Ölkə futbolu
Stuxlikin qüsurlu təşəbbüsü
Fritz Stuxlikin fikirlərini olduğu kimi verdik. Futbolinfo.az oxucul…
Fritz Stuxlikin fikirlərini olduğu kimi verdik. Futbolinfo.az oxucuları dünən AFFA Hakimlər və Hakim-İnspektorlar Komitəsinin sədrinin açıqlaması ilə tanış oldu.
O, Topaz Premyer Liqasının 11-ci turunun “Sumqayıt” – “Keşlə” matçında ehtiyat hakim olacaq Akif Əmrəlinin təyinatı haqda danışarkən maraqlı fikir səsləndirdi. Yan xətt hakiminin birdən-birə 4-cü olması onun həm də baş hakim kimi meydana çıxması ehtimalını yaradır. Görüşü idarə edəcək Əliyar Ağayev hər hansı zədə alarsa, bu zaman məhz Akif fiti əlinə almalıdı. Amma heç vaxt oyun idarə etməyən, ancaq bayraq daşıması ilə tanınan birinin bu vəzifəyə hazırlığı şübhə doğurur.
Stuxlik aydınlatma gətirmək üçün bildirdi ki, bu, bilərəkdən atılan addımdı: “Akifi sınaqlarda yoxlamışıq. O, buna hazırdı. Biz bu hakimi beynəlxalq oyunlara ehtiyat hakim kimi göndərmək niyyətindəyik, onu buna hazırlayırıq. Bu üzdən çempionat matçlarında sınamağa qərar vermişik. Hər hansı problem olmayacaq, o, bütün vəziyyətlərə hazır olmalıdı”.
Müsahibimizin fikirlərinə hörmət əlaməti olaraq, dünən bu açıqlamanı şərh etməyi lazım bilmədik. Özü də qısa açıqlama ilə kifayətləndiyindən əlavə sual vermək imkanımız olmadı. Amma indi sayt vasitəsi ilə növbəti suallarımıza cavab istəyirik.
1. Akif ehtiyat hakim kimi hazırlanırsa, deməli, həm də baş hakimliyə hazır olmalıdı. O zaman yan xətt hakiminə niyə heç bir oyunda, hətta divizionda da bu rolda güvənilmir? Axı, belə olsa, onu sınaqdan daha rahat çıxarmaq, hər situasiyaya hazırlamaq olar.
2. Əmrəli mövsümün əvvəlində yan xətt hakimi kimi təsdiq olunub. Deməli, ən azı qış fasiləsinə kimi bu rolda olmalıdı. Belədisə, onun 4-cü hakim kimi təyinatı qanun pozuntusu deyilmi?
3. Akif həqiqətən beynəlxalq oyunlara hazırlanırsa, burada da doğru addım atılmayıb. FIFA-ya adları göndərilən namizədlərin siyahısında onların göstəriciləri də əksini tapmalıdı. Yan xətt hakimi kimi statistika pis deyil, lakin ehtiyat hakim kimi indi debüt edəcək biri hansı əsasla məhz bu rola namizəd göstərilir? Axı, bu baxımdan böyük təcrübəsi olmayan biri 1-2 oyunla beynəlxalq dərəcə ala bilməz. Hə, beynəlxalq oyunlara milli dərəcəli hakimlər də təyinat alır, ancaq belədə də haqqı çatan digərlərinin haqqı tapdalanmırmı?
Bəlkə də xırda, şişirdilməsinə lüzum olmayan məsələdi. Amma bu təyinatı qabartmaqda məqsədimiz Stuxlikin qüsurlarını üzə çıxarmaqdı. Xırda bir məsələdə bu qədər boşluq verən sədrdən necə mədət uma bilərik? Azərbaycan hakimliyini yeni səviyyəyə qaldırmaq üçün gələn avstriyalı, deyəsən, hələ özü bizim səviyyəmizə çatmaq üçün xeyli çalışmalıdı. Saxtakarlıqla, görüntü yaratmaqla işgüzar imic formalaşdırmaq istəyirsə, o bilər, daydayı Elxan Məmmədov bilər, bir də təyinatını rəsmiləşdirən İcraiyyə Komitəsinin üzvləri…
CAVAD