, bildiyimizə görə, onun üçün ağız açanlar, məsləhət bilənlər də var. Mümkündü, amma doğrusu, Axundovun bu qədər yaddaşsız olduğunu gözləməzdik. 2 futbolçu və 1 məşqçinin futboldan ömürlük uzaqlaşdırılması olayı belə tez unudulmamalıydı. Həmin hadisələr vaxtı Əhmədov “Neftçi”nin baş məşqçisi idi və “Keşlə”nin məğlub edilməsi üçün bu futbolçularla təmasa keçmişdi. Zaur bəy də bundan hiddətlənmiş, Tərlana barmaq da silkələmişdi. İndi onları bir yerdə görmək sensasiya olacaq.
Hər halda, kim olursa olsun, Milinkoviçin hamıdan tez istefaya göndərilməsi aktualdı. Əcnəbi məşqçinin 11 legionerlə iddialı klubu autsayderə çevirməsi bağışlana bilməz! Yəqin ki, bağışlanmaqacaq da…
- Müsahibə2024-04-18 08:00
Rezabala avrokuboka vəsiqə istəyir: “Səhv etməyə ixtiyarımız yoxdur”
- Ölkə futbolu2024-04-19 08:52
Yüksək əmsal “Qarabağ”a əlavə üstünlük verir
- Ölkə futbolu2024-04-19 08:00
Juninyoya Niderlanddan da müştəri çıxdı
- Digər idman növləri2024-04-18 17:00
Şahmat Federasiyası yeni loqonun hazırlanması ilə bağlı müsabiqə elan etdi